ඒ ජයග්රහණය ඉතිහාසගතය. ශ්රි ලංකා කණ්ඩායමට ලකුණු 174ක දැවැන්ත ජයග්රහණයකි. මෙතෙක් ශ්රි ලංකාව ඔස්ට්රේලියාව පරදවා ලබා ගත් ඉහළම ජගහ්රණය මෙයය. ලකුණු 281ක ඉලක්කයක් හඹා ගිය ඔස්ට්රේලියානු කණ්ඩායම පන්දු ඕවර 24.2ක දී ලකුණු 107කට දැවී ගියහ.
අසිත ප්රනාන්දු අතීත චමින්ද වාස්ගේ භූමිකාව මේ තරගාවලියේ පැවති තරග දෙකේදීම ප්රකට කළේය. අද තරගයේත් අසිත මුල් කඩුළු 03 දවා ගත්තේ ඔස්ට්රේලියානු මුල් පෙල අන්ද මන්ද කරමිනි. ඔහු කඩුළු 03 දවා ගත්තේ පන්දු ඕවර 04ක් පමණක් යවමිනි.
අනතුරුව දඟපන්දු යවන්නෝ සිය වගකීම භාරගත්හ. දුනිත් වෙල්ලාගේ විශිෂ්ට පන්දු යැවීමකය. ඔහු කඩුළු 04ක් දවා ගත්තේය. ඉන් කඩුලු 03ක්ම ලබා ගන්නේ කඩුල්ලේ ඉනි කුඩු කරමිනි.
වනිඳු යළිත් සිය රිද්මයට පැමිණියේය. ගිය තරගයෙදීත් හොඳම ගුටි කෑ වනිඳු ලකුණු 23කට කඩුළු 03ක් ලබා ගත්තේය.
ශ්රී ලංකා ඉනිම
කොළඹ ආර් ප්රේමදාස ක්රීඩාංගනයේ දිවා තරගයක් ලෙස පැවැත්වෙන දෙවැනි එක් දින තරගයේ ශ්රී ලංකා ඉනිම අවසානය. කාසියේ වාසිය දිනාගෙන පන්දුවට පහරදීමට තීන්දු කළ පසු ශ්රී ලංකා පිතිකරුවෝ ස්වකීය වගකීම කදිමට ඉටු කළහ.
ලකුණු 281ක් ලබා ගන්නේ කඩුළු 04ක් පමණක් දැවී යන විටය. ඒ ලකුණු 281ට කුසල් මෙන්ඩිස්ගේ මනරම් ශතකයක් අන්තර්ගත විය. නිශාන් මධුෂ්ක ලබා ගත් ලකුණු 51ක්, චරිත් අසලංක ලබා ගත් වේගවත් ලකුණු 78ක් සහිත අර්ධ ශතක දෙකකින් ඉනිම ස්ථාවර වූයේය. ජනිත් ලියනගේ පන්දු 21ක් තුළ ලැබූ ලකුණු 32කි .
ඔස්ට්රේලියානු කණ්ඩායමේ පන්දු යැවීම මෙන්ම පිටියේ පන්දු රැකීමට ද අර්බුදයක තිබුණු ආකාරය දුටුවෙමු. චරිත් අසලංකගේ ගිලිහී ගිය උඩ පන්දුවක් ලකුණු හයේ පහරක් බවට පත්වූයේය. පන්දුව වෙත දිව ඒමේ ප්රමාදයන් නිසා උඩපන්දු ගිලිහී ගියේය.
කුසල් මෙන්ඩිස් පන්දු 115ක් තුළ ලබා ගත් ලකුණු 101ක් ලබන්නේය. ඔහු නිශාන් මධුෂ්ක සමග එක්ව ඉනිම ස්ථාවර කරන්නේ ආරම්භක පිතිකරු පැතුම් නිශ්ශංක ලකුණු 06කට සහ කමිඳු මෙන්ඩිස් ලකුණු 04කට බිඳ වැටෙන අවකාශය තුළය. නිශාන් මධුෂ්ක සහ කුසල් මෙන්ඩිස් අතර දෙවැනි කඩුල්ල වෙනුවෙන් ලකුණු 98ක සම්බන්ධතාවයක් ගොඩනැගිනි. කමිඳු මෙන්ඩිස් ලකුණු 4කට දැවී යෑමත් සමග චරිත් අසලංක සහ කුසල් මෙන්ඩිස් අතර ලකුණු 94ක සම්බන්ධතාවයක් ඇති විය. කුසල් මෙන්ඩිස් දැවී යන්නේ 45 වැනි පන්දු ඕවරයේ පළමු පන්දුවේදී ය.
එතැන් සිට පන්දු 35ක් තුළ දී චරිත් අසලංක සහ ජනිත් ලියනගේ ඔස්ට්රේලියානු පන්දු යවන්නනට එල්ල කළ ප්රහාරය බිහිසුණු එකක් විය. ඔවුහු අවසන් පන්දු 35 තුළ ලකුණු 66ක් රැස් කළහ.
