මනම්පිටිය නිමල් ජයරත්න –
පොළොන්නරුව පූජා භූමිය වටා මධ්යම සංස්කෘතික අරමුදල විසින් ඉදිකර ඇති යකඩ වැටෙහි සිරවීමෙන් පොළොන්නරුව අභයභූමියේ ජීවත් වූ මුවන් දෙදෙනෙක් අද ( 15 ) අලුයම මියගොස් ඇති බව පොළොන්නරුව වනජීවී නිලධාරී කාර්යාලය පවසයි,
මේ දිනවල පවතින අධික වියළි කාළගුණික තත්වය හමූවේ පොලොන්නරුව පූජා භූමියේ පිහිටි රක්ෂිතය තුළ ආහාර හා ජලය හිඟවීම මත එහි වෙසෙන මුවන් දෙදෙනෙකු මෙලෙස එම වැට හරහා ගමන් කිරීමට උත්සාහ කිරීමේදී යකඩ වැටේ සිරවීමෙන් අවාසනාවන්ත ලෙසට මියගොස් ඇත.
ප්රදේශයේ පවතින වියළි කාළගුණික තත්වය හමුවෙ ආහාර හා ජලය සොයා මුව රංචු විශාල වශයෙන් දිනපතා පරාක්රම සමූද්රයට ගොස් ජලය පානය කිරීමට පුරුදුවී සිටින අතර මෙම පූජා භූමිය හරහා ගමන් කිරීමේදී මෙලෙස එම මුවන් අවස්ථා ගණනාවකදී එම යකඩ වැටේ සිරවීමෙන් අනතුරට ලක්ව තිබෙන බව පොළොන්නරුව වනජීවී කාර්යාලයේ නිලධාරියෙකු අප කළ විමසීමකදී පැවසීය.
පොළොන්නරුව පූජා භූමියේ නිදැල්ලේ හැසිරෙන ඇතැම් සුනකයින්ගෙන් බේරීම සදහා රක්ෂිතයේ සැරිසරන මුවන් දිව යාමේදීද මෙම වැටේ සිරවී මියගොස් ඇති බව වාර්තාවේ.
එලෙස මෙම වැටෙහි සිරවී මියයන මුවන් එම සුනඛයන් විසින් ආහාරයට ගැනීමටද පුරුදුවී සිටිති.
