මහනුවර බදි උද්දීන් මහමුද් බාලිකා විදුහලේ විදුහල්පති ධූරයේ වැඩ ආවරණය කිරීමට තාවකාලිව පත්කර සිටි තැනැත්තිය එම තනතුරින් ඉවත් වී අධ්යාපන අමාත්යාංශයෙන් පත්කළ නව විදුහල්පතිනියට වැඩ භාර නොදීම හේතුවෙන් එම විද්යාලය තුළ දැඩි අර්බුදකාරී තත්ත්වයක් මතුව ඇත.
වත්මන් විදුහල්පතිනිය වෙනුවට විදුහල්පති ධූරයේ වැඩ ආවරණය කිරීම සඳහා නියෝජ්ය විදුහල්පතිවරියක් අධ්යාපන අමාත්යාංශය මගින් පත්කර තිබුණේ පසුගිය ජූලි මස 04 වැනිදා ය.
එහෙත් එම තනතුරේ තාවකාලික වැඩ ආවාරණය සඳහා පත්කර සටි තැනැත්තිය අධ්යාපන අමාත්යාංශයේ ලේකම්වරියගේ දැනුම් දීමට අවනත නොවී කටයුතු කිරීම සම්බන්ධයෙන් වැඩ ආවරණය කිරීම සඳහා අලුතින් පත්කළ නියෝජ්ය විදුහල්පතිවරිය මහනුවර පොලීසියට පැමිණිල්ලක් කර තිබේ.
අනතුරුව සිද්ධිය සම්බන්ධයෙන් සොයා බැලීමට මධ්යම පළාත් අධ්යාපන අධ්යක්ෂ අමරිසිරි පියදාස ඇතුළු කණ්ඩායමක් පසුගිය 31 දින විදුහලට පැමිණ නව පත්වීම ලද විදුහල්පතිනියට වැඩභාර දී පෙර සේවා ස්ථානය වන කටුගස්තොට කලාප අධ්යාපනය කාර්යාලයට වාර්තා කරන ලෙස තාවකාලිකව පත් කළ තැනැත්තියට දැනුම් දී තිබේ.
ඒ සම්බන්ධයෙන් ලොග් සටහනක් ද යෙදීමට අධ්යාපන අධ්යක්ෂවරයා කටයුතු කර තිබිය දී ඇය තව දුරටත් තනතුරේ රැඳී සිටින බවත්. අධ්යාපන අමාත්යාංශයේ ලේකම්වරියගේ ලිඛිත දැනුම් දීමට අවනත නොවී තවදුරටත් විදුහල්පති ධූරයේ කටයුතු කළහොත් ඇයගේ වැටුප් නතර කිරීමට පියවර ගන්නා බවත් අධ්යාපන අමාත්යාංශය දැනුම් දී ඇත.
කෙසේ වෙතත් තාවකාලිකව විදුහල්පති ධූරයේ වැඩ ආවරණය කිරීම සඳහා පත් කල තැනැත්තිය පවසන්නේ තමන්ට අධ්යාපන අමාත්යාංශය පත්වීම ලබාදුන්නේ ස්ථිර විදුහල්පතිවරයෙකු පත්කරන තෙක් වැඩ ආවරණය කිරීම සඳහා යන කොන්දේසිය මත බවත් අධ්යාපන අමාත්යාංශය මේ වනවිට ස්ථිර පත්වීමක් නොකර විදුහල්පති ධූරයේ වැඩ ආවරණය කිරීමට යළිත් වතාවක් තවත් කෙනෙකු එවා ඇති බැවින් එවැනි තැනැත්තියකට වැඩ භාර දිම ගැටලුවක් බවය.
