මීගමුව අධිකරණයේ ආරක්ෂාව සම්බන්ධයෙන් බරපතළ ගැටලුකාරී තත්ත්වයක් ඇති විය හැකි බවට බුද්ධි තොරතුරු ලැබී ඇතැයි අපරාධ පරීක්ෂණ දෙපාර්තමේන්තුව (CID) මීගමුව මහේස්ත්රාත් අධිකරණයට අද ( 07) ඍජුවම දැනුම් දුන්නේය.
මේ හේතුවෙන් පවතින ආරක්ෂක අවදානම සැලකිල්ලට ගෙන, ඉදිරි කටයුතුවලදී අදාළ නඩුවලට ඍජුවම සම්බන්ධ පුද්ගලයින් පමණක් අධිකරණ පරිශ්රය තුළට කැඳවීමට පියවර ගන්නා ලෙස අපරාධ පරීක්ෂණ දෙපාර්තමේන්තුව අධිකරණයෙන් හදිසි ඉල්ලීමක් කර ඇත. එම ඉල්ලීම කෙරෙහි දැඩි අවධානය යොමු කරමින් ඊට අදාළ අවශ්ය කටයුතු වහාම සූදානම් කරන ලෙස ප්රධාන මහේස්ත්රාත්වරයා ඇතුළු අදාළ පාර්ශ්ව වෙත මේ වන විටත් දැනුම් දී තිබේ.
මීගමුව බන්ධනාගාරයේ ඇති වූ නොසන්සුන්කාරී සිදුවීම සම්බන්ධයෙන් පුළුල් විමර්ශන පැවැත්වීම සඳහා අපරාධ පරීක්ෂණ දෙපාර්තමේන්තුවේ විශේෂ කණ්ඩායම් තුනක් පත් කර ඇති අතර, මෙම බුද්ධි තොරතුර අනාවරණය වී ඇත්තේ එම විමර්ශන අතරතුරදීය.
මේ අතර ශානි අබේසේකර ප්රමුඛ ජ්යෙෂ්ඨ නිලධාරින් කණ්ඩායමක් මීගමුව අධිකරණ පරිශ්රය වෙත පැමිණි අතර, එහිදී මහේස්ත්රාත්වරයාගේ නිල මැදිරිය තුළ විශේෂ ප්රකාශයක් සිදු කරනු ලැබීය. අපරාධ පරීක්ෂණ දෙපාර්තමේන්තුවේ අධ්යක්ෂවරයා කරන ලද විශේෂ ඉල්ලීමකට අනුව, ඒ අවස්ථාව වන විට අධිකරණ පරිශ්රයට පැමිණ සිටි විනිසුරුවරුන් සහ නීතිඥවරුන් ද මෙම මහේස්ත්රාත් නිල මැදිරිය වෙත වහාම කැඳවා මෙම ආරක්ෂක තත්ත්වය පිළිබඳව දැනුවත් කිරීමට පියවර ගැනුණි.
මීගමුව බන්ධනාගාරයේ පවතින තත්ත්වය මේ වන විට සම්පූර්ණයෙන්ම පාලනය කර ඇති අතර, ඇති වී තිබෙන බුද්ධි තොරතුරු සහ අධිකරණ ආරක්ෂක තත්ත්වය මත බන්ධනාගාරයෙන් පිටත මෙන්ම සමස්ත කලාපයේ ආරක්ෂාව තහවුරු කිරීම සඳහා පොලිසිය සහ පොලිස් විශේෂ කාර්ය බලකා (STF) කණ්ඩායම් කැඳවා ආරක්ෂාව දැඩි ලෙස තර කර ඇත.
