වෘත්තීය ජීවිතය පුරාම තාක්ෂණ සමාගම්වල සේවය කළ මා, රකුටෙන් වයිබර් සමාගමේ සේවයට එකතුවන්නේ ඉකුත් වසරේ සැප්තැම්බර් මාසයේදී ය. එතැන් පටන් මේ දක්වා වයිබර් සමඟ ගෙවෙන කාලය, අත්දැකීම් අතිශය නැවුම් ය. තාක්ෂණ සමාගම් යනු බොහෝවිට පිරිමි ආධිපත්‍යයට හසුවූ කාන්තාවන්ට කිසිදු පිළිගැනීමක් නොමැති ස්ථාන බව බොහෝ දෙනාගේ හැඟීමයි. එහෙත් වයිබර් සමාගම තුළ එය වෙනස් ය. අප සමාගමේ සේවය කරන කාන්තාවන්ට නැඟී සිටීමට අවශ්‍ය ශක්තිය සමාගම තුළින්ම පිරිනමා තිබීම ඊට හේතුවයි. සමාගම වෙත කාන්තා සාමාජිකාවන් සාදරයෙන් පිළිගනු ලබනවා පමණක් නොව, ඔවුන්ට ආයතනයේ නායකත්ව තනතුරු හෙබවීමට පවා අවකාශ උදා කර දී තිබේ.
පසුගිය වසර කිහිපය තුළ කැපීපෙනෙන සාධනීය තත්ත්වයක් ළඟා කරගත්ත ද, තාක්ෂණ ලෝකය තුළ, විශේෂයෙන්ම ආසියානු තාක්ෂණ සමාගම් ක්ෂේත්‍රය තුළ කාන්තාවන් යා යුතු දුර තව බොහෝ ය. බොස්ටන් කන්සල්ටින් සමූහය (BCG) සහ සිංගප්පූරුවේ ඉන්ෆොකොම් මාධ්‍ය සංවර්ධන අධිකාරිය (IMDA) එක්ව සිදුකළ අධ්‍යයනයකදී පෙනී ගියේ අග්නි දිග ආසියාවේ තාක්ෂණික ක්ෂේත්‍රය තුළ කාන්තා සේවා නියුක්තිය 32%ක් වන බව ය. ඇත්තෙන්ම එය ගෝලීය ප්‍රතිශතය වන 28%ට වඩා ඉහළ අගයකි. එහෙත් කලාපය තුළ වෙනත් රැකියා ක්ෂේත්‍ර හා සැසඳීමේදී තාක්ෂණ ක්ෂේත්‍රය තුළ කාන්තා සේවා නියුක්තිය තවමත් පවතින්නේ පසුගාමී තත්ත්වයක ය.
අමිහිරි යථාර්ථය එයයි. එබැවින් තාක්ෂණ ලෝකය තුළ ස්ත්‍රී පුරුෂ සමානාත්මතාව ඇති කිරීම සඳහා ක්ෂේත්‍රයේ රැඳී සිටින පුරුෂයින් සතු වගකීම ද අති මහත් ය. මන්ද යත් එය කාන්තාවන්ගේ ගැටලුවක් නොව මානව හිමිකම් පිළිබඳ ගැටලුවකි. එමෙන්ම නවීන ලෝකය තුළ අපගේ ආයතන සාර්ථකව ඉදිරියට ගෙනයාමට අපට ගත හැකි ඉතාමත්ම නුවණැති ක්‍රියාවක් ලෙස ද කාන්තා සේවා නියුක්තිය ඉහළ දැමීම පෙන්වා දිය හැක.
තාක්ෂණ සමාගම් තුළ මූල්‍ය අංශයේ ප්‍රගතිය සඳහා කාන්තාවන්ට සුවිශේෂී දායකත්වයක් ලබාදිය හැකි බව විවිධ අධ්‍යයන මගින් හෙළි වී තිබේ. උදාහරණයක් ලෙස අවම තරමින් කාන්තාවන් තිදෙනෙකු නායකත්ව තනතුරු හොබවන ලොව හොඳම සමාගම් 500ක්, තම ආයෝජන ප්‍රතිලාභවල 66%ක වර්ධනයක් අත්කරගෙන ඇති බව ෆෝබ්ස් සඟරාව ප්‍රකාශ කරයි.
මෙසේ මූල්‍ය කාර්යසාධනය මගින් අත් කරගත හැකි සාර්ථකත්වය, තාක්ෂණ සමාගම්වල පැවැත්මට නැතුවම බැරි සාධකයක් වන නවෝත්පාදනය වෙනුවෙන් යොමු කළ හැක. කාන්තාවන් සහ පුරුෂයින් ලෝකය දෙස දකින්නේත්, විග්‍රහ කරන්නේත් එකම ආකාරයකට නොවේ. ඔවුන්ගේ අදහස් සහ මතිමතාන්තර වෙනස් ය. එමනිසා තීරණ ගැනීමේදී විවිධ අදහස්වලට කන්දීමේ හැකියාව ද එමගින් සමාගම්වලට හිමි වේ. ඒ අනුව බලන කල යම් ව්‍යාපාර නායකයෙකු තම ආයතනය තුළ කාන්තා නියෝජනය අඩු කිරීමට තීරණය කරන්නේ ද එය ව්‍යාපාරමය වශයෙන් ගනු ලබන ඉතාමත් අමනෝඥ තීරණයක් වනු නිසැක ය.
