සමගි ජන සන්ධානය ස්වකීය ප්රතිපත්ති ප්රකාශනය නිකුත් කර තිබේ. එම ප්රතිපත්ති ප්රකාශය අද (29) අස්ගිරි සහ මල්වතු මහානාහිමිවරුන් වෙත සමගි ජන සන්ධානයේ ජනාධිපති අපේක්ෂක සජිත් ප්රේමදාස විසින් පිළිගන්වනු ලැබුවේය.
ජනාධිපති ධූර අපේක්ෂක සජිත් ප්රේමදාසගේ ජනාධිපතිවරණ ප්රතිපත්ති ප්රකාශයේ පෙළගැස්ම ශක්තිමත් ආර්ථිකයක් ගොඩනැංවීම, සෑම පුරවැසියෙකුම බලගැන්වීම, සමස්ථ රාජ්ය සේවයම ප්රතිසංස්කරණය කර රාජ්ය සේවය නංවාලීම, ජීවන තත්ත්වය ආරක්ෂා කිරීම, රාජ්ය ආරක්ෂාව යන කරුණු ඔස්සේ පෙළ ගස්වා තිබේ.
විශේෂත්වය වන්නේ සජිත් ප්රේමදාස විසින් ද රාජ්ය සේවයකයින් වෙත ප්රදානය කිරීමට යෝජනා කරන සහන ප්රමාණය ය.
සමස්ත රාජ්ය සේවයම ප්රතිසංවිධානය කිරීම. රාජ්ය සේවයේ සියලුම බඳවා ගැනීම්, පත්කිරීම් සහ අනුයුක්තකිරීම් කුසලතා පදනම මත ඉටු කිරීම, රාජ්ය අංශයේ මාසික ජීවන වියදම් දීමනාව දැනට ලබාදෙන රු. 17,800 සීමාවේ සිට රු. 25,000ක අවමයක් දක්වා ඉහළ නැන්වීම, රජයේ සේවකයන්ගේ මූලික වැටුප ඉහළ නැංවීම, රාජ්ය සේවය සඳහා අදාළවන අවම මූලික මාසික වැටුප (දැනට ශ්රේණි සඳහා අදාළ අනුපාතයන් මත පදනම්ව) 24%කින් ඉහළ නැන්වීම, රාජ්ය සේවයේ අවම දළ වැටුප රු. 57,500ක් කිරීම, 2016 සිට බඳවා ගත් සියලුම රජයේ සේවකයින්ට විශ්රාම වැටුප් ව්යවස්ථා සංග්රහය අනුව ඔවුන්ගේ විශ්රාම වැටුප් ලබාදීමට යෝජනා කිරීම, දැනට සංවර්ධන නිලධාරීන් ලෙස සේවය කරන නිලධාරීන්ට රැකියා වෙළෙඳපොළ තුළ තරඟකාරීව රැකියා අවස්ථා සොයා ගැනීමට හැකියාව ලැබෙන පරිදි සුදුසු වෘත්තීය පුහුණුවීම් ලබා ගැනීමට රජයේ අනුග්රහය ලබා දීම ඇතුළු රනිල් වික්රමසිංහ පරයා යන සහන ගොන්නක් එම ප්රතිපත්ති ප්රකාශයට ඇතුළත් වේ.
පාස්කු ඉරුදින බෝම්බ ප්රහාරයේ වින්දිතයන්ට යුක්තිය ඉටු කිරීම සඳහා 1948 අංක 17 දරන පරීක්ෂණ කොමිෂන් සභා පනතේ 2 (1) (ඇ) වගන්තිය ප්රකාරව විධිමත් ලෙස බලය පවරන ලද පරීක්ෂණ කොමිෂන් සභාවක් මාස 3ක් තුළ පිහිටුවා එම කොමිෂන් සභාවේ නිර්දේශ මත පදනම්ව පාස්කු ඉරුදින ප්රහාරය සඳහා වගකිව යුතු අපරාධකරුවන්ට එරෙහිව ත්රිපුද්ගල ස්ථීර මහාධිකරණයක් මගින් දිනපතා නඩු විභාග කර දඬුවම් ලබා දීම රජයේ ප්රමුඛ වගකීමක් ලෙස සළකන බව ද එම ප්රතිපත්ති ප්රකාශයේ දැක්වේ.
ජාත්යන්තර මූල්ය අරමුදල සමග ඇති කරගත් ගිවිසුම ප්රකාර රාජ්ය මූල්ය විනය ශක්තිමත් කරමින් ආදායම්, ප්රාථමික ගිණුමේ ශේෂය සහ ණය ආශ්රිත ඉලක්ක සපුරාලීම සඳහා දුෂ්කර නමුත් අවශ්ය ප්රතිසංස්කරණ කටයුතු නොකඩවා සිදු කරන බවද එහි සඳහන්ය.
සැප්තැම්බර් 04 වනදා ප්රතිපත්ති ප්රකාශය ව්යාපාරික ප්රජාව සහ මහජනතාව වෙත නිකුත් කිරීමට නියමිතය.
පහත සඳහන් දිගුවෙන් සජිත් ප්රේමදාස ගේ ජනාධිපතිවරණ ප්රතිපත්ති ප්රකාශනයට පිවිසිය හැකිය.
Download – https://drive.google.com/file/d/1kaFch5UI3zCiV3gLL_Bn7sB5zypups6x/view?usp=drive_link
