සූරියවැව නුවන් ජයසේකර
-
මීට අමතරව කජ්ජා ඝාතන සිද්ධිය පිළිබදව ප්රශ්ණ කිරිම සදහාද සැකකරු දින 90ක් රඳවා තබා ගැනිමට අධිකරණය පොලිසියට අවර දෙයි.
පසුගිය දා රට තුළ මහත් ආන්දෝලනයක් ඇති කරමින් මිද්දෙණිය ප්රදේශයේදී අයිස් මත්ද්රව්ය නිපදවීමට යොදාගන්නා බවට සැක කෙරෙන රසායනික ද්රව්ය කන්ටේනර් දෙකක් සොයා ගැනීමේ සිද්ධිය සම්බන්ධයෙන් චෝදනා එල්ල වී සිටින සම්පත් මනම්පේරි නැමැත්තා අද (17) පස්වරු වලස්මුල්ල මහේස්ත්රාත් අධිකරණයට භාර වීමෙන් පසු දින 07ක කාලයක් සඳහා රඳවා තබාගෙන ප්රශ්න කිරිමට වලස්මුල්ල මහේස්ත්රාත් කෝකු හැන්නදිගේ නවෝදා මහත්මිය පොලිසියට අවසර ලබා දී තිබේ.
මෙසේ රඳවා තබාගෙන ප්රශ්න කරන්නට අවසර දී ඇත්තේ අංක 352, කන්තෝරු වත්ත, තලාව දකුණ ,කාරියමඩිත්ත පදිංචි විජේවික්රම මනම්පේරිගේ සම්පත් පීති විරාජ් නොහොත් සම්පත් මනම්පේරි නැමැත්තාය.
මිද්දෙණිය තෝරකොලයාය ප්රදේශයේ ඉඩමක වලදමා තිබියදී පසුගිය 05 වන දින මෙම රසායනික ද්රව්ය සොයාගනු ලැබුවේ බස්නාහිර උතුර අපරාධ විමර්ශන කොට්ඨාසය භාරයේ සිටින ‘බැකෝ සමන්’ නැමැත්තාගෙන් සිදු කළ ප්රශ්න කිරීම්වලදී ලැබුණු තොරතුරකට අනුවය.
‘කෙහෙල්බද්දර පද්මේ’ නැමැත්තෙකු විසින් මෙම රසායනික ද්රව්ය මෙරටට ගෙන්වා ඇති බවට ඔහු ප්රකාශ කර තිබේ. පොලිසිය සඳහන් කළේ හිටපු පළාත් පාලන මන්ත්රීවරයෙකු හා ඔහුගේ සහෝදරයා මෙම රසායනික ද්රව්ය සඟවා තබාගෙන සිටි බවය. ඒ අනුව විමර්ශන නිළධාරීන් සිද්ධියට සම්බන්ධ සැකකරුවන් සොයා පරික්ෂණ ආරම්භ කෙරුණු අතර මෙම සිද්ධියේ සකකරුවෙකු වන සම්පත් මනප්පේරි නැමැත්තාද පොලිසිය මග හැර සැඟවි සිටියේය.
එලෙස සැඟව සිටි සම්පත් මනම්පේරි නැමැත්තා නිතීඥයෙකු මාර්ගයෙන් පසුගිය 15 වන දින අභියාචනාධිකරණයට රිට් පෙත්සමක් ඉදිරිපත් කර තිබුණි. එහිදි සම්පත් මනම්පෙරි නැමැත්තා වෙනුවෙන් පෙනි සිටි නීතීඥවරයා අභියාචනාධිකරණයෙන් ඉල්ලා සිටියේ තම සේවාදායකයා අදාළ මහේස්ත්රාත් අධිකරණයට බාරවිමට සූදානම් බවත්, එසේ බාර වීමෙන් පසු සම්පත් මනම්පේරි නැමැත්තාගේ ආරක්ෂාව තහවුරු කිරිමට පියවර ගන්නා ලෙස පොලිස්පති වරයාට නියෝගයක් නිකුත් කරන ලෙසත්ය.
