මීගමුව බන්ධනාගාරය තුළ ඇති වූ බරපතළ නොසන්සුන්කාරී තත්ත්වය සහ ඉන් සිදු වූ ජීවිත හානි සම්බන්ධයෙන් අද (07) පාර්ලිමේන්තුවේ දී පැය තුනක විශේෂ විවාදයක් පැවැත්වීමට නියමිතව තිබේ. මෙම විවාදය අද සවස 3.30ට ආරම්භ වීමට නියමිත අතර එය සවස 6.30 වන තෙක් පැවැත්වීමට සියලු කටයුතු සැලසුම් කර ඇත.
මීගමුව බන්ධනාගාරය තුළ හටගත් මෙම දරුණු ගැටුම්කාරී තත්ත්වය පිළිබඳව පාර්ලිමේන්තුවේ දී විවාදයක් ලබා දෙන ලෙස විපක්ෂයේ මන්ත්රීවරුන් පිරිසක් අද දින කථානායකවරයාගෙන් ඉල්ලීමක් කර තිබිණි.
පසුගිය 5 වැනිදා සහ ඊයේ (06) යන දෙදින තුළ මීගමුව බන්ධනාගාරය තුළ ඇති වූ දරුණු ගැටුම් හේතුවෙන් මේ වන විට පුද්ගලයන් 27 දෙනෙකු ජීවිතක්ෂයට පත්ව තිබේ. තවද 100කට අධික පිරිසක් තුවාල ලබා ඇති බවත්, මෙම මරණ සහ තුවාල සිදුවීම්වල සම්පූර්ණ වගකීම වත්මන් ආණ්ඩුව විසින් භාරගත යුතු බවත් විපක්ෂය අවධාරණය කර සිටී.
විපක්ෂ නායක සජිත් ප්රේමදාස, සර්ව ජනබලයේ නායක දිලිත් ජයවීර මෙන්ම රංජිත් මද්දුම බණ්ඩාර, කබීර් හෂීම්, සුජීව සේනසිංහ, කින්ස් නෙල්සන්, රෝහිණි විජේරත්න සහ හෙක්ටර් අප්පුහාමි යන විපක්ෂයේ ප්රමුඛ පාර්ලිමේන්තු මන්ත්රීවරුන් පිරිසක් අත්සන් තබා මෙම යෝජනාව ඉදිරිපත් කර තිබුණි. අනතුරුව විපක්ෂ නායක සජිත් ප්රේමදාස විසින් මෙම යෝජනාව පාර්ලිමේන්තුවට ඉදිරිපත් කිරීමෙන් පසු කථානායකවරයා විසින් මෙම පැය 03ක විවාදය සඳහා අනුමැතිය ලබා දෙන ලදී.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
