-
ගත වූ පැය 24 තුළ වැඩිම වැස්ස කිරිඳිවැලට… දෙවැනියට වේයන්ගොඩට…
නිරිත දිග මෝසම් තත්ත්වය දිවයින හරහා ක්රමයෙන් ස්ථාපිත වෙමින් පවතින බව කාලගුණ විද්යා දෙපාර්තමේන්තුව නිවේදනය කරයි. මේ හේතුවෙන් දිවයිනේ නිරිතදිග ප්රදේශවල දැනට පවතින වැසි සහිත කාලගුණ තත්ත්වය ඉදිරි පැය කිහිපය තුළ ද තවදුරටත් බලාපොරොත්තු විය හැක
-
ප්රදේශ කිහිපයකට මි.මී. 200 සීමාව පනින තද වැසි
බස්නාහිර, සබරගමුව සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්රික්කවලත් විටින් විට වැසි හෝ ගිගුරුම් සහිත වැසි ඇතිවේ.
එහිදී බස්නාහිර, සබරගමුව සහ වයඹ පළාත්වල ඇතැම් ස්ථානවලට මි.මී. 200 ට වැඩි ඉතා තද වැසි ඇති විය හැකි අතර ගාල්ල, මාතර, මහනුවර සහ නුවරඑළිය දිස්ත්රික්කවල ඇතැම් ස්ථානවලට මි.මී. 100 ට වැඩි තද වැසි ඇති විය හැකි බව කාලගුණ විද්යා දෙපාර්තමේන්තු සඳහන් කරයි.
මීට අමතරව, උතුරු පළාතේ සහ අනුරාධපුර දිස්ත්රික්කයේ වැසි වාර කිහිපයක් ඇති වන අතර ඌව පළාතේත් මඩකලපුව සහ අම්පාර දිස්ත්රික්කවලත් ස්ථාන ස්වල්පයක පස්වරු 2.00 න් පසුව වැසි හෝ ගිගුරුම් සහිත වැසි ඇති විය හැක.
-
පළාත් කිහිපයකට තද සුළං සහ අකුණු අනතුරු
මධ්යම කඳුකරයේ බටහිර බෑවුම් ප්රදේශවලත්, උතුරු, උතුරු-මැද, වයඹ සහ දකුණු පළාත්වලත් ත්රිකුණාමලය දිස්ත්රික්කයේත් විටින් විට හමන පැ.කි.මී. 35-45 ත් අතර තරමක තද සුළං ඇති විය හැකියි.
ගිගුරුම් සහිත වැසි සමඟ ඇතිවිය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්ය පියවර ගන්නා ලෙස ජනතාවගෙන් ඉල්ලා සිටියි.
-
කිරිඳිවැලට මි.මී. 244 ක උපරිම වර්ෂාපතනයක්… දෙවනුව වේයන්ගොඩට…
ඊයේ (21) උදෑසන 8.30 සිට අද (22) අලුයම 4.00 දක්වා කාලය තුළ වැඩිම වර්ෂාපතනය ගම්පහ දිස්ත්රික්කයේ කිරිඳිවැල ප්රදේශයෙන් වාර්තා වී ඇති අතර එය මිලිමීටර් 244 කි.
දෙවන වැඩිම වර්ෂාපතනය ගම්පහ වේයන්ගොඩ ප්රදේශයෙන් වාර්තා වේ. එය මිලිමීටර් 238 කි .
කොළඹ දිස්ත්රික්කයේ අවිස්සාවේල්ල ප්රදේශයෙන් මිලිමීටර් 230 ක ඉහළ වර්ෂාපතනයක් ද වාර්තා වී ඇත.
-
කළු ගඟ, අත්තනගලු ඔය සහ කැලණි ගඟ ආශ්රිතව සුළු ගංවතුර අවදානමක්
පවතින අධික වර්ෂාපතනය හේතුවෙන් ගංගා ද්රෝණි කිහිපයක ජල මට්ටම් සීඝ්රයෙන් ඉහළ යමින් පවතින බව වාරිමාර්ග දෙපාර්තමේන්තුව පවසයි:
- කළු ගඟ: ඉදිරි පැය කිහිපය තුළ කළු ගඟ පිටාර තැන්නට අයත් පහත්බිම්වලට සුළු ගංවතුර තත්ත්වයක් ඇති විය හැක. රත්නපුර දිස්ත්රික්කයේ රත්නපුර, කුරුවිට, අයගම, ඇලපාත සහ කිරිඇල්ල ප්රාදේශීය ලේකම් කොට්ඨාසවල ජනතාව මේ පිළිබඳව අවදානයෙන් සිටිය යුතුය.
- අත්තනගලු ඔය: දූනමලේ මිනුම් මධ්යස්ථානයේ ජල මට්ටම ඉහළ ගොස් ඇති අතර ඇතැම් ස්ථානවලට මිලිමීටර් 200-300 ත් අතර වර්ෂාපතනයක් ලැබී තිබේ. මේ හේතුවෙන් ගම්පහ, කටාන, වත්තල වැනි පහත්බිම් ජලයෙන් යටවීමේ අවදානමක් පවතී.
- කැලණි ගඟ: ඉහළ ධාරා ප්රදේශවලට මිලිමීටර් 300 කට ආසන්න වර්ෂාපතනයක් ලැබී තිබීම හේතුවෙන් ඉදිරි පැය 24 තුළ රුවන්වැල්ල, සීතාවක, දොම්පේ, දෙහිඕවිට, ඇහැළියගොඩ, යටියන්තොට සහ බුලත්කොහුපිටිය ප්රදේශ ආශ්රිතව සුළු ගංවතුර තත්ත්වයක් ඇති විය හැක.
-
දිස්ත්රික්ක 3 කට නායයාමේ පූර්ව අනතුරු ඇඟවීම්
අධික වැසි හේතුවෙන් ජාතික ගොඩනැගිලි පර්යේෂණ සංවිධානය (NBRO) විසින් අද (22) පෙරවරු 3.00 සිට හෙට (23) පෙරවරු 3.00 දක්වා වලංගු වන පරිදි දිස්ත්රික්ක 3 කට නායයාමේ අනතුරු ඇඟවීම් නිකුත් කර ඇත:
- දෙවන මට්ටමේ “අවදානයෙන් සිටින්න” (ඇම්බර්) නිවේදනය: ගම්පහ දිස්ත්රික්කයේ අත්තනගල්ල ප්රදේශයට සහ රත්නපුර දිස්ත්රික්කයේ කුරුවිට සහ රත්නපුර ප්රදේශවලට.
- පළමු මට්ටමේ “විමසිලිමත් වන්න” (කහ) නිවේදනය: කළුතර දිස්ත්රික්කයේ බුලත්සිංහල ප්රදේශයට සහ රත්නපුර දිස්ත්රික්කයේ ඇහැලියගොඩ ප්රදේශයට.
මේ හේතුවෙන් එම ප්රදේශවල පදිංචි ජනතාව මෙන්ම මාර්ග භාවිත කරන රියදුරන් සහ මගීන් ද දැඩි අවධානයෙන් කටයුතු කරන ලෙස වාරිමාර්ග හා කාලගුණ විද්යා දෙපාර්තමේන්තු වැඩිදුරටත් දැනුම් දෙයි.
