තෙල්දෙණිය ප්රදේශයේදී මෝටර් රථයක් තුළ සැකකටයුතු ලෙස මියගොස් සිටියදී සොයාගත් අම්පාර රෝහලේ භෞත චිකිත්සකවරියගේ මරණය ගෙල සිරකිරීමෙන් සිදුකරන ලද මනුෂ්ය ඝාතනයක් බව පශ්චාත් මරණ පරීක්ෂණයේදී තහවුරු වී තිබේ.
පසුගිය 17 වන දින තෙල්දෙණිය රෝහල ආසන්නයේ නවතා තිබූ මෝටර් රථයක් තුළ තිබී මෙලෙස සොයාගැනුණේ වැලිගම ප්රදේශයේ පදිංචිව සිටි 33 හැවිරිදි ශ්යාමා නැමැති කාන්තාවකගේ මළ සිරුරකි. මුළු රටම කම්පනයට පත් කළ මෙම මරණය පිළිබඳව ඇති වූ සැකය මත පොලීසිය විසින් පුළුල් පරීක්ෂණයක් ආරම්භ කර තිබුණි.
එහි ප්රතිඵලයක් වශයෙන් ඊයේ (24) අලුයම වලාන මධ්යම දූෂණ මර්දන ප්රහාරක ඒකකය මඟින් ඇයගේ ඝාතනයට සම්බන්ධ ප්රධාන සැකකරු, ඔහුගේ බිරිඳ සහ කුඩා දරුවෙකු අත්අඩංගුවට ගැනීමට සමත් වී තිබේ.
යාපනයේදී බස් රථයකදී කොටු වූ අඹුසැමි යුවළ
ශ්යාමාගේ පෙම්වතා බව කියන 43 හැවිරිදි ප්රධාන සැකකරු සහ ඔහුගේ බිරිඳ වන 35 හැවිරිදි කොස්ගොල්ල හොරොම්බාව ප්රදේශයේ පදිංචි අඹුසැමි යුවළ අත්අඩංගුවට ගෙන ඇත්තේ යාපනය, චාවකච්චේරිය කයිතඩි ප්රදේශයේදී බස් රථයකින් ගමන් කරමින් සිටියදී ය. වලාන මධ්යම දූෂණ මර්දන ප්රහාරක ඒකකයේ නිලධාරී කණ්ඩායමක් විසින් මෙම වැටලීම සිදුකර ඇත.
මේ අතර, අදාළ ප්රධාන සැකකරුට සැඟව සිටිම සඳහා ආධාර අනුබල දීමේ චෝදනාව මත 49 හැවිරිදි රජවැල්ල ප්රදේශයේ පදිංචි පුද්ගලයෙකු ද නුවරඑළිය කොට්ඨාශ අපරාධ විමර්ශන කාර්යාංශයේ නිලධාරීන් විසින් ඊයේ අත්අඩංගුවට ගනු ලැබීය.
අත්අඩංගුවට ගත් සැකකරුවන් වැඩිදුර විමර්ශන කටයුතු සඳහා ඊයේ (24) රාත්රී නුවරඑළිය පොලිස් ස්ථානය වෙත භාර දුන් බව පොලිස් මාධ්ය කොට්ඨාසය සඳහන් කළේය.
CCTV දර්ශන සහ හෝටල් කාමරයේ සුලමුල
ඝාතනයට ලක්වූ ශ්යාමා පසුගිය ජුනි මස 3 වන දින සිට ජුනි 16 වන දින දක්වා නුවරඑළිය ප්රදේශයේ හෝටලයක නවාතැන්ගෙන සිට ඇති බවට විමර්ශනවලදී අනාවරණය වී තිබේ. සැකකාර පෙම්වතා විසින් අදාළ හෝටල් කාමරයේ සිට ශ්යාමාගේ සිරුර ඔසවාගෙන යන CCTV දර්ශන පෙළක් ද මාධ්ය වෙත නිකුත් වී තිබූ අතර, ඒ ඔස්සේ පොලීසිය දීර්ඝ ලෙස පරීක්ෂණ පැවැත්වීය.
දින 7ක් පුරා සැකකරු සොයා පොලිස්පති ප්රියන්ත වීරසූරියගේ උපදෙස් මත වලාන මධ්යම දූෂණ මර්දන ප්රහාරක ඒකකය සහ අපරාධ පරීක්ෂණ දෙපාර්තමේන්තුවේ තාක්ෂණික සහාය ඇතිව සිදුකළ විශේෂ මෙහෙයුමකින් අනතුරුව මෙම සැකකරුවන් කොටුකර ගැනීමට හැකිව තිබේ.
සැකකරු කියන මරණයේ ඇත්ත නැත්ත
කෙසේවෙතත් පොලිස් ප්රශ්න කිරීම් හමුවේ ප්රධාන සැකකරු පවසා ඇත්තේ තමා ශ්යාමා නැවතී සිටි කාමරයට යන විට ඇය ගෙල වැලලාගෙන සිටි බවයි. එහිදී තමා බියට පත්ව සිරුර මෝටර් රථයේ දමා තෙල්දෙණියට රැගෙන ආ බව ඔහු ප්රකාශ කර ඇතත්, පශ්චාත් මරණ පරීක්ෂණයේදී හෙළි වී ඇත්තේ ඇයව ගෙල සිරකර මරා දමා ඇති බවයි. සිද්ධිය සම්බන්ධයෙන් නුවරඑළිය සහ තෙල්දෙණිය පොලීසිය වැඩිදුර විමර්ශන සිදුකරයි.
