ඉන්දීය රජය පෙට්රල් සහ ඩීසල් සඳහා පනවා තිබූ බදු විශාල වශයෙන් අඩු කිරීමට පියවර ගෙන ඇතැයි විදේශ මාධ්ය වාර්තා කරයි. මේ අතරම ගුවන් යානා ඉන්ධන සහ ඩීසල් අපනයනය මත ‘වින්ඩ්ෆෝල්’ (Windfall) බදු පැනවීමට ද ඉන්දීය බලධාරීන් කටයුතු කර ඇත.
මෙම බදු කපා හැරීම නිසා රජයට අහිමි වන ආදායම කොපමණදැයි නිල වශයෙන් ප්රකාශ කර නැතත්, ලබන මාසයේ ප්රාන්ත හතරක සහ එක් මධ්යම පාලන ප්රදේශයක පැවැත්වීමට නියමිත මැතිවරණ ඉලක්ක කර ගනිමින් මෙම පියවර ගෙන ඇති බව දේශපාලන නිරීක්ෂකයෝ පවසති.
රොයිටර් පුවත් සේවය එම්කේ ග්ලෝබල් (Emkay Global) ආයතනයේ ආර්ථික විද්යාඥ මාධවී අරෝරා උපුටා දක්වමින් පෙන්වා දෙන්නේ මෙම බදු කප්පාදුව හරහා ඉන්දීය රජයට වසරකට රුපියල් ට්රිලියන 1.55ක පමණ ඇස්තමේන්තුගත මූල්ය පාඩුවක් සිදුවිය හැකි බවයි. කෙසේ වෙතත්, මෙමගින් තෙල් අලෙවි කරන සමාගම්වල වාර්ෂික පාඩුවෙන් 30% සිට 40% දක්වා ප්රමාණයක් පියවා ගැනීමට හැකිවනු ඇතැයි ඇය සඳහන් කරයි.
ඊයේ (27) ප්රකාශයට පත් කරන ලද රජයේ නියෝගයකට අනුව, ඉන්දීය මුදල් අමාත්යාංශය පෙට්රල් ලීටරයක් සඳහා වූ විශේෂ සුරාබද්ද රුපියල් 13 සිට රුපියල් 3 දක්වා (ඩොලර් 0.0318) අඩු කර ඇත. එසේම ඩීසල් ලීටරයක් සඳහා මෙතෙක් පැවති රුපියල් 10ක බද්ද සම්පූර්ණයෙන්ම ඉවත් කර (ශුන්ය කර) තිබේ.
තෙල් මිල ඉහළ යාම පිළිබඳව අදහස් දක්වමින් ඉන්දීය තෙල් අමාත්ය හර්දීප් සිං පූරි ‘X’ පණිවුඩයක් නිකුත් කරමින් කියා සිටියේ, ජාත්යන්තර මිල ගණන් අහස උසට නැග ඇති මෙවැනි අවස්ථාවක තෙල් සමාගම්වලට සිදුවන දැවැන්ත පාඩුව අවම කර ගැනීමටත් ජනතාවට සහන දීමටත් රජය තම බදු ආදායමෙන් විශාල කැප කිරීමක් කර ඇති බවය.
ඔහුට අනුව මේ වන විට පෙට්රල් ලීටරයකින් රුපියල් 24ක සහ ඩීසල් ලීටරයකින් රුපියල් 30ක පමණ පාඩුවක් තෙල් සමාගම්වලට විඳීමට සිදුව ඇත.
ඉන්දියාවේ ඉන්ධන මිල තාක්ෂණික වශයෙන් රජයේ පාලනයෙන් නිදහස් කර තිබුණද, සිල්ලර ඉන්ධන වෙළඳපොළෙන් 90%ක් පාලනය කරන රජයට අයත් තෙල් සමාගම් ලෝක වෙළඳපොළේ මිල ඉහළ යන සෑම විටම මිල වැඩි කරන්නේ නැත. මෙහි ප්රතිඵලයක් ලෙස මිල උච්චාවචනයන්ගෙන් පාරිභෝගිකයා ආරක්ෂා වන අතර එම පිරිවැය රජය හෝ තෙල් සමාගම් විසින් දරා ගනු ලබයි.
මුදල් අමාත්ය නිර්මලා සීතාරාමන් ප්රකාශ කළේ පෙට්රල්, ඩීසල් සහ ගුවන් යානා ඉන්ධන සැපයුමේ කිසිදු හිඟයක් ඇති නොවීමට රජය වගබලා ගන්නා බවයි. මිල ඉහළ යාමෙන් පුරවැසියන් ආරක්ෂා කිරීමට තෙල් සමාගම්වලට සහාය දෙන බවත් ගුවන් යානා ඉන්ධන මිල ඉහළ නොයන බවට සහතික වන බවත් ඇය ANI පුවත් ඒජන්සියට පවසා ඇත.
ලොව තෙවැනි විශාලතම තෙල් ආනයනකරු සහ පාරිභෝගිකයා වන ඉන්දියාව තම අවශ්යතාවයෙන් වැඩි ප්රමාණයක් ආනයනය කරයි. බ්රහස්පතින්දා නිකුත් කරන ලද තෙල් අමාත්යාංශයේ ලිපියකට අනුව, වාණිජ සහ කාර්මික පරිශීලකයන් සඳහා වන ද්රව පෙට්රෝලියම් ගෑස් (LPG) කෝටාව 20%කින් ඉහළ නංවා ඇති අතර, එමගින් මුළු සැපයුම අර්බුදයට පෙර තිබූ මට්ටමෙන් 70%ක් දක්වා ගෙන ඒමට අපේක්ෂා කෙරේ.
අගමැති නරේන්ද්ර මෝදි සහ ඔහුගේ රජය අවධාරණය කර සිටින්නේ, ඉදිරි ගිම්හාන වගා සමය සඳහා පොහොර සැපයුම සහ ඉහළ යන විදුලි ඉල්ලුම සපුරාලීමට ගල්අඟුරු සැපයුම ඇතුළු සියලු අත්යවශ්ය පහසුකම් සලසා ඇති බවයි.
