පසුගිය වසරේ දී සිසුන් 20000 ක් පමණ පාසල් ගමන අතරමග නතර කර තිබෙන බවත් තවත් ළමුන් 80000 ක් පමණ පාසල් ගමන අඛන්ඩව සිදුකර නොමැති බවත් අධ්යාපන අමාත්යාංශය මගින් කළ සංගණනයකදී අනාවරණය වී ඇති ආකාරය අග්රාමාත්ය, අධ්යාපන, උසස් අධ්යාපන හා වෘත්තිය අධ්යාපන අමාත්ය, ආචාර්ය හරිනි අමරසූරිය පවසයි.
යෝජිත නව අධ්යාපන ප්රතිසංස්කරණ වැඩපිළිවෙළ සම්බන්ධව මධ්යම පළාතේ අධ්යාපන නිලධාරීන් දැනුවත් කර ඒ සඳහා ඔවුන්ගේ යෝජනා ලබා ගැනීම වෙනුවෙන් ඊයේ (31) මහනුවර දිස්ත්රික් ලේකම් කාර්යාලීය ශ්රවානාගාරයේ දී පැවැති රැස්වීමක දී අගමැතිවරිය මේ බව පැවසුවාය.
එහි දී අගමැති හරිනි අමරසූරිය මෙසේද ප්රකාශ කළාය.
“පාසල් අධ්යාපනය සැලකීමේ දී ළමුන් ලක්ෂ තුනක් පමණ වාර්ෂිකව පාසැල්වල පළමු ශ්රේණියට ඇතුළු වෙනවා. මේ අතරින් වසරකට ළමුන් 20000 ක් පමණ පාසල් ගමන අතරමග නතර කරනවා. මේක ප්රතිශතයක් ලෙස ගත්විට 1% ටත් අඩුයි. නමුත් සංඛ්යාත්මක බැලුවොත් 20000 ක් කියන්නේ අත්හැරිය යුතු ගණනක් නෙවෙයි.”
“ගුණාත්මක අධ්යයනක් මේ සම්බන්ධව කරලා මේ ළමයින්ට මොකද වුණේ, කොහෙද ඉන්නේ කියලා හොයන්න ඕන. මෙය අප කතා කරන සමාජ අර්බුද ගණනාවක් නිර්මාණය වන එක තැනක් විය හැකියි. සංඛ්යාත්මකව ගත්විට පිරිමි දරුවන් තමයි වැඩිපුර පාසැල් ගමන අතරමග අත් හරින්නේ. මේ සංගණනයේදී ළමුන් 80000 ක් පමණ නියමිත දින ගණන පාසල් නොපැමිණෙන බව අනාවරණය වුණා. මේ අය පාසල් එන්නේ පාසැල් පවත්වන දින ගණනින් 50% ක් විතර බව හෙළි වුණා. ”
“පළමු ශ්රේණියට සිසුන් ලක්ෂ තුනක් ඇතුළු වෙනකොට ලක්ෂයකට විතර නියමිත අධ්යාපනය ලැබෙන්නේ නැහැ. ඒක බරපතළ ප්රශ්නයක්. මේ අය අධ්යාපනය වෙනත් මාර්ග වලින් ලබා ගන්නවාද නැත්නම් අධ්යාපන අත්හැරලද කියන කරුණු අප සොයා බැලිය යුතුයි.”
“රාජ්ය විශ්වවිද්යාල 17 ට වසරකට සිසුන් 40000 ක් ඇතුළු වෙනවා. වෘත්තිය අධ්යාපනයට තවත් 150000 ක් විතර ඇතුළු වෙනවා. උසස් පෙළ අවසන් කළ අය වගේම පාසල් සමයේ එක් එක් අවස්ථාවලදී දරුවන් වෘත්තිය අධ්යාපනයට යොමු වෙනවා. ඉතිරි පිරිසට මොකද වෙන්නේ. ඒ අයට මොකක්ද වෙන්නේ කියලා හොඳ තක්සේරුවක් නැහැ.”
“අද ලබන අධ්යාපනය පහසුවෙයන් රැකියාවකට ඇතුළු වෙන්න ප්රමාණවත් නැහැ. මේක ගැහැණු දරුවන්ට විශේෂයෙන් බලපා තිබෙනවා. විභාග වලින් හොඳ ප්රතිපල පෙන්වා තිබුණත් රැකියා වලට ගියාම ගැහැණු දරුවන්ට අවස්ථා අඩුයි. ශ්රම බලකාය තුළ පිරිමින්ට වඩා 50 % කින් පමණ කාන්තා දායකත්වය අඩුවී තිබෙන්නේ මේ අවස්ථා නොමැතිවීම නිසයි.”
” මේ අධ්යාපන ක්රමය තුළත් ප්රශ්න තිබෙනවා. නිදහස් අධ්යාපනය තුළින් සියලු දරුවන්ට අධ්යාපනය සඳහා ප්රවේශය ලබා දුන්නද ඒ සියලු දරුවන්ට ගුණාත්මක අධ්යාපනයක් ලබාදීමක් සිදුවන්නේ ද යන්න ප්රශ්නයක්. අර්බුද විසඳන්න පුළුවන්, සමාජය එක්ක සාර්ථකව ගනුදෙනු කළ හැකි පුරවැසියෙක් අධ්යාපනය තුළින් නිර්මාණය කළ යුතුයි.” අගමැතිවරිය කීවාය.
