ජනාධිපති අනුර කුමාර දිසානායක ගේ ජයග්රහණය වෙනුවෙන් ඇමෙරිකානු එක්සත් ජනපද ජනාධිපති ජෝ බයිඩන් විසින් එවූ සුබපැතුම් පණිවිඩය ද සහිතව ඇමරිකානු තානාපතිනිය ජූලී චුං අද (08) පෙරවරුවේ ජනාධිපති ලේකම් ආචාර්ය නන්දික සනත් කුමානායක හමුවී තිබේ.
එක්සත් ජනපදය සහ ශ්රී ලංකාව අතර පවතින දීර්ඝකාලීන සබඳතා සිහිපත් කරමින් සමස්ත ඇමෙරිකානු ජනතාව වෙනුවෙන් ජනාධිපති අනුර කුමාර දිසානායක වෙත සුබපැතුම් එක් කළ ජෝ බයිඩන් ශ්රී ලංකාවේ ප්රජාතන්ත්රවදය තවදුරටත් තහවුරු කරමින් පසුගිය ජනාධිපතිවරණය සහ පශ්චාත් ජනාධිපතිවරණ සමය ඉතා සාමකාමී අන්දමින් පවත්වා ගැනීම පිළිබඳව ද සිය ප්රසාදය ද පළ කර ඇත.
ඇමෙරිකානු ජනාධිපති බයිඩන් මහතා සිය සුබ පැතුම් පණිවිඩයෙහි මෙසේ සඳහන් කර තිබේ. “මෙම මැතිවරණය ශ්රී ලංකාවේ ප්රජාතන්ත්රවාදී ආයතනවල ශක්තිය සහ ප්රජාතන්ත්රවාදයේ පදනම වන සාමකාමී නිදහස් හා සාධාරණ මැතිවරණයක් තුළින් ඔවුන්ගේ අනාගතය හැඩගස්වා ගැනීම සඳහා ජනතාව තුළ වන කැපවීම ඉස්මතු කෙරේ.“
සියලුම ශ්රී ලාංකික පුරවැසියන් සඳහා ස්ථාවරත්වය, සෞභාග්යය සහ ප්රගතිය අත්පත් කර දීම සඳහා ඇමෙරිකා එක්සත් ජනපදය සහ ශ්රී ලංකාව අතර සහයෝගීතාව වර්ධනය කර ගැනීමේ වැදගත්කම ද ජනාධිපති ජෝ බයිඩන් අවධාරණය කර ඇත.
සියලුම ශ්රී ලාංකික පුරවැසියන් සඳහා ස්ථාවරත්වය, සෞභාග්යය සහ ප්රගතිය අත්පත් කර දීම දෙරට අතර සහයෝගීතාවයේ වැදගත්කම පිළිබඳව ද එක්සත් ජනපද ජනාධිපතිවරයා අවධාරණය කර තිබේ. ප්රධාන ක්ෂේත්ර කිහිපයක සහයෝගීතාව ඉස්මතු කරමින් ජනාධිපති අනුර කුමාර දිසානායකගේ නායකත්වය යටතේ ද්විපාර්ශ්වික සබඳතා ශක්තිමත් කිරීම පිළිබඳව ජනාධිපති බයිඩන් විසින් සුභවාදී අදහස් පළ කර තිබේ.
ආර්ථික වර්ධනය, කලාපීය ආරක්ෂාව සහ ප්රජාතන්ත්රවාදී පාලනය යන ක්ෂේත්ර ඔස්සේ දෙරට අතර සහයෝගීතාව වර්ධනය කර ගැනීම උදෙසා ජනාධිපති අනුර කුමාර දිසානායක සමඟ කටයුතු කිරීමට අපේක්ෂා කරන බවත්, ශ්රී ලංකාවේ සියලුම පුරවැසියන් සඳහා ස්ථාවර, සෞභාග්යවත් සහ වඩා සාධාරණ රටක් පිළිබඳ වන දැක්ම සාක්ෂාත් කර ගැනීමට එක්සත් ජනපදයේ සහාය ලබා දෙන බවත් ඇමෙරිකානු ජනාධිපති ජෝ බයිඩන් යොමු කළ සුබපැතුම් පණිවිඩයේ වැඩිදුරටත් සඳහන් වේ.
පණිවිඩය රැගෙන පැමිණි ඇමරිකානු තානාපතිනිය ජනාධිපති ලේකම්වරයාට දන්වා ඇත්තේ ශ්රී ලංකාවේ ආර්ථිකය නැංවීම සඳහා ජාත්යන්තර මූල්ය අරමුදල, එක්සත් ජනපද ජාත්යන්තර සංවර්ධන ඒජන්සිය (USAID) මඟින් ලබාදිය හැකි මූල්ය සහයෝග ලබාදීමට සූදානම් බවය.
වංචා දූෂණ අක්රමිකතා වැළැක්වීම සඳහා ජනාධිපති අනුර කුමාර දිසානායක මහතා ගෙනයන වැඩපිළිවෙලට මූල්ය සහ තාක්ෂණික දායකත්වය ලබාදීමටද ඇමරිකානු එක්සත් ජනපදය සහතික වන බව තානාපතිනිය දන්වා ඇත.
පුනර්ජනනීය බල ශක්තිය, අපනයන කෘෂි කාර්මාන්තයක් ඇති කිරීම හා ග්රාමීය දිළිඳුකම තුරන් කිරීම සඳහා නව ජනාධිපතිවරයා ගෙන යන වැඩපිළිවලටද සහයෝගය දක්වන බවත් දැනට ක්රියාත්මක වන ග්රාමීය පාසල් සඳහා දිවා ආහාරය ලබාදීමේ වැඩසටහන නාගරික පාසල් වලටද ඉදිරියේදී ලබාදීම සඳහා සහයෝගය දැක්වීමට කටයුතු කරන බවත් ඇමෙරිකානු තානාපති ජූලි චුන්ග් වැඩිදුරටත් සහතික වී තිබේ.
ශ්රී ලංකාවේ ආරක්ෂාව සුරක්ෂිත කිරීම සඳහා අවශ්ය ඕනෑම අවස්ථාවක සහයෝගය ලබාදීමටත් එක්සත් ජනපදය මෙහිදී එකඟාව පළ කර ඇත.
