මේ වනවිට අගමැති ධුරය භාර ගැනීමට විපක්ෂ නායක භාර ගැනීමට ස්ථිර එකඟතාවයක් පල නොකිරීමත් එය භාර ගැනීමට සූදානම්ව සිටින දේශපාලන නායකයින්ට ඒ සඳහා සහයෝගය නොදැක්වීමත් නිසා රට දැවැන්ත දේශපාල අර්බුදයකට තල්ලු වෙමින් තිබේ.
නව අගමැතිවරයෙක් පත් කරගෙන අන්තර්වාර ආණඩුවක් පිහිටුවා ගැනීම සඳහා මහා සංඝරත්නය ප්‍රමුඛ සර්ව ආගමික නායකයින් අද දවස වනවිටත් දැඩි උත්සාහයක නිරතව සිටිය ද මෙතෙක් ඒ සම්බන්ධව එකඟතාවයකට පත් වීමට නොහැකි වී ඇත.
මහින්ද රාජපක්ෂ අගමැතිවරයා ධුරයෙන්ඉවත් වූ පසු අගමැති ධුරය භාරගන්නා ලෙස ජනාධිපතිවරයා විපක්ෂ නායක සජිත් ප්‍රේමදාසට දුරකථන මාර්ගය ඔස්සේ දැනුම් දී තිබිණි.
ජනාධිපතිවරයාගේ එම ආරධානය සම්බන්ධව ද මෙතෙක් පැහැදිලි එකඟතාවයක් නොමැත.
සර්ව ආගමික නායකයින් ප්‍රකාශ කරන පරිදි එතුමන්ලා ඊයේ රාත්‍රියේත් අගමැති ධුරය සඳහා පුද්ගලයෙක් යෝජනා කරගැනීමට සාකච්ඡා කීපයක් පවත්වා තිබේ.
දැනට පත්ව තිබෙන තත්ත්වය අනුව අගමැති ධුරය සඳහා සජිත් ප්‍රේමදාස, කරූ ජයසූරිය, චම්පික රණවක, රනිල් වික්‍රමසිංහ මෙන්ම අනුර කුමාර දිසානායකගේ නම යෝජනා වී ඇත.
අනුර කුමාර දිසානායකගේ නම යෝජනා වී තිබුණ ද ඔහු සහ ඔහුගේ පක්ෂය වත්මන් පාලනය යටතේ අගමැති ධුරය හෝ අන්තර්වාර ආණ්ඩුව පිහිටුවීම ප්‍රතික්ෂේප කර තිබේ.
සෙසු අය ඒ සඳහා සූදානමින් සිටියත් මෙතෙක් සජිත් ප්‍රේමදාස ඒ අයට සහයෝගය පලකිරීම එකඟතාවය පල නොකිරීම විශේෂය .
මේ නම් අතර සජිත් මූලිකත්ව හිමිව ඇත්තේ රටේ ප්‍රධාන විපක්ෂ නායකයා ඔහු නිසාය. ඒ අනුව සමගි ජන බලවේගයේ කෘත්‍යාධිකාරී මණ්ඩලයේ විශේෂ රැස්වීමක් ඊයේ පැවැත්විනි. එහිදී ද කෘත්‍යාධිකාරී මණ්ඩලයේ සියලු දෙනාගේ යෝජනාව වී ඇත්තේ සජිත් අගමැති ධුරය භාරගත යුතු බවය.
එහෙත් සජිත් ප්‍රකාශ කර ඇත්තේ “ ඔයාලා කියන විදිහට බාර ගන්න පුලුවන්. එහෙම බාරගෙන අද මේ තියන ප්‍රශ්නවලට පිළිතුරු දෙන්න පුලුවන් ද?. ඉන්ධන, ගෑස් , බෙහෙත් ප්‍රශ්නවලට විසඳුම් දෙන්න පුලුවන් ද?. එහෙම විසඳුම් දෙන්න බැරිවුනොත් මටත් වෙන්නෙ මහින්දට වුන දේම තමයි. ජනතාව අපටත් විරුද්ධව උද්ඝෝෂණය කරාවි. මාසයකින් ජනතා අපේක්ෂා ඉටු කරන්න බැරිනම් ජනතාව අපට විරුද්ධව දිගින් දිගටම අරගල කරාවි.“
සජිත්ගේ එම ප්‍රකාශයෙන් පසු රට තුළ උද්ගතව ඇති තත්ත්වය පිළිබඳව දීර්ඝ වශයෙන් සාකච්ඡා කර ඇත.
අගමැති ධුරය ප්‍රමුඛ ආණ්ඩුව භාර ගන්නවා නම් ශ්‍රී ලංකා නිතිඥ සංගමයේ යෝජනා අනුව විධායක ජනාධිපති ක්‍රමය අහෝසි කිරීම, 19 වැනි ව්‍යවස්ථා සංශෝධනය වහාම බලගැන්වීම වැනි තීරණාත්මක කරුණු ඉටු විය යුතු බව එහිදී සාකච්ඡා වී තිබේ.
සජිත් ප්‍රේමදාස අගමැති ධුරය භාර නොගැනීම නිසා සමගි ජන බලවේගයට දේශපාලනික වශයෙන් අවාසියක් සිදුවිය හැකි බව කෘත්‍යාධිකාරී මණ්ඩල රැස්වීමේ දී පෙන්වා දී ඇත්තේ වෙනත් අයෙක් අගමැති ධුරය භාරගෙන ආණ්ඩුව පිහිටුවා උද්ගව ඇති ප්‍රශ්නවලට විසඳුම් දී රට ඉදිරියට ගෙන ගියොත් ඔහුව ජනතාව පිළිගනු ඇති බවය.
කෙසේ නමුත් අගමැති ධුරය සඳහා ඉදිරිපත් වී ඇති අනෙකුත් නම් අතරින් අයෙක් පත් කරගැනීම සඳහා සහාය දීමට සජිත් ප්‍රේමදාස මෙතෙක් එකඟතාවය පල කර නැත.
රනිල් කරූ චම්පික යන අය අගමැති ධුරය භාරගෙන අන්තර්වාර ආණ්ඩුවක් පිහිටුවීමට කැමැත්තෙන් හිටියත් ප්‍රධාන විපක්ෂය ඒ සඳහා එකඟතාවය පල නොකිරීම නිසා ඔවුන්ට සහයෝගය දක්වන අනෙකුත් පාර්ශවයන් ද අර්බුදයකට මුහුණ පා ඇත.
මේ සම්බන්ධව ඔවුන් අතර සාකච්ඡා අද දිනයේ ද පැවැත්වෙනු ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
කෙසේ වෙතත් දැනට තිබෙන තත්ත්වය හා ඉදිරි පියවර සම්බන්ධව විපක්ෂ නායක සජිත් ප්‍රේමදාස සහ ජනාධිපති ගෝඨාභය රාජපක්ෂ අතර විශේෂ සාකච්ඡාවක් අද රාත්‍රියේ පැවැත්වෙනු ඇති බව සමගි ජන බලවේගයේ ප්‍රකාශකයෙක් ලංකාසරට පැවසීය.