කුප්රකට අපරාධකරුවෙකු වන කෙහෙල්බද්දර පද්මේ අත් අඩංගුවට ගැනීම සඳහා දියත් කළ රහසිගත විදේශ මෙහෙයුම පිළිබඳව ඔත්තුව පොලිසිය විසින්ම පාතාල අපරාධකරුවන් වෙත ලබා දී ඇතිබවට වූ කම්පන සහගත හෙළිදරව් කිරීම්වලින් පසුව, පාතාල සාමාජිකයින්ට සංවේදී තොරතුරු කාන්දු කළ බවට සැක කෙරෙන තක්කඩි නිලධාරීන් සොයා පොලිස්පති අනිණින් පොලිසිය දැඩි විමර්ශනයක් ආරම්භ කර ඇතැයි වාර්තා වේ.
සහකාර පොලිස් අධිකාරී රොහාන් ඔලුගලගේ ඉන්දුනීසියාවට කළ රහසිගත මෙහෙයුම ඔහුගේ සංචාරක සැලසුම් පිළිබඳ තොරතුරු දේශීය යම් පොලිස් නිලධාරියෙක් හෝ කණ්ඩායමක් හරහා කාන්දු වූ බවත් මෙය දැවැන්ත පාවාදීමක් බවත් පොලිසිය පවසයි.
වැටලීමට පෙර පද්මේ, කමාන්ඩෝ සලින්ත සහ කුඩු නිලංග ඔවුන් සැඟවී සිටි හෝටලයෙන් පලා යන්නේ පොලිසියේ අභ්යන්තරයෙන්ම ලබා දුන් මෙම තොරතුර නිසා බව අනාවරණය වී ඇත්තේ එම අපරාධකරුවන්ගෙන් ප්රශ්න කිරීමේ දී ය. .
පද්මේ අත්අඩංගුවට ගැනීමේදී, ඔහුගේ ජංගම දුරකථනයේ තිබී ඉන්ටර්පෝල් රතු වරෙන්තුවේ ඡායාරූපයක් ද විමර්ශන නිලධාරීන් විසින් සොයාගෙන ඇත. අතිශය රහසිගත අභ්යන්තර තොරතුරු මෙම අපරාධකරුවන්ට ලැබෙන බවට එය සාක්ෂියක් වී ඇති ආකාරය ද පොලිස් විමර්ශන අංශ පෙන්වා දෙයි.
ඔලුගල සහ මහින්ද ජයසුන්දර යන නිලධාරීන් කෙහෙල්බද්දර පද්මේ අත් අඩංගුවට ගැනීමට පැමිණෙන බවට ඔත්තුව ලැබී ඇත්තේ දරුන් නම් අපරාධකරුවෙකුට බවත්, ඔහු හරහා මෙම මෙහෙයුම සම්බන්ධව තොරතුරු තහවුරු කර ගැනීමට සමත් වූ බවත් දැනට ප්රශ්න කරමින් සිටින අපරාධකරුවන් විසින් අනාවරණය කර තිබේ.
ඇතැම් ස්ථාන හෝ කොට්ඨාශවලට අනුයුක්තව සිටින සමහර නිලධාරීන් පාතාල කණ්ඩායම් සමඟ දිගුකාලීන සබඳතා ගොඩනඟා ගෙන ඇති බවත්, සැලසුම් කළ වැටලීම් පිළිබඳව එම නිලධාරීන් විසින් පාතාල අපරාධකරුවන්ට දැනුම් දී ඇති බවත් මේ වනවිට හෙළි වී තිබේ. මේ තත්ත්වය පාලනය කිරීම සඳහා පොලිස්පති ප්රියන්ත වීරසූරිය නිලධාරීන් එක් පොලිස් කොට්ඨාසයක වැඩි කාලයක් ස්ථානගත නොකර නිරන්තර මාරු කිරීම් සඳහා නියෝග කර ඇති ඇත.
පොලිස් මත්ද්රව්ය කාර්යාංශය වැනි විශේෂ ඒකකවල ට අදාලව මෙම නීතිය දැඩි ලෙස ක්රියාත්මක කිරීමට නියමිතව ඇතැයි වාර්තා වේ.
2025 ජනවාරි මාසයේ සිට විවිධ වැරදි සම්බන්ධයෙන් පොලිස් නිලධාරීන් 300 කට වැඩි පිරිසකගේ වැඩ තහනම් කර තිබේ.
