සිංහල සහ දෙමළ අලුත් අවුරුදු චාරිත්රවලට එක් වෙමින්, දිට්වා සුළි කුණාටුවෙන් විනාශ වූ අනුරාධපුර ගල්නෑව ප්රාදේශීය ලේකම් කොට්ඨාසයේ මල්බෙලිගල ග්රාම නිලධාරී වසමේ එච්.එම්. ඉන්ද්රජිත් සම්පත් සේනාරත්නගේ නව නිවසට ගෙවැදීමේ සහ අලුත් අවුරුදු සැමරුමට ජනාධිපති අනුර කුමාර දිසානායක අද (14) පෙරවරුවේ එක් විය.
පූර්ණ හානියට පත් නිවාසවලට ලබා දුන් වන්දි යටතේ මාස පහක කාලයක් තුළ මෙම නිවස ඉදිව තිබෙන අතර, එය පූර්ණ හානියට පත් නිවාස වෙනුවෙන් ගල්නෑව ප්රාදේශීය ලේකම් කොට්ඨාසය තුළ ඉදි වන නව නිවාස හයෙන් එකකි. එමෙන්ම මෙම ප්රාදේශීය ලේකම් කොට්ඨාශයේ අර්ධ හානි වූ නිවාස හැට හයකටද මේ වන විට වන්දි ගෙවා අවසන් කර තිබේ.
ප්රදේශයේ ජනතාව සමඟ එක්ව නව නිවසේ අලුත් අවුරුදු චාරිත්රවලට එක් වූ ජනාධිපතිවරයා එම සියලු ජනතාවට සිංහල සහ දෙමළ අලුත් අවුරුදු සුබපැතුම් එක් කළේය. එමෙන්ම ජනාධිපතිවරයාව ගෞරවයෙන් පිළිගත් ප්රදේශවාසීහු ද එතුමා වෙත අලුත් අවුරුදු සුබපැතුම් එක් කළහ.
කෘෂිකර්ම, පශු සම්පත් ඉඩම් සහ වාරිමාර්ග අමාත්ය කේ.ඩී.ලාල්කාන්ත, වෙළඳ වාණිජ හා ආහාර සුරක්ෂිතා අමාත්ය වසන්ත සමරසිංහ, නිවාස ඉදිකිරීම් හා ජල කලමනාකරණ අමාත්ය වෛද්ය සුසිල් රණසිංහ, උතුරු මැද පළාත් ආණ්ඩුකාර වසන්ත ජිනදාස, අනුරාධපුර දිස්ත්රික් පාර්ලිමේන්තු මන්ත්රී සුසන්ත කුමාර නවරත්න ඇතුළු මන්ත්රීවරු ද, පළාත් පාලන ආයතන ප්රධානීහු ඇතුළු මහජන නියෝජිතයෝ ද, අනුරාධපුර දිස්ත්රික් ලේකම් රංජිත් විමලසූරිය ඇතුළු රාජ්ය නිලධාරීහු ද මෙම අවස්ථාවට එක්ව සිටියහ.
