ශ්රියානි විජේසිංහ –
ග්රාම සේවා නිලධාරීගේ විරෝධය නොතකා සේවා ව්යවස්ථාව ගැසට් කිරිමට රාජ්ය පරිපාලන අමාත්යංශය බලධාරීන් සහ දේශපාලනඥයින් කටයුතු කිරීම දැඩිලෙස හෙලා දකිමින් එම ගැසට් නිවේදනය වහාම හකුලා ගන්නා ලෙස බල කර ග්රාම නිලධාරි සංගම් හා පරිපාලන ග්රාම නිලධාරි සංගම් ඒකාබද්ධ ව ලබන 12 සහ 13 යන දෙදින තුළ සිය රාජකාරිවලින් ඉවත්වී වැඩ වර්ජනයක නිරත වන බව එම සංගම් සඳහන් කරයි.
මෙම වර්ජනයට අමතරව ” කලු විරෝධතා දිනයන් ” ප්රකාශයට පත් කර ඇත. ඒ අනුව සියලු ග්රාම නිලධාරි කාර්යාල ඉදිරි පිට කලු කොඩි ප්රදර්ශනය කිරීමට කටයුතු කර ඇතැයිද ග්රාම නිලධාරින්ගේ වෘත්තීය සංගම් පවසයි.
ග්රාම නිලධාරින් වර්ජනයේ යෙදෙන ලබන 12 වෙනිදා රාජ්ය පරිපාලන අමාත්යංශය ඉදිරිපිට විරෝධතාවක නිරත වන බවද ඔවුහු පවසති.
මැතිවරණයක් ප්රකාශයට පත් කර තිබියදී මෙවැනි නීති විරෝධී කටයුුතුවල නිරත වීම සම්බන්ධයෙන් මැතිවරණ කොමිසමට පැමිණිල කරන බවද ග්රාම නිලධාරීන්ගේ සංගම් දැනුම් දී සිටියි.
තම සේවා ව්යවස්ථාවට ග්රාම නිලධාරීන් ලබා දුන් සංශෝධනයන් කිසිවක් ඇතුල් නොකර අමාත්යංශ ලේකම්වරුන්ට සහ දේශපාලඥයින්ට අවශ්ය පරිදි සකස් කර ගැසට් කිරිම හෙලාදකින බවත් තමන් දෛනික රාජකාරිවලින් ඉවත්ව වැඩ වර්ජනයක නිරත වුවද මැතිවරණ කටයුතුවළ කිසිදු අඩුවක් නොමැතිව සිදුකරන බවද ඔවුහු පවසා සිටිති.
රටම මැතිවරණයක් ඉල්ලා හඬ නගන මොහොතදී මැතිවරණය කඩා කප්පල් කිරිමට තම සංගම් කිසිවිටකත් කටයුතු නොකරන බවත් මෙවන් අසාධාරණ ක්රියාවන් මැඩලීමට පාලනයේ යම් වෙනසක් සිදුකළ යුතුවඇති බවත් සංගමය අවධාරණය කරයි.
