මනම්පිටිය නිමල් ජයරත්න –
තමා ව්‍යාපාර කටයුතුවලින් ඉවත් වී මිනිසුන් වෙනුවෙන් වැඩ කිරීමට තීරණය කර ඇති බවත්, ව්‍යාපාරවලින් උපයාගත් ලාභයෙන් කොටසක් ඉදිරියේදී ක්‍රමානුකූලව අසරණ ජනතාවගේ සුභ සිද්ධිය වෙනුවෙන් බෙදාදීමට කටයුතු කරන බවත්, රත්න හාල් ව්‍යාපාරික මිත්‍රපාල ලංකේශ්වර පැවසුවේය.
සිය සැලසුම වන්නේ කලාපයේ දුගී පුද්ගලයින්ට උපකාර කර ඔවුන් කර්මාන්තකරුවන් ලෙස නගා සිටුවිය හැකි පරිසරයක් නිර්මාණය කිරීම බව ද හෙතෙම කීවේය.
අද (28) සවස වැලිකන්ද සංසකෘතික මධ්‍යස්ථානයේ උත්සවයක් පවත්වා තම ආයතනයේ දීර්ඝ කාලයක් සේවය කළ සේවකයින් 335ක් සඳහා උපහාර කරමින් ඉන් අනතුරුව සභාව අමතා මිත්‍රපාල ලංකේශ්වර මෙසේ ද කීවේය.
“වසර හැත්තෑපහක පොළොන්නරුවේ පැරණි දේශපාලන සංස්කෘතියක් තිබුනත්, පැරණි දේශපාලනඥයො හිටියත්, පොලොන්නරුව හොඳ තත්වයට හදාගැනීමට අපට බැරි වෙලා තියනවා.
“පොළොන්නරුව දිස්ත්‍රික්කයෙන් මෛත්‍රිපාල සිරිසේන විධායක ජනාධිපතිවරයා බිහිවුනා. එච්, ජී,පී නෙල්සන්, රොෂාන් රණසිංහ, සිඩ්නි ජයරත්න, ලීලාරත්න විජේසිංහ, සිරිපාල ගම්ලත්, වගේ විශාල බලයක් සහිත දේශපාලකයො හිටියා. අදත් ඉන්නවා. ඒත් වැඩක් වෙලා නෑ.
“ පොලොන්නරුවේ මේ අසරණ මිනිස්සුන්ට පොඩි පොඩි ව්‍යාපාර ආරම්භ කරලා දුන්නොත් දියුණු වෙන්න හැකියාව තිබෙනවා, බුදුරජාණන් වහන්සේ දේශනා කරලා තිබෙනවා, ව්‍යාපාරවලින් ලාභයෙන් කොටසක් ඉතිරි කරලා අසරණ අයට ලබා දෙන්න කියලා, මම ඒ දේ කරලා තියෙනවා, ඉදිරියේදී ක්‍රමානුකූලව දුප්පත් ජනතාවට අවශ්‍ය සම්පත් ලබා දෙනවා. අනිත් ව්‍යාපාරිකයන්ටත් මම යෝජනා කරනවා ජීවත්ව සිටින කාලයේ අසරණ මිනිසුන් වෙනුවෙන් කොටසක් ඉතිරි කරලා යම් සමාජ සේවයක් ජනතාවට කරලා මැරිලා යන්න කියලා” යැයි මිත්‍රපාල ලංකේශ්වර වැඩිදුරටත් කීවේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වෙතත් මින් පෙර අවස්ථාවක දී මිත්‍රපාල ලංකේශ්වර මාධ්‍ය සාකච්ඡාවකදී පැවසුවේ තමන් දේශපාලනයට සම්බන්ධ වෙනවා නම් ව්‍යාපාරවලින් ඉවත්වන බවය.