මනම්පිටිය නිමල් ජයරත්න –
-
දෙදින මෙහෙයුමෙන් පොලොන්නරුවේ සියලු සහල් තොගවල දත්ත රැස් කර ඉවරයි!
පොළොන්නරුවේ ප්රධාන පෙලේ සහල් මෝල් හා සුළු හා මධ්ය පරිමාණ සහල් මෝල්වල පවතින සහල් හා වී තොගයන්හි සංචිතයන් මෙන්ම සහල් නිෂ්පාදන ක්රියාවලිය පරීක්ෂා කිරීම පොළොන්නරුව දිස්ත්රික් පාරිභෝගික නිලධාරීහු ආරම්භ කළහ.
පාරිභෝගික සේවා අධිකාරියේ සභාපතිවරයාගේ හා අධ්යක්ෂ ජනරාල් වරයාගේ උපදෙස් පරිදි පොළොන්නරුව දිස්ත්රික්කයේ ප්රධාන පෙළේ සහල් මෝල්වල පවතින සහල් හා වී තොගයන්හි සංචිතයන් හා සහල් නිෂ්පාදන ක්රියාවලිය පිලිබඳව සොයා බැලීම සඳහා පොළොන්නරුව දිස්ත්රීක් පාරිභෝගික සේවා අධිකාරී කාර්යාලයේ නිලධාරීහු එම වී මෝල් විශේෂ පරීක්ෂා කිරීම, වී මෝල්වල මේ වනවිට පවතින වී, සහල් තොග කොපමණද යන්න පිලිබඳව දත්ත එක් රැස්කිරීම දෙවන දිනටත් අද 27 සිදු කළහ.
ඊයේ (26 ) පරීක්ෂා කිරීමට නොහැකිවූ ප්රධාන පෙළේ වී මෝල් හා සුළු හා මධ්යම පරිමාණ වී මෝල් පරීක්ෂා කිරීම අද 27
සිදුකරනු ලැබුණි.
මෙහිදී පොළොන්නරුව දිස්ත්රික්කයට අයත් මහා පරිමාණ වී තොග රැස් කරන හා සහල් නිෂ්පාදනය කරනු ලබන පොළොන්නරුව ඇතුමල්පිටිය ප්රදේශයේ පවත්වාගෙන යන ඩඩ්ලි සිරිසේනට අයත් අරලිය සහල් ආයතනයට 27 වෙනිදා පාරිභෝගික සේවා අධිකාරි නිලධාරීහු පැමිණියහ.
මෙහිදී අරලිය සහල් නිෂ්පාදන ආයතනයේ වර්තමානයේ පවතින වී, සහ සහල් තොග පරීක්ෂාවට ලක්කර එම සහල් හා වී තොගවල දත්ත රැස්කර ගැනීම මෙම නිලධාරින් විසින් සිදුකළේය.
අරලිය සහල් ආයතනයේ කළමනාකරණ අධ්යක්ෂ ලාල් සිරිසේන හා එහි විධායක අධ්යක්ෂ සම්පත් රත්නායක පවසා සිටියේ මධ්ය පරිමාණ වී මෝල් හිමියන්වන තමන්ට සහල් නිෂ්පාදන පිරිවැය සදහා විශාල මුදලක් වැයවන බැවින් රජයේ පාලන මිළට සහල් අලෙවි කිරීමෙන් පාඩු සිදුවන බවය.
කෙසේ නමුදු තමන් රජයේ පාලන මිළට නාඩු ,සම්බා, හා කීරි සම්බා සහල් තම තොග පවතින තුරු අඛණ්ඩව ලබාදෙන බවද ඔවුන් වැඩිදුරටත් පවසා සිටියේය.
නාඩු සහල් කිලෝ ලක්ෂ 01 ක් ද , කීරී සම්බා සහල් කිලෝ ලක්ෂ 02ක් හා සම්බා සහල් කිලෝ ලක්ෂ 01 දෛනිකව තම ආයතනය වෙළෙඳපළට නිකුත් කරන අතර ඉදිරි දින 75 ක් සඳහා වෙලඳපොල වෙත සහල් නිකුත් කිරීමට අවශ්ය වී තොග තම ආයතනය සතු බව අරලිය සහල් ව්යාපාරයේ විධායක අධ්යක්ෂ සම්පත් රත්නායක පැවසුවේය.
මේ අතර පොළොන්නරුව දිස්ත්රීක්කයේ සුළු හා මධ්ය පරිමාණ සහල් නිෂ්පාදනය කරනු ලබන පොළොන්නරුව සේවාගම ප්රදේශයේ පවත්වාගෙන යන හිරු සහල් මෝල, කදුරුවෙල නගරයේ පවත්වාගෙන යන වී හේන සහල් මෝල, මින්නේරිය සී.පී.පුර ප්රදේශයේ පවත්වාගෙන යන මේනක සහල් මෝල හා ලත් සහල් මෝල යන සහල් මෝල්වල මේ වනවිට පවතින සහල් හා වී සංචිතයන් හා සහල් නිෂ්පාදන ක්රියාවලිය පිළිබඳවද පොළොන්නරුව දිස්ත්රික් පාරිභෝගික සේවා නිලධාරීන්ගේ විශේෂ නිරීක්ෂණයට ලක් විය.
එම මෝල් හිමියන් පාරිභෝගික නිලධාරීන් වෙත පවසා සිටියේ තමන්ට සහල් අලෙවියේදී පාඩු සිදු වුවද ඒවා පිලිබඳව නොසලකා පාරිභෝගිකයින් වෙත සහල් පාලන මිළට ලබාදීමට රජය කටයුතු කරන බවය.
කෙසේ නමුදු තමන් ළඟ මේ වනවිට පවතින වී තොග ප්රමාණවත් වන්නේ මේ වසරේ දෙසැම්බර් මස දක්වා පමණක් බවද වී මෝල් හිමියෝ වැඩිදුරටත් පවසා සිටියහ.
දින දෙකක් පුරා පොළොන්නරුව දිස්ත්රික් පාරිභෝගික සේවා නිලධාරීන් විසින් පොළොන්නරුව දිස්ත්රික්කයේ පවත්වාගෙන යන මහා පරිමාණ සුළු හා මධ්ය පරිමාණ වී මෝල් සතුව තිබෙන වී හා සහල් පිලිබඳ දත්ත හා තොරතුරු රැස්කරනු ලැබූ අතර එම තොරතුරු සියල්ල කොළඹ පාරිභෝගික සේවා අධිකාරී කාර්යාලය වෙත ලබාදීමට කටයුතු කිරීමට නියමිතය.
