අරගල භූමියයේ නිරායුධ අරගලකරුවන්ට නින්දා සහගත ලෙස පහර එල්ල කළේ පොලිසිය හෝ රටේ නීත්‍යානුකූල ත්‍රිවිධ හමුදාව නොව, බීමත්ව සිටි දේශපාලන කුලී මැර පිරිසක් බවත් එහි වගකීම පොලිසිය හා ත්‍රිවිධ හමුදාව භාර ගැනීම අරගලභූමිය මවිතයට පත් කර ඇති බවත් නීතිඥ මනෝජ් නානායක්කාර පැවසීය.
ගෝඨාගෝගම අරගල භූමියේ සිට අද (23) පැවති මාධ්‍ය සාකච්ඡාවකදී ඔහු හෙළි කළේ මෙ ප්‍රහාරය එල්ල කිරීම පසුපස රටේ නිල හමුදාවෙන් එහා ගිය කුලී මැරයින් පිරිසක් සිටි බව තමන් ප්‍රකාශ කළේ පෙරේදා මධ්‍යම රාත්‍රියේ දී බවය.
අරගලකරුවන්ට පහර දෙන සෑම අවස්ථාවකදීම පොලිසිය එම පහරදීම් වළක්වා ගැනීමට මැදිහත් වුන ආකාරය තමන් දුටුවේ යැයි ද, ත්‍රිවිධ හමුදාව හෝ විශේෂ කාර්ය බලකාය එම පහර දෙන කණ්ඩායම අතර නොසිටියේ යැයි ද නීතිඥ මනෝජ් නානායක්කාර කීවේය. මෙම ප්‍රහාරය දියත් කිරීම සඳහා ආරක්ෂක අංශයේ ඉහලම නිලධාරියෙකුගේ අනුදැනුම ද සහිතව පාවෙන අවි ගබඩාවක් මෙහෙයවන ජඩ ව්‍යාපාරිකයෙකුගේ කුලී කරුවන් හමුදා නිල ඇඳුම්වලට සමාන ඇඳුම් සහිතව යොදවා තිබුණු බවත් ඔහු හෙළි කළේය.
ඔහු මෙසේ ද පැවසුවේය.
“පොලිසියට සිද්ධවෙලා තියනවා කවුරුත් කරපු පවකට කර ගහන්න. අපි පෙරේදා මධ්‍යම රාත්‍රියේදි අපි පැහැදිලිව කිව්වා නිල හමුදාවන්ට එහා ගිය කුලී හමුදාවක් ඒ පහර දීම පිටිපස්සෙ ඉන්නවා කියලා. අපි කිව්වා පොලිසිය සහ ත්‍රිවිධ හමුදාව ඒ වගේ ම්ලේච්ඡ අමානුෂික තුච්ඡ ජරා ප්‍රහාරයක් එල්ල කරයි කියලා අපි විශ්වාස කරන්නෙ නෑ කියලා.“
අද දවසේ පොලිසිය ඒකෙ වගකීම බාර අරගෙන තියනවා. එදා රාත්‍රියෙ එල්ල කළ ප්‍රහාරහ කළේ පොලිසිය විශේෂ කාර්ය බලකාය සහ ත්‍රිවිධ හමුදාව කියලා.
නමුත් අපි දැක්කෙ නෑ ඒ ප්‍රහාරය එල්ල කළ අවස්ථාවෙ නාවික හමුදාව සම්බන්ධ වෙලා ඉන්නවා. අපි දැක්කෙ නෑ පොලිසියෙ නිලධාරීන් අරගලකරුවන්ට ප්‍රහාරයක් දෙන්න ඉදිරිපත් වන අයුරු. ආරක්ෂක අංශවලට සමාන ඇඳුම් ඇඳලා හිටිය කුලී හමුදාව ඒ අරගල කරුවන්ව බිම දාගෙන පහර දෙනකොට අපි දැක්කා ඇතැම් පොලිසි නිලධාරීන් ඒ අරගලකරුවන්ව ප්‍රහාරයෙන් බේරගන්න ප්‍රයත්නයක් දරනවා.“
“අරගල භූමියට හරි පුදුමයි පොලිසිය අහක යන දෙයක් ඇයි තමන්ගෙ කරපිටට ගන්න ලෑස්ති වුනේ කියලා.“
එදා මැයි 09 දා දේශපාලන ත්‍රස්තවාදීන් එල්ල කළ ප්‍රහාරය හා සමාන ප්‍රහාරයක් තමයි පෙරේදා මධ්‍යම රාත්‍රියෙ එල්ල වුනේ. වෙනස තමයි නිරායුධ අරගලකරුවන්ට ගහන්න මෙතෙන්ට දාපු කුලී හමුදාවට පලිහක් විදිහට රජය ඉතාම අමන සහ ජරා විදිහට මේ රටේ ජනාදරයට පාත්‍ර වෙච්ච ත්‍රිවිධ හමුදාව පාවිච්චි කිරීම.“
මේ සම්බන්ධව ප්‍රකාශයක් කරමින් පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ පවසන්නේ සිකුරාදා අළුයම ගාලූ මුවදොර අරගලකරුවන්ට පහර දීමට පැමිණි පිරිස අතර හමුදා නිල ඇඳුම්ලාගත් වෙනත් පිරිසක් සිටි බවට යුද හමුදාවේ අභ්‍යන්තර තොරතුරු ඔස්සෙ දැනගැනීමට ලැබී ඇති බවත් යුද හමුදාවට සමාන ඇඳුමින් අරගල භූමියට පැමිණ පහර දුන් එම කණ්ඩායම කව්දැයි හෙළිකර ගැනීමට ජාත්‍යන්තර පරික්ෂණයක් සඳහා එක්සත් ජාතීන් හමුවට යන බවත්ය.
ඔහු පවසන්නේ සිකුරාදා පාන්දර ප්‍රහාරය සදහා ගුවන් හමුදාව පැමිණ නැති බවය. මේ කුලී හේවායන් ඇවන්ගාර්ඩ් සමාගමට සම්බන්ධ දැයි සැකයක් පවතින බවත් ඔහු පවසා තිබිණි. මේ සම්බන්ධ හමුදාවෙන් සහ ජාත්‍යාන්තරයෙන් පරීක්ෂණයක් ඉල්ලා සිටින බව ද ඔහු කියා ඇත.
එම සම්පූර්ණ මාධය සාකච්ඡාව පහත දැක්වේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
