ක්ලබ් වසන්ත ඝාතනය සැලසුම් කරනු ලැබූ සංවිධානාත්මක අපරාධකල්ලි නායක සුජීව රුවන් කුමාර හෙවත් ලොකු පැටී, ලොකු පැටීගේ සහෝදරයාවන සංජීව පුෂ්පකුමාර ද සිල්වා සහ ගල්කිස්ස ප්රදේශයේ ප්රමුඛ කුඩු ජාවාරම් කරුවෙක් වූ මර්වින් ජානක නැමැත්තාගේ බිරිය බෙලරූස් රාජ්යයේ දී අත් අඩංගුවට ගෙන ඇති බවට ආරක්ෂක අංශවලට තොරතුරු ලැබී තිබේ.
ලොකු පැටී යනු රට තුළ බරපතල අපරාධ ගණනාවක් සිදුකර තිබියදී අත් අඩංගුවට පත්ව ඇප ලැබීමෙන් අනතුරුව රටින් පැන ගිය අපරාධකරුවන්ය.
මර්වින් ජානක නැමැති මහා පරිමාණ මත්ද්රව්ය ජාවාරම්කරුට බෙලරූස් රාජ්යයේ පුද්ගලික නිවාසයක් ඇති බවත්, ඔහුගේ බිරිය එහි ජීවත් වෙමින් සිටියදී මෙම අපරාධකරුවන් කණ්ඩායම බෙලරූස් රාජ්යයට ගෙන්වා සිය නිවසේ රඳවාගෙන සිට ඇති බවත් මූලික තොරතුරුවලින් අනාවරණය වී ඇත.
මේ පිරිස අත් අඩංගුවට ගෙන ඇත්තේ ඔවුන් රටින් පිටවීම සඳහා ගුවන්තොටුපලට පැමිණි අවස්ථාවේ දී බවත් මර්වින් ජානකගේ බිරිය අත් අඩංගුවට ගෙන ඇත්තේ මේ පිරිසේ ගුවන් ගමන් බලපත්ර ව්යාජ ඒවා බවට නිරීක්ෂණය වීමෙන් අනතුරුව ඔවුන්ට නවාතැන් දීම සම්බන්ධව ඉදිරි පරීක්ෂණ කටයුතු සඳහා බවත් වාර්තා වී තිබේ.
කෙසේ වෙත්ත අපරාධ පරීක්ෂණ දෙපාර්තමේන්තුව පවසන්නේ යම් සිද්ධියක් වී ඇති නමුත් මේ වනවිටත් ඒ පිළිබඳ නිල වශයෙන් තොරතුරු තහවුරු කර නොමැති බවය.
පාතාලයේ ගෝඩ් ෆාදර් වීම සඳහා අපරාධ පිට අපරාධ කරන කංජිපානි ඉම්රාන් සහ තවත් අපරාධ කල්ලි නායකයෙක්වන අමිල සේපාල රත්නායක හෙවත් රොටුඹෙ අමිල රුසියාවේ දි අත් අඩංගුවට පත්වුන බව පැවසෙන නමුත් ඒ සම්බන්ධව කිසිම නිල තහවුරු කිරීමක් තවමත් නැත. රොටුඹේ අමිල මාකඳුරේ මධුෂ්ගේ සාදයට සහභාගී වී සිටිය දී අත් අඩංගුවට ගත් කණ්ඩායමේ සිට කංජිපානි ඉම්රාන් සමග මෙරටට පිටුවල් කිරීමෙන් අනතුරුව අධි ආක්ෂිත බන්ධනාගාරයක රඳවා සිට ඇප ලැබීමෙන් පසු රටින් පැන්න පුද්ගලයෙකි.
