රටක් ලෙස දැඩි මූල්‍ය අර්බුදයකට ලක් වී මිනිස්සු අන්ත අසරණ වී සිටින අවස්ථාවක, සියලුම රාජ්‍ය ආයතනවල වියදම් සීමා කිරීමේ උපදෙස් සහිත චක්‍රලේඛන රාජ්‍ය පරිපාලන අමාත්‍යාංශ ජනාධිපතිවරයාගේ නියමයෙන් නිකුත් කරමින් තිබෙද්දී ඉතිහාසයේ නොවූ විරූ උත්කර්ෂයකින් මෙවර පොලිස් දිනය සැමරීමේ සූදානමක් පොලිස් දෙපාර්තමේන්තුවෙන් වාර්තා වේ.
අභ්‍යන්තර ආරංචි මාර්ග පවසන්නේ ඔක්තොම්බර් 03 වැනිදාට යෙදෙන 156 වැනි පොලිස් දින සැමරුම සූදානම් කරන්නේ මහජන ආරක්ෂාව පිළිබඳ අමාත්‍යාංශයේ අවශ්‍යතාවය මත පොලිස්පතිවරයාවත් අභිබවා ගිය එක්තරා ජ්‍යෙෂ්ඨ නියෝජ්‍ය පොලිස්පතිවරයෙකුගේ මැදිහත්වීමෙන් බවය. මෙවැනි උත්සවයක අවශ්‍යතාවය පොලිස් දෙපාර්තමේන්තුවට නොමැති බවත් ඔවුන් පෙන්වා දෙන්නේය.
පොලිස් දෙපාර්තමේන්තු ආරංචි මාර්ග පවසන්නේ කෝටි ගණනක් වැය කර මෙම පොලිස් දින නාඩගම නටන්නට යන්නේ පොලිසියේ වාහන අලුත්වැඩියා කරගැනීමට, බැරැක්ක නිසි පරිදි සකසා ගැනීමට, පොලිස් ස්ථානවල තීන්ත ස්වල්පයක් උලා ගැනීමට තබා අපරාධකරුවෙක් හඹා යෑම සඳහා වාහනයකට අවශ්‍ය ඉන්ධන සපයා ගැනීමට නිසි ප්‍රතිපාදන නොමැති වටපිටාවක බවය.
පොලිස් දින සැමරුම සඳහා දැරිය යුතු සියලු වියදම් පොලිස් තෑගි අරමුදලින් ලබාගැනීමට අමාත්‍යාංශය ලබා දුන් නියෝගයක් නිසා පොලිස් දෙපාර්තමේන්තුවේ නිලධාරීන්ද බෙහෙවින්ම කළකිරීමට පත් වී ඇතැයි වාර්තා වේ. පොලිස් අරමුදල ඇත්තේ පොලිසියේ සම්මානිත නිලධාරීන්ට ත්‍යාග පිරිනැමීමට සහ පොලිස් ඔත්තුකරුවන් නඩත්තු කිරීමට බව ද ඔවුහු පවසති.
දැනට වාර්තාවන පරිදි ප්‍රධාන පොලිස් දින උත්සවය කොළඹ කේන්ද්‍ර කරගෙන පැවැත්වෙන අතර දිවයින පුරාම ප්‍රාදේශීය උත්සව පැවැත්වීමට නියමිතව තිබේ.
මෙතෙක් පොලිස් දින ඉතිහාසයේ උත්කර්ෂවත්ම උත්සවය පැවැත්වූයේ 150 වැනි පොලිස් දින සැමරුම වෙනුවෙනි. එවකට පොලිස්පතිවරයා පූජිත් ජයසුන්දරය. එය අභිබවා ගිය උත්සවයක් සංවිධානය කිරීම මෙවර අමාත්‍යාංශයේ ඉලක්කය වී ඇතැයි දැනගන්නට තිබේ.
පොලිස් දෙපාර්තමේන්තු ආරංචි මාර්ග පෙන්වා දෙන්නේ මේ අවස්ථාවේ දී කළ යුත්තේ උත්සව කිරීම නොව, රට වැටී ඇති අන්ත දරිද්‍රතාවය ගැන කල්පනා කර පොලිස් නිලධාරීන්ගේ අවම සුබසාධන මට්ට්මවත් නඩත්තු කරගෙන රටේ නීතිය හා සාමය ආරක්ෂා කිරීමට අවශ්‍ය උත්තේජනය ලබා දීම බවය.
මේ අවස්ථාවේ දී මෙවැනි උත්සව රටට යහපත් ආදර්ශයක් ලබා නොදෙන බවද ඔවුන් පවසන්නේය.
.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
–