නව අධ්යාපන ප්රතිසංස්කරණය යටතේ මුද්රණය කර ඇති මොඩියුලවල තවත් වැරදි ඇති බවත් ආගම් සහ සාරධර්ම අධ්යාපන මොඩියුලයේ ධර්ම චක්රය වෙනුවට අශෝක චක්රය ඇතුළත් කිරීමේ බරපතල වරද සිදුකර ඇති බවත් දක්වමින් විපක්ෂ නායකවරයා විසින් මතුකළ ප්රශ්නය පදනමක් නැති ප්රකාශයක් බව අග්රාමාත්ය හරිනී අමරසූරිය අද පාර්ලිමේන්තුවේ දි පැවසුවාය.
ඇය පෙන්වා දුන්නේ ඇතුළත් කර ඇත්තේ අනුමැතිය ලද ධර්ම චක්ර සංකේතය බවය. එය මහානායක හිමිවරුන්ට පෙන්වා උන්වහන්සේලාගේ තහවුරුව ද ලබා ගත් බව අගමැතිනිය පැවසුවාය.
ප්රශ්නය මතු කරමින් විපක්ෂනායකවරයා මෙසේ පැවසුවේය.
“ආගම් හා සාරධර්ම අධ්යාපනයේ ධර්ම චක්රය කියලා ඇතුළු කරලා තියෙන්නේ අශෝක චක්රය. ධර්ම චක්රය වෙනුවට අශෝක චක්රය ඇතුළත් කිරීම බරපතල වරදක්. බරපතල ගැටලුවක්. මේ පිටපත් සියල්ලක්ම සභාගත කරනවා. හැන්සාඩ්ගත කරනවා. මේ අඩුපාඩුව නිවැරදි කරන්න.”
“ යම් කිසි උපදේශක සභාවකින් අනුමැතිය අරන් ද මේක කළේ. රාජ්ය ලාංඡනයේ තිබෙන ධර්ම චක්රය නෙමෙයි මෙතන තියෙන්නේ. මේ වගේ නිවැරදි කිරීම් කරන්න. කොල ටික ඉවත් කරලා අලුත් කොල දාන්න.” විපක්ෂ නායකවරයා පැවසුවේය.
ඊට පිළිතුරු දෙමින් අගමැතිනිය මෙසේ පැවසුවාය.
“ධර්ම චක්රය සහ අශෝක චක්රය ගැන පැටලැවිල්ල විපක්ෂ නායක තුමා මතු කළා. පොතේ ඇතුළත් වෙලා තියෙන්නේ ඇත්තවශයෙන්ම බෞද්ධ කටයුතු අමාත්යාංශය විසින් අනුමත කරලා තිබෙන සංකේතය. මේක අමාත්යාංශයේ බුද්ධාගම පිළිබඳ උපදේශක සභාව විසිනුත් අනුමත කළ එක.”
“ඊයේ මම අස්ගිරිය සහ මල්වත්ත ගරු මහානායක හිමිවරුන් බැහැදැක්කා. ඒ අවස්ථාවේදීත් මම උන්වහන්සේලා සමග මේ ගැන කතා කළා. උන්වහන්සේලාත් කිව්වේ මේක තමයි අනුමත වෙලා තියෙන සංකේතය කියලා. ඒක උන්වහන්සේලා තහවුරු කළා. මේක නිවැරදියි. මේක අශෝක චක්රය වගේ තමයි. මේක තමයි අනුමත වෙලා තිබෙන නිල සංකේතය. “
“හැබැයි අපේ රටේ අනෙක් සංකේතයත් පාවිච්චි වෙනවා. ඒක නොවෙනවා නෙමෙයි. නමුත් අනුමැතිය ලැබිලා තිබෙන්නේ නිල වශයෙන් මේ සංකේතයට. අපි ඒක තමයි මේ සංකේතය ඇතුළු කළේ. මේක නිවැරදියි. “
