මනම්පිටිය නිමල් ජයරත්න –
කොළඹ සිට සීගිරිය නැරඹීමට පැමිණ දඹුල්ල පැල්වෙහෙර ප්රදේශයේ පිහිටි අවහන්හලකින් ආහාර ගැනීමට නැවතුන විදේශීය සංචාරකයෙකුගේ අමතකවී ගිය රුපියල් ලක්ෂ 18 කට අධික දේශීය මුදල් හා විදේශීය මුදල් විශාල ප්රමාණයක් සහිත අත් බෑගය යළිත් ඔහුටම සුරැකිව භාර දීමට එම අවන්හල් හිමියා ඊයේ (22) සවස කටයුතු කර තිබිණි.
සංචාරක ක්ෂේත්රයෙන් ජාතියක් ලෙස නැගී සිටීමට උත්සාහ දරන මෙවැනි මොහොතක රටේ ප්රතිරූපය පිළිබඳව මානුෂික සහතිකයක් ලබා දෙමින් මෙම අවන්හල් හිමියා විසින් සිදුකළ උතුම් ක්රියාව මේ වනවිට ක්ෂේත්රය තුළ ඇගයීමකට ලක් වෙමින් තිබේ. සංචාරකයින්ගේ මුදල් සහිත අත් බෑග් කොල්ල කෑම, සංචාරකයින්ට පහරදීම වැනි නින්දා සහගත අප්රසන්න සිද්ධි මතුවෙමින් තිබෙද්දී මෙම අවන්හල් හිමියා ලබා දුන් ආදර්ශය ජාතික වශයෙන් වැදගත්කමක් ඇති බව ක්ෂේත්රය තුළ අවධාරණය වෙමින් ඇත.
වාර්තාවන පරිදි සිද්ධිය මෙසේය.
ටෙනී මාර්ටින් ස්ටයිම් නම් මෙම ඕස්ට්රේලියානු ජාතිකයා සිය පවුලේ තවත් සාමාජිකයින් තිදෙනෙකු සමගින් දින 12 ක සිය සංචාරයක් සඳහා ශ්රී ලංකාවට පැමිණ තිබිණි. ඔහු පැමිණ තිබුනේ සංචාරය සඳහා තෝරා ගත් වෑන් රථයකිනි.
ඊයේ ( 22 ) දහවල් සීගිරිය නරඹා සිය දහවල් ආහාර ගැනීම සදහා හවස 2.00 ට පමණ ඔහු ඇතුළු කණ්ඩායම දඹුල්ල ,පැල්වෙහෙර ප්රදේශයේ පිහිටි ආරිය රෙස්ට් අවහන්හල වෙත පැමිණ තිබිණි.
දහවල් ආහාරය ලබා ගැනීමෙන් පසු ඔවුන් 22 රාත්රියේ නවාතැන් ගැනීමට නියමිත සීගිරිය ප්රදේශයේ හෝටලය වෙත නැවත පිටත්ව ගොස් තිබේ.
එසේ සිය නවාතැන් පලට පැමිණි අවස්ථාවේ තම මුදල් ඇතුළු වටිනා අත් බෑගය තමන් ලඟ නොමැති බව දැනගත් ටෙනී මාටින් ස්ටයිම් ඒ පිලිබඳව කළබල වී ඔවුන්ට පෙන්වීම සදහා පැමිණි සංචාරක මාර්ගෝපදේශකවරයාට ඒ බව දැනුම් දී ඇත.
ඒ අනුව ක්රියාත්මක වූ එම සංචාරක මාර්ගෝපදේශකවරයා එම විදේශීය සංචාරකයින් පිරිස ආහාර ගනු ලැබූ අවන්හලේ හිමිකරුව දුරකථනයෙන් අමතා එම විදේශිකයා සතුව තිබූ අත් බෑගය නැතිවීම ගැන දැනුම් දී ඇත.
ඒ අවස්ථාවේ දී එම අවන්හලේ හිමිකරු වන කේ.පී.ආරියදාස එය සුරක්ෂිතව තම අවන්හල තුළ තබා ඇති බවත් එය ලබා ගැනීම සඳහා එහි හිමිකරුව කැඳවාගෙන එන ලෙසත් දැනුම් දී ඇත.
ඒ අනුව පැය 04 කට පමණ පසු තමන් ආහාර ගත් අවන්හලේ අමතක වී ගිය මුදල් හා අනෙකුත් උපකරණ ඇතුළත් අත් බෑගය සුරක්ෂිතව තිබෙනු දුටු ටෙනී මාර්ටින් ස්ටයිම් මහත් සතුටට පත් වී තිබිණි.
සියලු දෙනා ඉදිරියේ එම විදේශිකයාට අයත් අත් බෑගය ඔහුගේ අතින් විවෘත කරන ලෙස අවන්හල් හිමි ආරියදාස ඉල්ලා සිටියේය. තම මුදල් සුරක්ෂිතව ඒ ආකාරයෙන් පවතින බව ටෙනී කීවේය. එම මුදල් ගණනය කිරීමට අවශ්ය නොවන බවත් බව ඔහු ප්රකාශ කළේය.
කෙසේ නමුත් ඊට අකැමැතිවූ එම අවන්හල් හිමියා එම විදේශීය සංචාරකයා ඉදිරිපිට ඔහු සතු දේශීය හා විදේශීය මුදල් එකින් එක එම විදේශීය සංචාරකයා ඉදිරියේ ගණන් කර කොලයක ලියා නිවැරදි බවට සනාථ කර තිබිණි.
අත් බෑගය තුල තිබුණු රුපියල් දාසය ලක්ෂ විසිදහසක් වටිනා දේශීය මුදල් හා රුපියල් දෙලක්ෂයකට වැඩි වටිනාකමකින් යුත් ඕස්ට්රේලියානු ඩොලර් 515 ක්ද නැවත ඒ අයුරින්ම ආරියදාස විසින් ටෙනී වෙත භාර දුන්නේය.
වසර 50 ක් ඕස්ට්රේලියාවේ ස්ථීරව පදිංචි වී සිටින මෙම ටෙනී මාර්ටින් ස්ටයිම් මෙරට උපත ලද පුද්ගලයෙකු වීම විශේෂිතය. ඔහු සිය මවුරට දැක බලා ගැනීමට පැමිණි අවස්ථාවේ මෙම අනපේක්ෂිත සිදුවීමට මුහුණ පා ඇත.
මෙම අවන්හලේ සේවකයින්ගේ අවංකභාවයට කෘත ගුණ දැක්වීමක් ලෙසට එම සේවකයින් වෙත ඔහු සතු මුදලින් රුපියල් 50,000 ක මුදලක් බෙදාදීමට මෙම විදේශීය සංචාරකයා පසුව කටයුතු කළේය.
