ඉඳුනිල් කහටපිටිය –
සුරේෂ් සලේ පිළිබඳව සොයා බැලීමට අධිකරණයෙන් පත් කළ වෛද්ය මඩුල්ල පිළිබඳව දැඩි ආන්දෝලනාත්මක විවේචනයක් සමාජ ජාලා මඟින් සිදු කිරීමින් එම වෛද්ය මණ්ඩලය ජවිපෙට පක්ෂපාතී එකක් බවට ශ්රී ලංකා පොදුජන පෙරමුණ ක්රියාකාරිකයෙක් වන සබරගමුව විශ්වවිද්යාලයේ කථිකාචාර්ය මහින්ද පතිරණ සිය අදහස් දැක්වීම පිළිබඳව කොන්දේසි විරහිතව අධිකරණයෙන් සමාව අයදින බවට වන සටහනක් සිය ෆේස්බුක් පිටුවේ පළ කර තිබේ.
“ සලේ පරීක්ෂා කරන වෛද්ය මණ්ඩලය කියලා පත් කරලා තියෙන්නේ පට්ටට JVP සෙට් එකක්. මේකෙන්ම පේනවා ආණ්ඩුව කරන බොරුව. ඔවුන්ට ස්වාධීන වෛද්ය මණ්ඩලයකට දාලා මේ ගැන අදහස් ගන්න බැහැ.” මහින්ද පතිරණ සිය ෆේස් බුක් ගිනුමේ අධිකරණය නියෝගයක් මත පත් කළ විශේඥ වෛද්ය මණ්ඩලය සම්බන්ධව රූපවාහිනී නාලිකාවක පලවූ ප්රවෘත්තියක ඡායාරූපයක් සමග පල කර තිබිණි.
කෙසේ වෙතත් පසුව ඔහු ප්රකාශ කොන්දේසි විරහිතව අධිකරණයෙන් සමාව ඉල්ලමින් කියන්නේ “එම වෛද්ය මණ්ඩලයට සාමාජිකයන් තේරීමේදී සහ නිර්දේශ කිරීමේදී අධිකරණයේ ස්වාධීන තීරණයකට වඩා විධායකයේ හෝ රජයේ දේශපාලන බලපෑමක් පවතින බවට මා වෙත ලැබුණු දෝෂසහගත තොරතුරු පදනම් කරගෙන එම විවේචනය සිදු කරන ලදී.” ලෙසය.
ඒ සම්බන්ධව ඔහු සමාව අයැද ඇති ලිපිය පහත දැක්වේ.
පැහැදිලි කිරීම සහ කොන්දේසි විරහිතව සමාව අයැදීම
ගරු මහේස්ත්රාත්තුමා වෙත,
කොටුව, මහේස්ත්රාත් අධිකරණය
කරුණාවෙන් සලකා බැලීම පිණිසයි,
විෂයය: මෑතකදී සිදුකළ ප්රසිද්ධ ප්රකාශයන් සම්බන්ධයෙන් කරුණු පැහැදිලි කිරීම සහ කොන්දේසි විරහිතව සමාව අයැදීම
මහින්ද පතිරණ වන මම, 2026 ජූනි 11 වැනි දින සිදු කරන ලද ප්රසිද්ධ අදහස් දැක්වීමක පසුබිම පැහැදිලි කිරීම සඳහාත්, එමඟින් අධිකරණයේ ගෞරවයට හෝ ස්වාධීනත්වයට කිසියම් හෝ හානියක් සිදුවූයේ යැයි හැඟී යන්නේ නම් ඒ පිළිබඳව ගරු අධිකරණයෙන් නිහතමානීව සහ කොන්දේසි විරහිතව සමාව අයැද සිටීම සඳහාත් මෙම ප්රකාශය ගෞරවයෙන් ඉදිරිපත් කරමි.
