ජොන්සටන් ප්රනාන්දු විසින් භාවිතා කළ ආන්දෝලනාත්මක බීඑම්ඩබ්ලියු රථයේ චැසි අංකය ලබා දී ජාත්යාන්තර පොලිසිය හරහා මෙතෙක් කළ විමර්ශනවලදී හෙළි වී ඇති පරිදි එම චැසි අංකය සහිත වාහනය එංගලන්තයේ දී සොරකම් කරනු ලැබ කිසියම් අපරාධමය වරදක් සදහා යොදා ගත් වාහනයක් බව අනාවරණය වී ඇතැයි මේ වනතෙක් සිදුකරන ලද විමර්ශන තොරතුරු සම්පින්ඩනය කරමින් අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබේ.
එවැනි චැසි අංක සහිත වාහනයක් ලංකාවට රැගෙන ආවේ කෙසේද යන්න පිළිබඳවත් එම වාහනය ගෙන්වා එකලස් කරනු ලැබුවේ කවුරුන්ද යන්න පිළිබඳවත් කරුණු අනාවරණය කරගැනීම සඳහා තවදුරටත් විමර්ශනසිදුකරන බව අපරාධ පරීක්ෂණ දෙපාර්තමේන්තව අධිකරණයට කරුණු දැක්වා ඇත.
ඊයේ මාධ්ය ඉදිරියේ මෙම වාහනය පිළිබඳව කරුණු දැක්වූ පොලිස් මාධ්ය ප්රකාශක නියෝජ්ය පොලිස්පති නීතිඥ නිහාල් තල්දූව ප්රකාශ කරනු ලැබුවේ මෙම වාහනය සම්බන්ධයෙන් ජාත්යාන්තර පොලිසියෙ විවෘතව ඇති වෙබ් අඩවියේ තොරතුරු ඇති බවය. සොරකම් කිරීම සහ අපරාධමය වරද සම්බන්ධව පැමිණිලි ඇති වාහනවල එන්ජින් අංක සහ චැසි අංක සහිතව මෙම වෙඩ් අඩවියේ පවතින බව පොලිස් මාධ්ය ප්රකාශකවරයා පැහැදිලි කළේය.
මෙම වෙබ් අඩවියට සැක කටයුතු වාහනයක එන්ජින් අංකයක් සහ චැසි අංකයක් ඇතුළත් කර එම වාහනය සොරකම් කරනු ලැබූවක් ද යම් අපරාධමය වරදකට සම්බන්ධ එකක්දැයි විමසා බැලිය හැකි බවත් ප්රස්තුත වාහනයේ චැසි අංකය සහ එන්ජින් අංකය වෙබ් අඩවියට ඇතුළත් කළ පසු එය ජර්මනියේ නිශ්පාදනයෙන් අනතුරුව එක්සත් රාජධානියට විකුණා තිබිය දී සොරකම් කරන ලද වාහනයක් බවත් අනාවරණය වූයේ යැයි පොලිස් මාධ්ය ප්රකාශකවරයා පැවසුවේය.
ඔහුට අනුව වාහනය ලියාපදිංචි කර ඇත්තේ වර්ෂ 2021 දී ය. මෙම චැසි අංකය සහ එන්ජින් අංකය ව්යාජ ලෙස කොටා නැති බවට රස පරීක්ෂක වාර්තාව තහවුරු කර ඇත. එනම් මේ වාහනය එංගලන්තයේ දි සොරකම් කරනු ලැබූ වාහනයමය.
මෙම වාහනය ලංකාවට පැමිණ ඇත්තේ එසේනම් 2021න් පසුය. එනම් වාහනය ආනයනය තහනම් කර ඇති වකවානුව තුළය. මෙම වාහනය රේගුවේ ලියාපදිංචි වී නැත. මෝටර් රථ වාහන දෙපාරත්මේන්තුවේ ලියාපදිංචි වි නැත. එසේ නම් කොටස් කර ලංකාවට ගෙන්වා ඇති වාහනයකි. රස පරීක්ෂකවරයා තහවුරු කර ඇත්තේ වාහනය එකලස් කරනු ලැබූ එකක් බවය.
වාහනයක් එකලස් කිරීමේ දි මෝටර් රථ ප්රවාහන දෙපාර්තමේන්තුවෙන් නෛතික අනුමැතියක් ලබා ගත යුතුය. මෙම වාහනයට එවැනි නෛතික අනුමැතියක් නැත. වාහනය නීති විරෝධිව එකලස් කළ වාහනයකි.
එම වාහනය ජොන්ස්ටන් ප්රනාන්දු විසින් භාවිතා කළ බවට තොරතුරු ලැබී ඇති බවත් එම වාහනය ඔහුට අයත් වෙනත් බීඑම්ඩබ්ලියු රථයක අංක තහඩුවක් යොදාගෙන බොරලැස්ගමුව ප්රදේශයේ ස්ථානයක සේවා කටයුතු සිදුකර ඇති බවත් විමර්ශන අංශ හෙලි කරගෙන ඇති බව පොලිස් මාධ්ය ප්රකාශකවරයා කීවේය.
එමෙන්ම වාහනය හිල්ටන් රථ ගාලේදි හමුවන විට එහි සවි කර තිබුනේ වෙනත් වාහනයකින් සොරකම් කරන ලද ගරාජ් අංක තහඩුවක් බව හෙළි වූයේය.
” ගරාජ් අංකය වෙනත් කොළඹ ආයතනයකට නිකුත් කරලා තිබුණා. ඒ ගරාජ් අංකය යම් කිසි අවස්ථාවක සොරකම් කරලා තියනවා කියලා. ඒ වගේම මේ කාර් රථය හිටපු අමාත්යවරයාට අයත්ව තිබූ තවත් බීඑම්ඩබ්ලියු රථයක අංක තහඩුවක් මේ රථයට සවි කරලා යම් යම් සේවා කටයුතු රථයකට අරන් ගිහින් තිබුණා.”
“මේ රථය නීත්යානුකූල ලියවිල්ලක් නෑ. මෝටර් රථවාහන දෙපාර්තමේන්තුවේ ලියාපදිංචි නෑ. රේගුවෙන් කරල ලද විමර්ශනයක දී රේගුව හරහා ආනයනය කළ වාහනයක් නොවන බවත් අනාවරණය
වුනා. රජයේ රස පරික්ෂකවරයාට වාහනය යොමු කළාට පස්සේ මේ වාහනය එකලස් කරන ලද වාහනයක් බව අනාවරණය වුනා. එකලස් කරන්න බෑ මෝටර්රථ ප්රවාහන කොමසාරිස්වරයාගේ නිසි අනුමැතිය නොමැතිව. නිසි අනුමැතිය නොමැතිව එකලස් කරන ලද වාහනයක් වුනාට පස්සේ එය නීති විරෝධීව එකලස් කරන ලද වාහනයක් බවට පත් වෙනවා. එය විශේෂයෙන්ම මෝටර් රථ වාහන පනත යටතේ වරදක්.
ඒ වගේම සොරකම් කරන ලද අංක තහඩුවක් වාහනයකට සවි කර භාවිතා කිරීමත් දන්ඩ නිති සංග්රහය යටතේ වරදක් වෙනවා. ”
පොලිස් මාධ්ය ප්රකාශකවරයා කීවේය. මේ වාහනය ලංකාවට පැමිණි ආකාරය ගැන තවමත් විමර්ශන කරන බව ඔහු ප්රකාශ කළේය.
