ශ්රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්රාම යාමේ වයස තවත් වසර දෙකකින් දීර්ඝ කිරීම පිළිබඳව රජයේ අවධානය තවදුරටත් යොමුවෙමින් පවතින අභ්යන්තර ආරංචි මාර්ග උපුටා දක්වමින් සන්ඩේ ටයිම්ස් වාර්තා කරයි.
අධිකරණ ක්ෂේත්රයේ දීර්ඝ පළපුරුද්දක් සහිත විනිසුරුවරුන්ගේ සේවය තවදුරටත් ලබාගැනීමේ අරමුණින් රජය මෙම පියවර ගැනීමට සූදානම් වන බව වාර්තා වේ. වත්මන් ක්රමවේදයට අනුව ශ්රේෂ්ඨාධිකරණ විනිසුරුවරුන් වයස අවුරුදු 65 දී ද, අභියාචනාධිකරණ විනිසුරුවරුන් වයස අවුරුදු 63 දී ද විශ්රාම යා යුතුය. යෝජිත සංශෝධනවලට අනුව ශ්රේෂ්ඨාධිකරණ විනිසුරුවරුන්ගේ විශ්රාම වයස අවුරුදු 67 දක්වාත්, අභියාචනාධිකරණ විනිසුරුවරුන්ගේ විශ්රාම වයස අවුරුදු 65 දක්වාත් ඉහළ දැමීමට නියමිතය. දැනට පවතින නීතියට අනුව මහාධිකරණ විනිසුරුවරුන් වයස අවුරුදු 61 දීත්, දිසා විනිසුරුවරුන් සහ මහේස්ත්රාත්වරුන් වයස අවුරුදු 60 දීත් විශ්රාම යනු ලබයි.
ජ්යෙෂ්ඨ රජයේ ප්රකාශකයෙකු උපුටා දක්වමින් සන්ඩේ ටයිම්ස් වාර්තා කරන්නේ අභියාචනාධිකරණයේ සහ මහාධිකරණයේ ඉතා දක්ෂ මෙන්ම පළපුරුදු විනිසුරුවරුන් රැසක් සේවය කරන බවය. ඔහු පෙන්වා දී ඇත්තේ වත්මන් වයස් සීමාවන් හේතුවෙන් ඔවුන් ඉහළ අධිකරණවලට උසස්වීම් ලබන විටම පාහේ විශ්රාම වයසට එළඹෙන බැවින්, ඔවුන්ගේ සේවය ඉහළ අධිකරණවලට අහිමි වන බවය. යෝජිත වයස් සීමා සංශෝධනය හරහා එම ජ්යෙෂ්ඨ නිලධාරීන්ට අවම වශයෙන් තවත් වසර දෙක තුනක් ඉහළ අධිකරණවල සේවය කිරීමට අවස්ථාව ලැබෙන අතර, ඔවුන්ගේ වෘත්තීය පළපුරුද්ද සමස්ත අධිකරණ පද්ධතියේම උන්නතියට හේතු වනු ඇති බවය.
කෙසේ වෙතත්, රජය අධිකරණයට බලපෑම් කිරීමට උත්සාහ කරන බවට විපක්ෂය මෙන්ම ජාත්යන්තර නීති සංගම් චෝදනා කරන පසුබිමක මෙම නව පියවර පිළිබඳව සාකච්ඡා වෙමින් පවතී. ශ්රී ලංකා නීතිඥ සංගමය (BASL), පොදුරාජ්ය මණ්ඩලීය නීතිඥ සංගමය (CLA) සහ ආසියා සහ ශාන්තිකර කලාපීය නීති සංගමය (LAWASIA) ඇතුළු සංවිධාන දැනටමත් රජයෙන් ඉල්ලා ඇත්තේ ඉහළ අධිකරණවල විනිසුරුවරුන්ගේ විශ්රාම වයස ඉහළ දැමීමේ පියවරෙන් වළකින ලෙසය.
මේ අතර, පහළ අධිකරණවල පවතින පුරප්පාඩු පිරවීම සඳහා රජය විසින් යෝජනා කරන ලද පහළ සිට ඉහළට (bottom-up system) යන ක්රමවේදය යටතේ ප්රථමයෙන් නව මහේස්ත්රාත්වරුන් 50 දෙනෙකු පත් කිරීමට නියමිතය. ඉන් අනතුරුව ඉහළ අධිකරණවල පවතින පුරප්පාඩු පිරවීමට පියවර ගන්නා බව එම රජයේ ප්රකාශකයා වැඩිදුරටත් පැවසීය. මේ වන විට ශ්රේෂ්ඨාධිකරණයේ සහ අභියාචනාධිකරණයේ පුරප්පාඩු හතර බැගින් පවතී.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
