ලලිත් චාමින්ද
-
විගණනය හෙළි කරන තවත් දුක හිතන කතාවක්… වැටුප් සහිතව විදේශ අධ්යයනයන්ට ගිය දොස්තරලා 204ක් රටට ඇවිත් නෑ… වැටුප් රහිතව ගොස් විදේශවල“ගල් වුන” දොස්තරලා ගණන 480ක්…
-
මෙම වෛද්ය නිලධාරින් රජයට ගෙවියයුතු ඇප මුදල් හා දඩමුදල් නොගෙවා සිටීමට කළ හැකි හැම දේම කරනවා… විගණනය අනාවරණය කරයි…
විවිධ අරමුණු වෙනුවෙන් විදේශගතවු වෛද්ය නිලධාරින් 705 දෙනෙකුගෙන් ගිවිසුම් කඩකිරිම හේතුවෙන් අයවිය යුතු රුපියල් එකසිය පහළොස් කෝටි, හැටපන් ලක්ෂ,හැට දෙදහස් එකසිය දහනමයක (1,156,562,119) බැදුම්කර මුදල් හා දඩ මුදල් අයකරගැනිමට සෞඛ්ය අමාත්යංශය විසින් කටයුතු කර නොමැති බැව් ජාතික විගණන කාර්යාලය මගින් නිකුත්කොට ඇති නවතම විගණන වාර්තාවක සඳහන් වේ.
මෙකී මුදල් කඩිනමින් අයකර ගැනීම සඳහා සෞඛ්ය අමාත්යංශය විසින් ප්රමාණවත් ක්රියාමාර්ග ගෙන නොතිබු බවද විගණනය මගින් අනාවරණය කොට ඇත.
ඉකුත් වර්ෂයේ (2024) ඔක්තෝබර් මස 31 දින වන විට වැටුප් සහිත විදේශ අධ්යයන නිවාඩු ලබාගෙන විදේශගතවු වෛද්ය නිලධාරින් 204 දෙනෙකුගෙන් අයකර ගැනීමට ඇති බැදුම්කර හා දඩ මුදල රුපියල් හැට නව කෝටි, පනස් දෙලක්ෂ, විසිපන් දහස් දෙසීය නවයකි.
(695,225,209) වැටුප් රහිත නිවාඩු ලබාගත් වෛද්ය නිලධාරින් 480 දෙනෙකුගෙන් අයවිය යුතු මුදල හතලිස් හතර කෝටි, හතලිස් දෙලක්ෂ, අසු අට දහස් දෙසිය හැට අටකි (444,288,268) කි.
වැටුප් සහිත සහ වැටුප් රහිත යන නිවාඩු වර්ග දෙකම ලබාගත් වෛද්ය නිලධාරින් 08 දෙනෙකුගෙන් බැදුම්කර හා දඩ මුදල වශයෙන් රුපියල් හැට දෙලක්ෂ, පනස් තුන් දහස්, නවසිය හතලිස් එකක මුදලක් (6,253,941) අයවීමට ඇති අතර වැටුප් සහිත අධ්යයන නිවාඩු ලබාගත් කාලත්රයා සමග විදේශගත වීම සඳහා වැටුප් රහිත නිවාඩු ලබාගත් වෛද්ය නිලධාරින් 13 දෙනෙකුගෙන් රුපියල් එක්කෝටි හත් ලක්ෂ, අනු හතර දහස් හත්සිය එකක මුදලක් (10,794,701) අයවීමට ඇති බවද විගණන වාර්තාවේ සඳහන් වේ.
වර්තමානයේ සෞඛ්ය ක්ෂේත්රය තුළ පශ්චාත් උපාධි පාඨමාලාවට අදාළ පුහුණුව සඳහා සහ විදේශීය රැකියා මෙන්ම අනෙකුත් හේතුමත විදේශගතවන වෛද්ය නිලධාරින් සේවයෙන් ඉවත්ව යාමේ සේවය අත්හැර යාමේ සැලකිය යුතු වර්ධනයක් දක්නට ඇති බවද විගණන වාර්තාවේ සඳහන් වේ.
මෙම වෛද්ය නිලධාරින් රජයට ගෙවියයුතු ඇප මුදල් හා දඩමුදල් නොගෙවා සිටිමේ ප්රවණතාවයක් දක්නට ඇති බවද විගණනය මගින් අනාවරණය කොට ඇත.
