අධි ව්යාධි ජනක අප්රිකානු සූකර උණ රෝගය (African swine fever) මෙරටට ඇතුළු වූයේ කෙසේද යන්න සෙවීම සඳහා වසංගත විද්යාත්මක විමර්ශනයක් සිදු කරමින් පවතින බව සත්ත්ව නිෂ්පාදන හා සෞඛ්ය දෙපාර්තමේන්තුවේ අධ්යක්ෂ ජනරාල් ආචාර්ය හේමාලි කොතලාවල පවසයි.
මෙරටට අවශ්යය ඌරු මස්වලින් කුඩා ප්රමාණයක් විදේශ රටවලින් ආනයනය කරන බවත් එහි දී ආනයනික බලපත්ර ලබා දෙන්නේ සූකර උණ රෝගය නොමැති රටවලින් මස් ආනයනය කිරීමට බවත් ඇය පෙන්වා දෙයි.
මෙම තත්ත්වය තුළ විධිමත් ලෙස ආනයනය කළ ඌරු මස්වලින් මෙම වෛරසය රට තුළට ඇතුළු වීමට කිසිදු ඉඩක් නොමැති බවත් අවධිමත් ලෙස රටට ගෙන එනු ලැබූ මස් මගින් හෝ ගුවන් තොටුපොළ හා වරාය මගින් ඉවතලද ආහාර මගින් මෙය රට තුළට ඇතුළු වූ බවට අනුමාන කරන බවත් අධ්යක්ෂ ජනරාල්වරිය අනුමාන කරයි.
පසුගිය මාස එකහමාරක කාලය තුළ මෙරට ඌරු ගොවිපොළ ආශ්රිතව ව්යාප්ත වූ රෝගය පී.ආර්.ආර්.එස් (Porcine Reproductive and Respiratory Syndrome) බවට පශු වෛද්ය පර්යේෂණ ආයතනය තහවුරු කළ බවත් එහි දී මතුවන රෝග ලක්ෂණ වලට වඩා වෙනස් රෝග ලක්ෂණ තිබෙන සතුන් ද ගොවිපොළ කිහිපයකින් වාර්තා වීම නිසා පශු වෛද්ය පර්යේෂණ ආයතනය එම සතුන් ගේ සාම්පල කිහිපයක් පරීක්ෂා කිරීමේ දී ඔවුන්ට වැළඳී ඇත්තේ අප්රිකානු සූකර උණ බවට තහවුරු කරගත් බවත් ආචාර්ය කොතලාවල කියයි
මේ අනුව මෙරටින් මේ වනවිට පී.ආර්.ආර්.එස් (Porcine Reproductive and Respiratory Syndrome) රෝගය සහ අප්රිකානු සූකර උණ රෝගය (African swine fever) උණ යන වෛරස් රෝග දෙකම වාර්තා වී තිබෙන බවත් පී.ආර්.ආර්.එස් රෝගයට එන්නතක් ඇතත් අප්රිකානු සූකර උණට මෙතෙක් එන්නතක් සොයාගෙන නොමැති බව ඇය අනාවරණය කරයි
රෝග දෙකම වෛරස් රෝග වුවත් අප්රිකානු සූකර උණ අධිව්යාධිජනක වෛරස් රෝගයක් බව කී අධ්යක්ෂ ජනරාල්වරිය රෝගය පැතිර යාම වැලැක්වීම සඳහා ඌරන්, ඌරු මස් හා ආසාදිත වෙනයම් ද්රව්යයක් ප්රාදේශීය ලේකම් කොට්ඨාස අතර ප්රවාහනය මුළුමනින්ම තහනම් කරමින් ගැසට්ටුවක් එළිදැක් වූ බව ද අධ්යක්ෂ ජනරාල්වරිය පවසයි.