බෙන් ඩ්රොව්ෂයිස්, ආරොන් හාර්ඩි, ෂේන් ඇබොට් සහ ඇඩම් සම්පා කඩුල්ල බැගින් ලබා ගත්හ.
ඔස්ට්රේලියානු ඉනිම
ඉනිමේ බලාපොරොත්තු සුන් කරන්නේ අසිත ප්රනාන්දුගේ විශිෂ්ට ආරම්භක පන්දු යැවීමය. මේ ආකාරයේ රිද්මයක් අප මින් පෙර දකින්නේ චමින්ද වාස්ගෙනි. අසිත ආරම්භක පන්දුවේ සිට එල්ල කරන පීඩනය ඔස්ට්රේලියානු ඉදිරිපෙළ අන්දමන්ද කළේය. මැතිව් ෂෝට්, ට්රැවිස් හෙඩ් සහ ජේක් ෆ්රෙසර් මැක්ගර්ක් අසිත ප්රනාන්දු හමුවේ බිඳ වැටෙන්නේ මුළු ලකුණු සංඛ්යාව ලකුණු 33ක දී ය.
ඉන් අනතුරුව නායක ස්ටීවන් ස්මිත් සහ ජොෂ් ඉන්ග්ලිෂ් අතර යම් ලකුණු ප්රමාණයක් සහිත සබඳතාවයක් ගොඩ නැගෙන අයුරු පෙනුනි. දෙදෙනා අතර ලකුණු 46ක සබඳතාවයක් ගොඩනැගුනි. එහෙත් දුනිත් වෙල්ලාලගේ ජොෂ් ඉන්ග්ලිෂ්ගේ කඩුල්ල කඩු ක 15 වැනි ඕවරයේ 5 වැනි පන්දුවේදී කුඩු කර දමන්නේය. ඒ අවස්ථාවේ දී ජොෂ් ඉන්ග්ලිෂ් පන්දු 27ක් තුළ ලකුණු 22ක් ලබාගෙන සිටියේය. මුළු ලකුණු සංඛ්යාව ඒ වනවිට ලකුණු 79කි.
ඉන් අනතුරුව අප දකින්නේ එකා පිට එකා වැටී ඔස්ට්රේලියාව නන්නත්තාරවන ආකාරය ය. වනිඳු ආරොන් හාඩිගේ කඩුල්ල ලබා ගන්නවිට මුළු ලකුණු සංඛ්යාව 80කි. ලකුණු 83 දී වෙල්ලාලගේ ග්ලෙන් මැක්ස්වෙල්ගේ කඩුල්ල කඩු කරන්නේය. ඒ හය වැනි කඩුල්ල ලෙසය. හත් වැනි කඩුල්ලත් ලකුණු 83දී ය. දැවී යන්නේ ස්ටීවන් ස්මිත්ය. ඒ හසරංගගේ පන්දුවක් හමුවේ කඩුල්ල මුවා කිරීමෙනි.
සේන් ඇබොට් ලකුණු 86 දී අටවන කඩුල්ල ලෙසත්, බෙන් ද්වාර්ෂුස් ලකුණු 94 දී නවවන කඩුල්ල ලෙසත් දැවී යන්නේය. අවසන් කඩුල්ල දවා ගන්නේ වෙල්ලාලගේ ය. ඇඩම් සම්පා ලකුණු 8ක් ලබා සිටිය දී වෙල්ලාලගේ එවූ පන්දුවක් මැද ඉන්නේ වැදෙන්නේය. ලකුණු 107කට ඔස්ට්රේලියානු ඉනිම නිමය.
ඉතිහාසය
මෙතෙක් ශ්රී ලංකාව සහ ඔස්ට්රේලියාව අතර එක් දින ජාත්යාන්තර තරග 105ක් පැවැත්වී තිබේ. ඉන් 64ක් ජයගෙන ඇත්තේ ඔස්ට්රේලියාවය. ශ්රී ලංකාව ජයග්රහණය කර ඇත්තේ තරග 37ක් පමණි. විසඳීමකින් තොරව තරග 4ක් නිමා වී තිබුණේය.
1975න් ආරම්භවන ශ්රි ලංකා ඔස්ට්රේලියා එක්දින තරග වංශ කතාවේ දැවැන්තම ජයග්රහණය වාර්තා කරන්නේ අදය. ටෙස්ට් තරගාවලිය උතුර දකුණ නැතිව ගුටි කා ඉතිහාසගත විදිහට පරාද වී සිටි අප ප්රතිප්රහාරය එක් දින තරගාවලියේ දී ඔස්ට්රේලියාවට ලබා දි ඇත.
අප තරගාවලිය දිනුම්ය. තරගාවලියේ වීරයාත් ප්රකාශ වී ඇත්තේය. තරගාවලියේ වීරයා ශ්රී ලංකා නායක චරිත් අසලංකය. තරගයේ වීරයා ලකුණු 101ක් ලබා ගත් කුසල් මෙන්ඩිස්ය.
