අසේල කුරුළුවංශ –
ජත්යන්තර කාන්තා දිනයට සමගාමීව හිසකෙස් දන්දීමේ උප පාරමිතා පිංකමක් ඊයේ (08) අකුරණ දීගල මානාගල විහාරස්ථානයේදී පැවැත්විණි.
මෙහිදී පාසල් සිසුවියන්ද ඇතුළු 400 ක පමණ කාන්තාවන් පිරිසක් පිළිකා රෝගී ප්රතිකාර සහ වෙනත් රෝගාබාධ හේතුවෙන් හිසකෙස් අහිමිවූ කාන්තාවන්ට විග් සෑදීම සඳහා හිසකෙස් පරිත්යාග කිරීමට එක්ව සිටියහ.
මානාගල විහාරස්ථානයේ විහාරාධිපති ආචාර්ය පරණගම ඤාණවිමල නාහිමියන්ගේ අනුශාසනා පරිදි නැණ පහන පදනම මගින් මෙම වැඩසටහන සංවිධානය කර තිබිණි.
වයස අවුරුදු 12 සිට 80 දක්වා වූ පිරිසක් මෙම වැඩසටහනට එක්ව සිටියහ. ඇතැම් පවුල්වල මව හා දිණියද හිසකෙස් පරිත්යාග කිරීමට පැමිණ සිටීම විශේෂත්වයකි.
ගම්පොළ, සීගිරිය ප්රදේශ ගණනාවකින් සිංහල, දෙමළ හා මුස්ලිස් භේදයකින් තොරව කාන්තාවන් හිස කෙස් දන්දීමට පැමිණි බව මෙහිදී පරණගම ඤාණවිමල හිමියෝ කීහ.
ජත්යන්තර කාන්තා දිනය අර්ථවත් කරමින් පීඩා විඳින තවත් සිතක් සැනසීම සඳහා තම කේශ කල්යාණය පරිත්යාග කිරීමට එක්වූ කන්තාවන්ට නිරෝගී සම්පත උදාවේවා යැයිද මෙහිදී පරණගම ඤාණවිමල නාහිමියෝ ප්රාර්ථනයක් කළහ.
බුද්ධ දර්ශනය අනුව ශරීර අවයව දන්දීම උප පාරමිතාවක් ලෙස සඳහන් වන බවත් කාන්තාවක් සතු පංච කල්යානයෙන් ප්රධාන වන කේශ කල්යානය ඔවුන් ඉතාම ආදරයෙන් රැක බලා ගන්නා බවත් කී උවහන්සේ එය දන්දීම සඳහා පෙළඹීම කරුණාව, මෛත්රිය පුරුදු පුහුණු කළ කෙනෙකුට හැර වෙනත් අයෙකුට කළ නොහැකි බවද අවධාරණය කළේය.
පිළිකා ප්රතිකාර සඳහා ලබාදෙන ඖෂධ භාවිතයෙන් හිසකෙස් අහිමිවූ කාන්තාවන් විශාල පිරිසක් රටේ සිටින බවත් ඔවුන් සඳහා කිසිදු මුදලක් අය නොකර විග් ලබාදීමට නැණ පහන පදනම කටයුතු කරන බවත් එහි සභාපති ලක්මාල් ගජනානයක මහතා පැවසුවේය.
