මැල්සිරිපුර නා උයන ආරණ්ය සේනාසනයේදී අනතුරකට ලක්වීමෙන් අපවත් වී වදාළ හිමිවරුන් පස් නමකගේ දේහ පිළිබඳ භූමදාන පූජෝත්සවය අද (27) සවස 4ට මැල්සිරිපුර පන්සියගම සුසාන භූමියේදී සිදු කිරීමට නියමිතව ඇත.
පූජ්ය රුසියාවේ ධම්මරක්ඛිත හිමි, පූජ්ය නුගේගොඩ විපස්සි හිමි, පූජ්ය මල්වානේගම සමිද්ධි හිමි, පූජ්ය නාවලපිටියේ උත්තරානන්ද හිමි සහ පූජ්ය උඩවලවේ සන්තසුමන හිමි යන භික්ෂූන් වහන්සේ ගේ අවසන් කටයුතු අද පස්වරුවේ සිදු කෙරෙනු ඇත.
අපවත් වී වදාළ පූජ්ය රුමේනියාවේ ධම්මරන්සි හිමිගේ සහ පූජ්ය ඉන්දියාවේ ධම්මගවේෂි හිමිගේ දේහ එම හිමිවරුගේ ඥාතීන්ගේ ඉල්ලීම මත මහ කොමසාරිස් කාර්යාලවල සම්බන්ධීකරණයෙන් එම රටවල් වෙත වැඩම කරවීමට නියමිතව ඇත.
රුසියාවේ ධම්මරක්ඛිත හිමිගේ අවසන් කටයුතු මෙරටදී සිදුකිරීමට උන්වහන්සේගේ පාර්ශ්වයෙන් කැමැත්ත පළකිරීමත් සමග එම දේහය ඊයේ රාත්රියේ යළි ආරණ්ය සේනාසනය වෙත වැඩම කෙරුණි
භික්ෂූන් වහන්සේට අවසන් ගෞරව දැක්වීම සඳහා මහා සංඝරත්නය, සැදැහැවතුන් ඇතුළු විශාල පිරිසක් ආරණ්ය සේනාසනය වෙත පැමිණ සිටින බව අද දෙරණ වාර්තා කරයි.
මැල්සිරිපුර නා උයන ආරණ්ය සේනාසනයේ ගමන් පහසුව සඳහා යොදාගත් ඩක්කුවක් කඩාවැටී හිමිවරු 07 නමක් පසුගිය 24 වැනිදා අපවත් වූහ.
