මනම්පිටිය නිමල් ජයරත්න –
දින දෙකක කාලයක් තිස්සේ පොළොන්නරුව ඇතුළු මහවැලි බී කලාපයට ඇදහැලෙන ධාරානිපාත වර්ෂාව හේතුවෙන් මෙවර මහ කන්නයේ වගා කරන ලද වී අස්වනු නෙළා ගැනීමට යළිත් වරක් බාධා ඇති වී තිබේ.
ඇතැම් ගොවීන් නෙලාගත් වී අස්වනු වර්ෂාවට හසුවීමෙන් වී කිලෝවක මිලද පහළ දැමීමට පොළොන්නරුව මහා පරිමාණ වී මෝල් ව්යාපාරිකයින් කටයුතු කරමින් සිටියි.
ගත වූ දින දෙකක කාලය තුළ මහපාරේ වේලීමට දැමූ වී අස්වනු විශාල වශයෙන් වර්ෂාවට හසුව ඇති අතර වැලිකන්ද, අරලගංවිල, මනම්පිටිය, දිඹුලාගල, ඇතුළු අවට ප්රදේශවල ගොවීහු මේ හේතුවෙන් දැඩි අසීරුතාවයට පත්ව සිටිති.
කෙසේ වෙතත් රජයේ සහතික වී මිල අභිබවා පොළොන්නරුවේ පෞද්ගලික වී මෝල් හිමිකරුවන් වේලපු සහ අමු වී සැලකිය යුතු මට්ටමේ මිලකට ලබාගන්නා බවද ගොවී සංවිධාන පෙන්වා දෙයි.
අද (26) වනවිට පොළොන්නරුවේ මහා පරිමාණ වී සහ සහල් ව්යාපාරිකයන් තිදෙනකු තරගකාරි ලෙස අමු නාඩු වී කිලෝවක් රුපියල් 115 කටත්, වේලන ලද නාඩු වී කිලෝවක් රුපියල් 125 කටත් සම්බා වී කිලෝවක් රුපියල් 130 කටත් ලබාගනිමින් සිටියි.
වර්ෂාව නොමැති වූයේ නම් මීට වඩා වැඩි මිලකට වී කිලෝවක් අලෙවි කර ගත හැකි බවට ගොවීහු විශ්වාසය පලකරති.
පොළොන්නරුව මහවැලි බි කලාපයේ මෙවර මහ කන්නයේ ගොවි පවුල් 25,000 කට ආසන්න පිරිසක් කුඹුරු අක්කර
65,000 කට ආසන්න සංඛ්යාවක වී වගා කර ඇත.
ඉන් සියයට තිහක, හතළිහක, ප්රමාණයේ වී අස්වනු නෙලා අවසන් බවද ගොවි සංවිධාන කියති.
ඉතිරි සීයට හැට, හැත්තෑව වී අස්වනු නෙළා ගැනීමට වර්ෂාව මහත් බාධාවක් වී තිබේ. වී කරල් වර්ෂාවට හසු වීමත් සමඟ ඒවා බිමට පතිත වීම හේතුවෙන් එම වී අස්වනු යන්ත්ර සූත්රවලින් නෙලීමේ අසීරුතාවය ද නිර්මාණය වී ඇත.
