මහනුවර ලුවී පීරිස් මාවතේ කැපිටල් රිජන්සි හෝටලයේ පිහිනුම් තටාකයේ ගිලී හත් හැවිරිදි පිරිමි ළමයෙකු අද (28) පෙරවරුවේ මරණයට පත්ව තිබෙන බව පොලීසිය පවසයි.
මියගිය දරුවා ගේ 10 හැවිරිදි සහෝදරයා ද දියේ ගිලී තිබෙන අතර ඔහු ප්රතිකාර සඳහා මහනුවර ජාතික රෝහලේ දැඩි සත්කාර ඒකකයට ඇතුළත් කර තිබේ.
පිහිනුම් තටාකය තුළ සහෝදරයා ගිලී සිටිනු දැක ඔහු බේරා ගැනීමට උත්සහ කිිරීමේ දී 10 හැවිරිදි පිරිමි දරුවා දියේ ගිලී තිබෙන බව පොලිස් පරීක්ෂණ මගින් අනාවරණය වී ඇත.
මියගොස් ඇත්තේ මොහොමඩ් මිස්ජාත් නැමැති දරුවෙකි. කුරුඳුගොල්ල වැරැල්ලගම පදිංචි මොවුන් දෙමව්පියන් සමඟ ඊයේ (27) මෙම හෝටලයට පැමිණ ඇත.
දරුවන් දෙදෙනා අද (28) පෙරවරු 11.00 ට පමණ තනිව පිහිනුම් තටාකය අසළ සිටිය දී බාල දරුවා පිහිනුම් තටාකයට වැටී තිබේ. දි
යේ ගිලුණු සහෝදරයා බේරා ගැනීමට යාමේ දී අනෙක් දරුවා ද දියේ ගිලී තිබෙන අතර හෝටල් සේවකයින් හා දෙමව්පියන් එක්ව ඔවුන් ගොඩට ගෙන මහනුවර ජාතික රෝහලට ඇතුළත් කර ඇත.
රෝහල කරා රැගෙන යනවිටත් බාල දරුවා මියගොස් සිට ඇති අතර සිද්ධිය සම්බන්ධයෙන් මහනුවර මූලස්ථාන පොලීසිය පරීක්ෂණ පවත්වයි.
