ශ්රියානි විජේසිංහ –
රජරට විශ්ව විද්යාලීය ආචාර්යවරුන් ආරම්භ කර තිබෙන අඛණ්ඩ වැඩ වර්ජනය හේතුවෙන් විශ්වවිද්යාලය අධ්යයන කටයුතු මුළුමනින්ම නතර වී ඇතැයි රජරට විශ්ව විද්යාල ආචාර්යවරුන්ගේ සංගමය සඳහන් කරයි.
විශ්ව විද්යාලයට ස්ථීර උපකුලපතිවරයෙක් පත්කර ගැනීම අවුලෙන් අවුලට පත්කර ඇති බැවින් එම අවුල විසඳන තෙක් පසුගිය 30 වන දින ආරම්භ කළ වැඩ වර්ජනය අඛණ්ඩව ඉදිරියට ගෙන යන බව සංගමයේ සභාපති මහාචාර්ය නාලක ගීකියනගේ පැවසුවේය.
විශ්වවිද්යාල පාලක සභාව විසින් උපකුලපති තනතුරු සඳහා නම් කර එවන ලද නම් තුන පසෙකලා මාස හතරකට පසුව කිසිම හේතුවක් නොදන්වා අලුතින් නම් තුනක් එවන මෙන් විශ්ව විද්යාල ප්රතිපාදන කොමිෂන් සභාව දැනුම් දී ඇති බව මහාචාර්ය ගීකියනගේ පවසා සිටියි.
විශ්ව විද්යාලයීය පාලක සභාවේ විරෝධයද නොතකා මේ වන විට අලුතින් උපකුලපති තනතුරු සඳහා අයදුම්පත් කැඳවීමට පුවත්පත් දැන්වීමක්ද පළ කර ඇතැයි මහාචාර්යවරයා පවසා සිටියි.
පසුගිය මාස කීපය පුරාම කථානායකවරයාගේ ඇඟිලි ගැසීම් විශ්ව විද්යාල තුළ සිදු වූ බවත් මෙම සිදුවීම් පිටුපස වැඩබලන උපකුලපතිවරයා සිටින බවත් විශ්ව විද්යාල ආචාර්යවරු පෙන්වා දී ඇති බවද පැවසේ.
ජනාධිපතිවරයාව නොමග යවමින් තමන්ගේ දේශපාලන සම්බන්ධතාවන් අයුතු ලෙස යොදා ගනිමින් කෙසේ හෝ උපකුලපති තනතුරට තමන්වම පත්කර ගැනීමේ ඉතා ලැජ්ජා සහගත උත්සහයක වැඩබලන උපකුලපතිවරයා යෙදී සිටින බව ආචාර්යවරුන්ගේ සංගමය සඳහන් කරයි.
මෙම ගැටලුව විසදා ගැනීම සඳහා ජනාධිපතිවරයා සමඟ සාකච්ඡාවක් ඉල්ලා ඇති බවද මහාචාර්ය නාලක පැවසුවේය.