ඒ අනුව කරුණු සළකා බැලු අභියාචනාධිකරණ විනිසුරු මඩුල්ල සැකකරුගේ ආරක්ෂාව තහවුරු කරන ලෙසට විමර්ශන නිළධාරීන්ට නියෝගයක් නිකුත් කෙරුණි. එම නියෝගය නිකුත් කර දින දෙකකට පසු අද (17) නීතීඥයෙකු මාර්ගයෙන් වලස්මුල්ල මහේස්ත්රාත් අධිකරණයට මෝසමක් ඉදිරිපත් කර සැකකරු පස්වරු 03ට පමණ බාර වීය.
සැකකරු අධිකරණයට ඉදිරිපත් වන අවස්ථාවේ අධිකරණය අවට විශේෂ ආරක්ෂාවක්ද යොදවා තිබුණි. අධිකරණයට ඉදිරිපත් කෙරුණු සැකකරු වෙනුවෙන් නීතීඥ A.M.A.A ලක්මාල් රත්නායක, නීතීඥ තිළිනි වික්රමසිංහ දෙපළ ඇතුළු නීතීඥවරුන් කිහිප දෙනෙක්ම අධීකරණය හමුවේ පෙනි සිට කරුණු ඉදිරිපත් කළහ.
පැමිණිල්ල වෙනුවෙන් පෙනී සිටි බස්නාහිර උතුර අපරාධ විමර්ශන කොට්ඨාසය නිළධාරීන් විසින්ද මෙම සිද්ධිය සම්බන්ධයෙන් අධිකරණය ඉදිරියේ කරුණු ඉදිරිපත්කළ අතර සැකකරු රඳවා තබාගෙන ප්රශ්න කිරිම සඳහා අවසර ලබා දෙන ලෙස අධිකරණයෙන් ඉල්ලා සිටියේය. ඒ අනුව කරුණු සළකා බැලූ වලස්මුල්ල මහේස්ත්රාත්වරිය සැකකාර සම්පත් මනම්පේරි නැමැත්තා දින 07ක් රදවා තබාගෙන ප්රශ්න කිරිම සදහා පොලිසියට අවසර ලබා දුන්නේය.
මීට අමතරව අනුර විදානගමගේ නොහොත් “කජ්ජා “ නමැති අය හා ඔහුගේ දරුවන් දෙදෙනා වෙඩි තබා ඝාතන සිද්ධියට අදාලවද ප්රශ්න කිරීම සඳහා දින 90 ක් ( දෙසැ: 03) දක්වා රඳවා තබාගෙන ප්රශ්න කිරීමටද මෙහිදී මහේස්ත්රාත්වරිය පොලිසියට අවසර ලබා දුන්නාය .
අධිකරණයට බාර වු සම්පත් මනම්පේරි නැමැත්තා කලක් පොලිස් කොස්තාපල් වරයෙකු ලෙසත්, කෙටි කාලයක් බුද්ධි අංශ නිලධාරියෙකු ලෙසද කටයුතු කර ඇති බව වාර්තා වෙයි. මීට අමතරව ශ්රී ලංකා පොදුජන පෙරමුණේ අපේක්ෂකයෙකු ලෙසද ඉදිරිපත්ව තිබේ. සැකකරුගේ සහෝදරයා වන ශ්රී ලංකා පොදුජන පෙරමුණේ හිටපු ප්රාදේශීය සභා මන්ත්රි වරයෙකු වන පියල් මනම්පේරි නැමැත්තාද මෙම සිද්දියට අදාලව මීට පෙර අත්අඩංගුවට ගෙන තිබේ. එහිදී අත්අඩංගඅවට පත් සැකකරුවන්ගෙන් සිදුකළ ප්රශ්ණ කිරීමේදී අනාවරණය වි තිබුණේ මෙම රසායනික ද්රව්ය ජනවාරි මස 29 වන දා කොළඹ සිට කන්ටේනර් දෙකක අසුරා රැගෙනවිත් කලුවගහයාය පාර, තලාව, කාරියමඩිත්ත ප්රදේශයේ මාර්ගය අයිනේ ගබඩාකර තිබී පසුව අගෝස්තු මස 31 වන දින ගෙවත්තකට රැගෙනවිත් වළ දමා ඇති බවය.
කිලෝ 500ක බරින් යුතු කවර 22ක් මෙලෙස වළ දැමූ බව පොලිස් ප්රශ්න කිරිම් හමුවේ ජේසීබී යන්ත්රයේ ක්රියාකරු පොලිසියට පවසා තිබේ.
