මනම්පිටිය නිමල් ජයරත්න –
අධික වර්ෂාව නිසා රජය මගින් ලබාදෙන නැනෝ නයිට්‍රජන් පොහොර දිය වී ගියහොත් ඊට රජයෙන් මැදිහත් වී පොහොර වරක් නොව තුන් වරක් වුව ද ලබාදීමට අමාත්‍ය ශෂීන්ද්‍ර රාජපක්ෂ තමා සමඟ කරන දුරකථන සංවාදයක දී පොරොන්දු වූ බවද පළාත් සභා හා පාලන කටයුතු රාජ්‍ය අමාත්‍ය රොෂාන් රණසිංහ සඳහන් කළේය.
මිනිසාට හානිකරන අවම මට්ටමේ තිබෙන පොහොර ආනයනය කිරීමට රජය අවසර ලබාදුන් බවත් ,පවතින තත්ත්වය මත වෙනත් රසායනික පොහොර මෙරටට ආනයනය කිරීමට කාලයක් නොමැති බවත් රාජ්‍ය ඇමතිවරයා මෙහිදී පැවසීය.
පොලොන්නරුව දිස්ත්‍රික් ලේකම් කාර්යාලයේදී අද (28) සවස, පොළොන්නරු දිස්ත්‍රික්කයේ ගොවි සංවිධාන නියෝජිතයන් සමග සාකච්ඡාවකට එක් වූ එක්වෙමින් රාජ්‍ය අමාත්‍ය රොෂාන් රණසිංහ ඒ බව සඳහන් කළේය.
රජය එකවර ගොවියා කාබනික පොහොර වැඩපිළිවෙළකට රැගෙන නොගිය බව රාජ්‍ය අමාත්‍යවරයා කීවේය.
රසායනික පොහොර ඉවත්කර ගොවියා කාබනික පොහොර සඳහා යොමු කිරීමට තීරණය කළේ මීට වසර තිහකට එපිට රට පාලනය කෙරූ එක්සත් ජාතික පක්ෂ රජයැයි කී ඇමතිවරයා එම වැඩපිළිවෙළ රට තුළ ක්‍රියාත්මක කිරීමට නිලධාරීන් සහ මහජනතාව දැනුවත් කිරීමට රුපියල් කෝටි ප්‍රකෝටි ගණනින් වියදම් කර ඇති බව ද කීවේය., ලෝක බැංකුව හරහා ව්‍යාපෘති අනන්ත අප්‍රමාණ ගෙනවිත් ඇති බවත් පැවසුවේය.
මෙහිදී පැමිණි සිටි ගොවි නියෝජිතයින්ගෙන් සීයට අසූවකටත් වැඩි පිරිසක් කියා සිටියේ තමන් කාබනික පොහොර ක්‍රමයට කැමති බවත් එය එකවර කළ නොහැකි ක්‍රියාවක් බවත්, හැකිනම් මෙවර කන්නයට සියට පනහක් වත් රසායනක පොහොර ලබා දීමට ජනාධිපතිවරයාගේ අවධානය යොමු කරවන ලෙසය.
ජනාධිපතිවරයාගේ කාබනික පොහොර වැඩපිළිවෙළ පිළිබඳ බිම් මට්ටමේ ගොවීන් දැනුවත් නොකළ බවට ගොවි නියෝජිතයින් කිහිප දෙනෙක් මෙහිදී කෘෂිකර්ම හා ගොවිජන, මහවැලි, නිලධාරීන්ට චෝදනා කළේය..
ඊට පිළිතුරු දුන් රාජ්‍ය අමාත්‍ය රොෂාන් රණසිංහ සඳහන් කළේ ජනාධිපති වරයාගේ කාබනික පොහොර වැඩපිළිවෙළ බිම් මට්ටමට රැගෙන නොගිය රාජ්‍ය නිලධාරින් පිළිබඳ සොයා බලා අවශ්‍ය පියවර ගන්නා බවය.
කාබනික පොහොර යටතේ වී වගා කරන ගොවීන්ට යම් පාඩුවක් සිදු වුවහොත් ඊට අයවැයෙන් මුදල් වෙන් නොකළ ද අවශ්‍ය වුවහොත් පරිපූරක ඇස්තමේන්තුවක් මගින් මුදල් වෙන් කරගෙන අවශ්‍ය වන්දි ලබාදීමට රජය පියවර ගන්නා බවද රාජ්‍ය අමාත්‍ය රොෂාන් රණසිංහ මෙහිදී සඳහන් කළේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මෙම අවස්ථාවට පොලොන්නරු දිස්ත්‍රික් ලේකම් ඩබ්ලිව්. ඒ. ධර්මසිරි, පොළොන්නරු දිස්ත්‍රික් කෘෂිකර්ම අධ්‍යක්ෂ ආර්. පී. උපාලි ය සහ වාරිමාර්ග, මහවැලි ,ගොවිජන සේවා ආයතන වල උසස් උසස් නිලධාරීන් , සහ මහජන නියෝජිතයෝ විශාල පිරිසක් එක්ව සිටියහ.