ජානක ලියනආරච්චි –
පිරිමි කණ්ඩායම්වල 20යි විස්ස තරග දකින්නට ක්රීඩා ලෝලීහු රුචි වෙති. වේගය, ජවය, මෙන්ම තියුණු තරගකාරිත්වය එම තරගවල ඕනෑවටත් වඩා ගැබ් වී ඇත්තේය.
එහෙත් ඒ තරගකරණයෙන් උපදිනා අසීමිත සම්පත් ප්රමාණය ක්රීඩාවේ අධ්යාත්මය ගලවා ශික්ෂිත බවේ සළු පිළි උනා දමා අමු හෙළුවෙන් රඟන ආත්මාර්ථකාමී වැද්දන් සමූහයකගේ පොරයක් බවට ශ්රි ලංකා ක්රිකට් ක්රීඩාව පත් වි ඇති අයුරු දුටුවෙමු. ශිෂ්ඨාචාරයේ මුල්ම අවධියේ ප්රකාශිත ගෝත්රික ලක්ෂණ මතු කරමින් රටට කණ්ඩායමට පෙර තමන් සුරක්ෂිත වීමේ තියරිය මිස ජාතියක සන්නාම තානාපතිවරුන් ගේ විදග්ධ හැසිරීම මෑත කාලයක දී අප අපේ පිරිමි ක්රීඩකයින්ගෙන් අප දුටුවේ නැත.
මේ ප්රවේශ සහටන තැබුවේ සාද, මධුවිත, රති කෙළි අතරේ වෙලාවක් තිබුණොත් අද තායිලන්ත – ශ්රී ලංකා කාත්තා ක්රිකට් තරගයේ චමරී අතපත්තු ක්රීඩා කළ ඉනිමේ අධ්යාත්මික ගැඹුර අපේ ක්රිකට් ඔස්තාද්ලාට බලන්නට කියන්නටය. ඒ ක්රිකට් ඉගෙන ගන්නට නොවේ. රටක් වෙනුවෙන්, රටේ ගෞරවය වෙනුවෙන් ක්රිකට් ක්රිඩා කිරීම යනු කුමක් ද, තමන්ගේ පුද්ගලික වාර්තා දෙවෙනි කරමින් රටේ ගෞරවණීය ජයග්රහණය සහතික කිරීමේ පෞරුෂය කුමක් ද යන්න පිළිබඳව අවබෝධ කරගැනීම සඳහා ය.
කොටින්ම විනයක් සංයමයක් හෝ රටක් වෙනුවෙන් උපන් හැඟීමක් නැති හැඩි දැඩි ගවයන් ටිකක් පන්දුවට පිත්තෙන් ගැසීම යනු ක්රිකට් නොවන බව තේරුම් ගැනීම සඳහා ය.
කාන්තා ආසියානු කුසලාන විස්සයි20 තරගාවලියේ ඒ ඛාන්ඩයේ තරගයක් වූ ශ්රී ලංකා – තායිලන්ත තරගය අද (24) දඹුල්ල ජාත්යාන්තර ක්රිකට් ක්රිඩාංගනයේ විදුලි ආලෝක මධ්යයේ පැවැත්වුනේය. ශ්රී ලංකා කණ්ඩායම කඩුළු 10කින් දිනුම්ය.
තරගය
තරගයේ කාසියේ වාසිය දිනුවේ තායිලන්ත කණ්ඩායමය. තායිලන්ත ක්රීඩිකාවෝ මුලින්ම පන්දුවට පහර දීම තේරූහ.
ශ්රී ලංකා ක්රිඩිකාවෝ පිටියේ විශිෂට පන්දු රැකීමක් මෙන්ම පන්දු යැවීමක් ප්රකට කළහ. තායිලන්ත කණ්ඩායමේ සාර්ථක වූ එකම පිතිකාරිණිය වූයේ Nannapat Koncharoenkai පමණි. ඇය පන්දු 53ක් තුළ හතරේ පහර 5ක් සමගින් නොදැවී ලකුණු 47ක් රැස් කළාය. පන්දු ඕවර 20 තුළ දී කඩුළු 07ක් දැවී තායිලන්ත කණ්ඩායම රැස් කරගත්තේ ලකුණු 93ක් පමණි. ශ්රී ලංකා කණ්ඩායමේ ජයග්රාහී ඉලක්කය ලකුණු 94කි.
