මීගමුව බන්ධනාගාරයේ අද (06) උදෑසන ඇති වූ දරුණු ගැටුම හේතුවෙන් මේ වනවිට 25 දෙනෙක් මිය ගොස් ඇති බව පොලිස් ආංචි මාර්ග අනාවරණය කරයි. මිය ගිය අය අතර බන්ධනාගාර නිලධාරීහු ද වෙති. තත්වය පාලනය කිරීම සඳහා විශේෂ බලඇණි යොදවා තිබේ. පොලිසියට බුද්ධි තොරතුරු සහ නිරීක්ෂණ දත්ත සැපයීම සඳහා ශ්රී ලංකා ගුවන් හමුදාව විසින් බෙල් 412 (Bell 412) හෙලිකොප්ටර් යානයක් සහ ඩ්රෝන යානා යොදවා ඇත.
මීගමුව රෝහල සඳහන් කළේ, මියගිය සහ තුවාල ලැබූ ඇතැම් අයගේ සිරුරුවල වෙඩි ප්රහාරවලින් සිදුවූ තුවාල දක්නට ලැබෙන බවයි. බන්ධනාගාර නිලධාරීන්ට තිදෙනෙකුට පහර දී ඝාතනය කර තවත් පිරිසකට බරපතල තුවාල සිදුකළ මෙම ගැටුමේ දී තත්ත්වය පාලනය කිරීමට නිලධාරීන්ට වෙඩි තැබීමට සිදුවී ඇති බව අනාවරණය වේ.
ඊයේ (05) පස්වරුවේ බන්ධනාගාරය තුළ ඇති වූ නොසන්සුන් තත්ත්වය මැදියම් රැය වන විට පාලනය කර තිබූ පසුබිමක අද උදෑසන බන්ධනාගාර නිලධාරීන් කණ්ඩායමක් බන්ධනාගාරය තුළට ඇතුළු වූ පසු ඔවුන්ට පහර දී ඝාතනය කිරීමෙන් පසු තත්ත්වය මේ තරම් දුරට පැතිරී ගොස් තිබේ.
අද සිදුවූ දේ
අද අලුයම් කාලයේ සන්සුන්ව සිටි රැඳවියන්, උදෑසන යළි සංවිධානාත්මකව බන්ධනාගාර නිලධාරීන්ට අමානුෂික ලෙස පහරදී ඔවුන්ගේ ජංගම දුරකථන ද පැහැරගෙන ඇත. ආරක්ෂක අංශ පවසන්නේ, බලධාරීන් බන්ධනාගාරය දැඩිව පාලනය කිරීමට විරෝධය පාමින් ඔවුන් මෙම පහරදීම සිදුකර ඇති බවය.
මෙම බන්ධනාගාරයේ විවිධ අපරාධ කල්ලිවලට සම්බන්ධ පාතාල සාමාජිකයන් 26 දෙනෙකු සිටින අතර, අද දින ඇති වූ මෙම මහා පරිමාණ ගැටුම මෙහෙයවා ඇත්තේ එහි දඬුවම් විඳිමින් සිටින “කටුවැල්ලේගම සුරේෂ්” නැමැත්තා බව ආරක්ෂක අංශ අනාවරණය කරයි.
මොහු ප්රකට පාතාල සාමාජිකයකු වන “කෙහෙල්බද්දර පද්මේ”ගේ සමීපතමයකු වන අතර, තියුණු ආයුධවලින් පහරදීම, මංකොල්ලකෑම්, මත්ද්රව්ය ළඟ තබාගැනීම සහ අලෙවිය සම්බන්ධයෙන් චෝදනා ලැබූවෙකි. එසේම 2016 වසරේදී නාරම්මල ප්රදේශයේ විහාරස්ථානයක භික්ෂූන් වහන්සේ නමකට සහ සහායකයාට පහරදී බැඳ දමා චෛත්යයකට හානි කිරීමේ චෝදනාව ද මොහුට එල්ල වී ඇත. මොහුට එරෙහිව මීගමුව මහාධිකරණයේ නඩුවක් විභාග වෙමින් පවතින අතර, දැනට මීගමුව මහේස්ත්රාත් අධිකරණයේ නඩුවකට අදාළව බන්ධනාගාරගතව සිටියි.
කළහකාරී ලෙස හැසිරුණු රැඳවියන් බන්ධනාගාර රෝහල කඩා එහි වූ ඖෂධ පැහැරගෙන ඇති අතර, ශරීර සුවතා මධ්යස්ථානයේ දොරටු කඩා එහි වූ යකඩ සිය ප්රචණ්ඩ ක්රියා සඳහා යොදාගෙන තිබේ.
කෙසේ වෙතත්, රැඳවියන් අවි පැහැරගනු ඇතැයි බලධාරීන්ට ඇති වූ සැකය මත ඊයේ රාත්රියේම අවි ගබඩාවේ තිබූ ගිනිඅවි ඉවත් කිරීමට බන්ධනාගාර නිලධාරීන් පියවර ගෙන තිබුණි.
කෙටිකාලීන සිරකරුවන් හා රිමාන්ඩ් සැකකරුවන් 1,800කට අධික පිරිසක් රඳවා සිටින මීගමුව බන්ධනාගාරයේ රැඳවියන් දෙපිරිසක් අතර ඊයේ පස්වරුවේ හටගත් ගැටුමකින් ද රැඳවියන් දෙදෙනෙකු මියගොස්, තවත් 34 දෙනෙකු තුවාල ලබා තිබුණි. මත්ද්රව්ය ජාවාරමක් පාවාදුන් බව කියන සිද්ධියක් මුල් කරගනිමින් එම ගැටුම ආරම්භ වී ඇති බව වාර්තා වේ.
