දිනසේන රතුගමගේ –
යාපනයේ සිට වවුනියාවට පැමිණ තරුණියක් බලහත්කාරයෙන් පැහැර ගෙන යාපනයට රැගෙන යමින් සිටි තරුණයින් හතර දෙනෙකු හා වෑන් රථයක් වවුනියාව පොලීසියේ නිලධාරීන් විසින් ඊයේ ( 29 ) රාත්රී පලෙයි ප්රදේශයේදී අත් අඩංගුවට ගෙන තිබේ.
මෙම තරුණිය පැහැර ගෙන ගොස් ඇත්තේ වවුනියාවේ කොක්වෙලිය අරසඩි පාරේ පිහිටි නිවසකින්ය.
වෑන් රථයෙන් පැමිණි තරුණයින් අතර දෙනා තරුණියව පැහැර ගන්නා අවස්ථාවේදී එය වැළැක්වීමට උත්සාහ කළ ඇගේ මවටද තරුණයින් හතර දෙනා පහර දී ඇයව බලහත්කාරයෙන් වෑන් රථයේ නංවා ගෙන පලා ගොස් තිබේ.
මේ සිද්ධිය සම්බන්ධයෙන් වවුනියාව පොලීසියට දැනුම් දීමෙන් පසුව පොලිස් නිලධාරීන් පිරිසක් වෑන් රථය හඹා ගොස් තරුණිය පැහැර ගෙන යමින් සිටි පිරිස හා වෑන් රථය අත් අඩංගුවට ගෙන ඇත.
ප්රේම සම්බන්ධතාවයක් සම්බන්ධ ගැටලුවක් මත එම තරුණයින් හතර දෙනා තරුණිය පැහැර ගෙන ගිය බවට පොලීසියට තොරතුරු ලැබී ඇති අතර එම තරුණයින් හතර දෙනාගෙන් එක් තරුණයෙකු මෙම තරූණියට මීට කාලයකට පෙර පෙම් කොට ඇතැයිද අනාවාරණය වී තිබේ.
තරුණිය පැහැර ගෙන ඇත්තේ යාපනයේ මනියතෝට්ටම් ඉරණපාලෙයි හා චුන්නාකම් යන පළාත්වල පදිංචි තරුණයින් හතර දෙනෙකු විසින්ය.
තරුණියගෙන් ප්රකාශයක් ලබා ගැනීමෙන් පසුව ඇයව වෛද්ය පරීක්ෂණයක් සදහා රෝහල් ගත කොට ඇති අතර තරුණයින් හතර දෙනා වවුනියාව අධිකරණය වෙත ඉදිරිපත් කිරීමට වවුනියාව පොලීසිය පියවර ගෙන තිබේ.
