වැලිගම පැලෑන ප්රදේශයේ W15 නමැති හෝටලයට 2023 දෙසැම්බර් 31 දා වෙඩි තැබීමේ සිද්ධියකට අදාළව ඇති නඩුවක් සම්බන්ධයෙන් මහෙස්ත්රාත්වරයා මාතර ප්රධාන මහේස්ත්රාත් අරුණ බුද්ධදාස විසින් ඊයේ නියෝගයක් නිකුත් කළ ද එහි ප්රධානම චූදිතයෙක්වන කොළඹ අපරාධ කොට්ඨාසයේ පොලිස් පරීක්ෂකවරයෙක් මේ වනවිට රටින් පැන ගොස් ඇතැයි පොලිසියේ අභ්යන්තර ආරංචි මාර්ග වාර්තා කරයි.
මෙම සිද්ධියේ ප්රධාන සැකකරුවෙක් වන මෙම පොලිස් පරීක්ෂකවරයා රටින් පැනගියාද පැන්නුවා ද යන්න සැකයක් පවතින බව ද එම ආරංචි මාර්ග පවසයි.
ඊයේ මහේස්ත්රාත්වරයා නියෝග කළේ රාජකාරි අත්හිටුවන ලද පොලිස්පති දේශබන්දු තෙන්නකෝන් ඇතුළු හයදෙනකු අත්අඩංගුවට ගෙන අධිකරණයට ඉදිරිපත් කරන ලෙසය. දේශබන්දු තෙන්නකෝන් පදිංචි නිවෙස අපරාධ පරීක්ෂණ දෙපාර්තමේන්තුව මගින් සෝදිසි කර ඇතත් ඔහු ඊයේ නිවසේ නොසිටි බවද විමර්ශන අංශ පවසයි.
මෙම සිද්ධියේ දී උපුල් චමින්ද කුමාර නැමැති පොලිස් සැරයන්වරයෙක් ද වැලිගම පොලිසියේ වෙඩි පහරින් මරණයට පත් විය. W15 හෝටලයට වෙඩි තැබීමේ සිද්ධියට කොළඹ අපරාධ කොට්ඨාසයේ නිලධාරීන් පැමිණ තිබුණේ අදාල පොලිස් බල ප්රදේශයෙක් පොලිසිය දැනුම්වත් නොකරමිනි.
එමෙන්ම වැලිගම පොලිසිය අණ නොතකා පලා යෑමට උත්සාහ කළ කොළඹ සීසීඩී නිලධාරීන් වැලිගම පොලිසියේ වෙඩි පහරට ලක් විය. සිද්ධියේ විමර්ශන මුලුමනින්ම යට ගසා තිබිය දී නව රජය එම විමර්ශනය ප්රමුඛ විමර්ශනයක් ලෙස සලකා නැවත ආරම්භ කර තිබිණි.