- ප්රකාශයේ පසුබිම: ඉහත සඳහන් කරන ලද දිනයේදී, සුරේෂ් සලේ මහතාගේ මානසික සෞඛ්ය තත්ත්වය පරීක්ෂා කිරීම සඳහා පත් කරන ලද වෛද්ය මණ්ඩලයේ සංයුතිය පිළිබඳව මම ප්රසිද්ධියේ අදහස් දැක්වීමක් කළෙමි. එම වෛද්ය මණ්ඩලයට සාමාජිකයන් තේරීමේදී සහ නිර්දේශ කිරීමේදී අධිකරණයේ ස්වාධීන තීරණයකට වඩා විධායකයේ හෝ රජයේ දේශපාලන බලපෑමක් පවතින බවට මා වෙත ලැබුණු දෝෂසහගත තොරතුරු පදනම් කරගෙන එම විවේචනය සිදු කරන ලදී.
- අභිප්රාය පැහැදිලි කිරීම: මෙහිදී මගේ විවේචනය මුළුමනින්ම එල්ල වූයේ රජයේ ක්රියාකලාපය සහ විධායකයේ මැදිහත්වීම කෙරෙහි පමණක් මිස, ගරු අධිකරණය වෙත නොවන බව මම ඉතා වගකීමෙන් ප්රකාශ කර සිටිමි. මම සැමවිටම අධිකරණයේ ස්වාධීනත්වය සහ අපක්ෂපාතීත්වය උපරිමයෙන් අගය කරන අයෙක්මි. කිසිදු අවස්ථාවක ගරු අධිකරණයේ අධිකාරී බලයට, ප්රඥාවට හෝ අපක්ෂපාතීත්වයට අභියෝග කිරීමට හෝ අපහාස කිරීමට මා තුළ කිසිදු චේතනාවක් නොතිබුණි.
- මහජන විශ්වාසය සහ අධිකරණයේ ස්වාධීනත්වය: මගේ ප්රකාශය මඟින් මම පෙන්වා දීමට උත්සාහ කළේ, ස්වාධීන මණ්ඩල සඳහා දේශපාලන නෑකම් ඇති පුද්ගලයන් පත් කිරීම තුළින් එම මණ්ඩලවල විශ්වාසනීයත්වයට සහ ඒ හරහා අධිකරණ තීන්දු කෙරෙහි මහජනතාව තබන විශ්වාසයට සිදුවිය හැකි බලපෑම පිළිබඳවයි. එය ජාත්යන්තර නීතිමය මූලධර්මයන්ට අනුව මහජන විශ්වාසයේ වැදගත්කම පිළිබඳ පුරවැසියෙකු ලෙස කළ අදහස් දැක්වීමකි. එසේ වුවද, මෙම පත්කිරීම් සිදුකර ඇත්තේ විධායකයේ බලපෑමෙන් තොරව, නීත්යානුකූල ක්රියාවලියකට අනුව ගරු අධිකරණයේ ස්වාධීන නියෝගයක් මත බව නිවැරදිව වටහා නොගැනීම පිළිබඳව මම කණගාටු වෙමි.
- කොන්දේසි විරහිතව සමාව අයැදීම: මා විසින් කරන ලද ප්රකාශ, ගරු අධිකරණයේ අභිමානයට හෝ ස්වාධීනත්වයට කැළලක් වන අයුරින් අර්ථකථනය වීමට ඉඩකඩ ඇති බැවින්, එහි බරපතලකම මම මැනවින් වටහා ගනිමි. එමඟින් ගරු අධිකරණයට යම් අපහසුතාවක් හෝ අගෞරවයක් සිදුවූයේ නම්, ඒ පිළිබඳව මගේ බලවත් කණගාටුව ප්රකාශ කරන අතර ගරු අධිකරණයෙන් මම කොන්දේසි විරහිතව සහ අවංකව සමාව අයැද සිටිමි. නීතියේ ආධිපත්යය, යුක්තිය පසිඳලීමේ ක්රියාවලියේ අභිමානය සහ අධිකරණ පද්ධතියේ පරිශුද්ධභාවය සුරැකීමට මම සැමවිටම බැඳී සිටින බව ගරු අධිකරණය හමුවේ සහතික කර සිටිමි.
ගෞරවයෙන් ඉදිරිපත් කරන්නේ,
මහින්ද පතිරණ, ජ්යෙෂ්ඨ කථිකාචාර්ය/ දේශපාලන විශ්ලේෂක සහ ලේඛක]
දිනය: 2026 ජූනි 12