පන්දු යැවීමේ දී කවීෂා දිල්හාරි සිය පන්දු ඕවර 4 තුළ ලකුණු 13ක් පමණක් ලබා දී කඩුළු 02ක් ලබා ගෙන විශිෂ්ට පන්දු යැවීමක නිරත වූවාය. අචිනි කුලසූරිය, සුගන්ධිකා කුමාරි, ඊනෝෂි ප්රියදර්ශනී, චමරී අතපත්තු කඩුල්ල බැගින් ලබා ගත්හ.
පිළිතුරු ඉනිම ක්රීඩා කිරීමට පැමිණි විශ්මි ගුණරත්න සහ චමරී අතපත්තු පන්දු ඕවර 11.3ක් තුළ දී ලකුණු 93ක ඉලක්කය ඉක්මවා ගියහ. ශ්රී ලංකා කණ්ඩායම කඩුළු 10ක විශිෂ්ඨ ජයක් ලැබුවේය.
තරගයක දුටු වටිනාම ලකුණු 49ක්…
විශ්මි ගුණරත්න හතරේ පහර 4ක් සහ එක් හයේ පහරක් සමගින් පන්දු 34ක දී නොදැවී ලකුණු 39කි. චමරී අතපත්තු හතරේ පහර 02ක් සහ හයේ පහර 4ක් සමග පන්දු 35ක දී ලකුණු 49කි.
අද ඇය සිය 11 වැනි අන්තර්ජාතික විස්සයි 20 අර්ධ ශතකය අත්හැරියාය. චමරි ලකුණු හතලිස් ගණන් අග වනවිට ඇය සමග අනෙක් අන්තයේ ක්රීඩා කළ විශ්මි ගුණරත්න ඇයට පන්දුවට පහරදීමට අවස්ථාව ලබා දීමට උත්සාහ කරනු පෙනුණි. ඒ අවස්ථාව ලබා ගනු වෙනුවට අප දුටුවේ හැකි ඉක්මනින් තරගය නිමා කරන්නට විශ්මි ගුණරත්න උනන්දු කරවන ශ්රී ලංකා නායිකා චමරි අතපත්තු ය.
ලකුණු 49ක් ලබා සිටිය දී ජයග්රහණයට අවශ්ය වී තිබුණේ එක ලකුණකි. එම ලකුණ ලබා ගැනීමට පන්දු 52ක් ඉතිරී වී තිබිණි.
අමතර ලකුණක් ලබා ගැනීමට තිබූ අවස්ථා මගහරිමින් ජයග්රහණය පන්දුවකින් දෙකකින් පමා කර ඇයට ඇයගේ පුද්ගලික වාර්තා අතරට සිය 11 වැනි අර්ධ ශතකය එක් කර ගැනීමට අවස්ථාව තිබිණි.
නමුත් ඇයගේ පුද්ගලික අර්ධ ශතකය වෙනුවෙන් චමරී ජයග්රහණය එක් පන්දුවකින් හෝ පමා කළේ නැත. 11 වැනි ඕවරයේ 3 වැනි පන්දුවට පහසු අමතර ලකුණකට පැති මාරු කරගනිමින් චමරි නොදැවි ලකුණු 49ක් සහිතව තරගය නිමා කළාය.
ක්රීඩාවේ ජීව ගුණයට ගෞරව කරන මහත්මා ක්රීඩාවක පමණක් ඇති මේ ලක්ෂණය ප්රගුණ කිරීමට ඇය ලද යෝධ පෞරුෂය කෙසේ ලැබුණා දැයි කල්පනා කරමි.
මක් නිසා ද යත් ඇයට සමකාලීන ජාතික පිරිමි කණ්ඩායමේ අපට ක්රිකට් එපා කරවන උද්දච්ඡ මදාවිකමට හාත්පසින් වෙනස් අන්තය චමරි අපට පෙන්වා දුන් බැවිනි. අප ගෞරව කරන අතීත ක්රිකට්හි තිබූ අධ්යාත්මික හරය යළි දකින්නට ලැබීමේ ආනන්දය විඳිමින් මේ සටහන අවසන් කරමි.
ස්තුතියි ලොකු දුවේ… උඹේ ලකුණු 49 අර්ධ ශතක 49කට වැඩිය වටිනවා.