අප සමාගමේ කාන්තා කාර්යමණ්ඩල සාමාජිකාවන් රැසක් සමඟ සේවය කරන පුද්ගලයෙකු ලෙස මට විශ්වාසයෙන් කිව හැක්කේ, ඔවුහු දිනපතාම නිර්මාණශීලීත්වයක් සහ ජවයක් අප කණ්ඩායමට ගෙනෙන බව ය. එමෙන්ම කාන්තාවන් සමඟ කටයුතු කිරීම නිසා වයිබර්හි සේවය කරන අපට ක්ෂණිකව ගැටලු විසඳා ගැනීමටත්, අපැහැදිලිතා මඟහරවා ගැනීමටත් අවස්ථාව උදා වී තිබේ. එනම් ඕනෑම ගැටලුවක් පිළිබඳව විවිධ පැතිකඩ ඔස්සේ විමසීමට හැකියාව උදාවන බැවින් එම අභියෝග සාර්ථකව ජයගත හැක.
තාක්ෂණ ක්ෂේත්‍රයට විවිධ අදහස්, නියෝජනයන් ගෙන ඒමට අපට කොතෙක් අවශ්‍යතාව තිබුණ ද, අප ඉදිරියේ ඇති බාධක එමට ය. එවැනි එක් ප්‍රධාන බාධකයක් වන්නේ අධ්‍යාපනය යි. BCG සහ IMDA සිදුකළ ඉහත කී අධ්‍යයනය මගින් පෙනීගොස් ඇති තවත් කරුණක් වන්නේ, අග්නි දිග ආසියානු කලාපය තුළ තාක්ෂණ විෂය හදාරන කාන්තාවන්ගේ ප්‍රමාණය 39%ක් බව ය. සෙසු විෂය ධාරා හදාරන ප්‍රමාණය 56%ක් ලෙස එම වාර්තාවේ දැක්වේ.
තව ද තාක්ෂණ හෝ ඒ ආශ්‍රිත විෂය ධාරාවන් කෙරෙහි ශිෂ්‍යාවන් දක්වන කැමැත්ත අල්ප බව ද එම අධ්‍යයනය මගින් පෙනී ගොස් තිබේ. ඊට ප්‍රධාන හේතුවක් වී ඇත්තේ, තාක්ෂණ ක්ෂේත්‍රය පිරිමින්ගේ ආධිපත්‍යයට නතුවූ වෘත්තීය ක්ෂේත්‍රයක් ලෙස පාසල් හරහා ඔවුන්ගේ මනසට කාවැදී තිබීම ය. එපමණක් නොව, තාක්ෂණ ක්ෂේත්‍රය තුළ ජනප්‍රිය සහ ආදර්ශයට ගත හැකි කාන්තා චරිතවල අඩුපාඩුවක් ද පවතී. එම නිසා තාක්ෂණ ක්ෂේත්‍රයේ රැකියාවකට පිවිසීමට කාන්තාවන් තීරණය කළ ද, එම වෘත්තීය ගමන් මඟ තුළ මුහුණ පෑමට සිදුවන දුෂ්කරතා බහුල වන අතර, ඔවුන්ට ඉදිරියට යෑමට ඇත්තේ ද සීමිත අවකාශයක් පමණි.
එවන් පසුබිමක තාක්ෂණ ලෝකය තුළ කටයුතු කරන පුරුෂ පාර්ශ්වය සතුව ඇත්තේ විශාල වගකීමකි. මේ එළඹ ඇත්තේ, ස්ත්‍රී පුරුෂ බැඳියාවන් පසෙකලා කාන්තාවන් සමඟ එකට සිටගත යුතු කාලය යි. කාන්තාවන්ට නිසි තැනක් ලබාදෙන රැකියා පරිසරයක් බිහිකිරීමට අපගේ දායකත්වය ද බෙහෙවින් වැදගත් ය. එවැනි වාතාවරණයක් මත කාන්තාවන් ළඟා කරගන්නා සාර්ථකත්වය තුළින් අනාගතයේදී තව තවත් කාන්තාවන් තාක්ෂණ අංශයේ රැකියාවන් ස්ව කැමැත්තෙන්ම තෝරාගනු නිසැක ය. මෙසේ කාන්තාවන්ට සාර්ථක වීම සඳහා වැඩි අවස්ථාවක් සැලසීම යනු, අපගේ ආයතනවලට මෙන්ම පොදුවේ තාක්ෂණ ක්ෂේත්‍රයටත්, අභියෝගාත්මක ගැටලු ජයගැනීම සඳහා වැඩි අවස්ථාවක් උදා කරලීමකි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
(ඩේවිඩ් සේ මහතා රකුටෙන් වයිබර් සමාගමේ ආසියානු පැසිෆික් කලාපයේ ජ්‍යෙෂ්ඨ අධ්‍යක්ෂවරයෙකි)