මත් කුඩු කිලෝ ග්රෑම් 01යි ග්රෑම් 53ක් සමග විශේෂ කාර්ය බලකායේ පොලිස් පරීක්ෂකයෙක් සහ පොලිස් කොස්තාපල් කෙනෙක් ඊයේ (20) රාත්රියේ කොළඹ අපරාධ කොට්ඨාසයේ නිලධාරීන් කණ්ඩායමක් විසින් පිළියන්ද මිරිස්වත්ත ප්රදේශයේ දී අත් අඩංගුවට ගෙන තිබේ.
පොලිස් මූලස්ථාන තොරතුරු අනුව සිද්ධිය මෙසේය.
සංවිධානාත්මක අපරාධ මැඩලීම සඳහා කොළඹ අපරාධ කොට්ඨාසයේ පොලිස් පරික්ෂකවරයෙක් යටතේ දියත් කරන ලද මෙහෙයුමක් අතර අනාවරණය වු තොරතුරක් මත ඊයේ (20) රාත්රී 7ට පමණ පිළියන්ද මිරිස්වත්ත සුපිරි වෙළෙඳ සංකීර්ණයක රථ ගාලේ නවත්වා තිබූ වෑන් රථයක් පරීක්ෂා කර තිබේ.
වෑන් රථයේ රියදුරු සහ ඉදිරි වම් අසුනේ පුද්ගලයෙක් වාහනය තුළ රැඳී සිට තිබේ. පරීක්ෂා කරන විට ඉදිරි අසුනේ ඉඳගෙන සිටි පුද්ගලයාගේ ගමන් බෑගයේ හෙරොයින් මත්කුඩු කිලෝ ග්රෑම් එකයි ග්රෑම් 53ක්, අත් විලංගු යුගලක්, ඉලෙක්ට්රොනික් තරාදියක් හමුවී තිබේ.
වැඩිදුර විමර්ශනයේ දී වෑන් රථයේ රියදුරු ලෙස කටයුතු කර ඇත්තේ මොරටුව විශේෂ කාර්ය බලකා කඳවුරට අනුයුක්තව සේවය කරන 35 හැවිරිදි පොලිස් පරීක්ෂකයෙක් බවත්, මත්කුඩු කිලෝ එක සහිත ගමන් බෑගයත් සමග ඉදිරිපස අසුනේ සිට අත් අඩංගුවට පත් වූයේ මොරටුව විශේෂ කාර්ය බලකා කඳවුරේ සේවය කරන පොලිස් කොස්තාපල් කෙනෙක් බවත් කොළඹ අපරාධ කොට්ඨාස නිලධාරීන් විසින් අනාවරණය කරගෙන තිබේ.
ඒ අනුව පොලිස් පරීක්ෂකයා හෙරොයින් ජාවාරමට ආධාර අනුබල ලබා දීම සම්බන්ධයෙන් ද පොලිස් කොස්තාපල් මත්ද්රව්ය සන්තකයේ තබා ගැනීම සහ ජාවාරම් කිරීම සම්බන්ධයෙනුත් අත් අඩංගුවට ගෙන තිබේ.
කොළඹ අපරාධ කොට්ඨාසය වැඩිදුර විමර්ශන පවත්වයි.
