මතභේදයට තුඩු දුන් නිර්වින්දන ඖෂධය ඇතුලු බොහෝ ඖෂධ ලියාපදිංචි නොවූ සමාගම්වලින් ගෙන්වා ඇති බවට එල්ල කරන චෝදනා හෝ ඖෂධ ගෙන්වීමේ දි වෙනත් ඕනෑම අක්රමිකතාවයක් සිදුකර ඇති බවට එකම එක කරුණක් සම්බන්ධවව ඔප්පු කළහොත් තමන් එක මොහොතක් සෞඛ්ය අමාත්ය ධූරයේ රැඳී නොසිටින බව සෞඛ්ය ඇමති කෙහෙළිය රඹුක්වැල්ල අද (02) පැවසුවේය.
සෞඛ්ය අමාත්ය කෙහෙළිය රඹුක්වැල්ල මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (02) ජනාධිපති මාධ්ය කේන්ද්රයේ දී සංවිධානය කර තිබූ මාධ්ය හමුවේ දී මාධ්යවේදියෙක් නැගූ ප්රශ්නයකට පිළිතුරු දෙමිනි.
“සෑම ප්රසම්පාදනයකම ටෙන්ඩර් කැඳවීමක් කරලා තියනවා. එහෙම චෝදනාවක් තියනවා නම් සී.අයි.ඩී එක තියනවා. මම විවෘතව කියනවා. එක දෙයක් එහෙම කරලා තියනවා නම් එක මොහොතක් මේ අමාත්යාංශයේ ඉන්නේ නෑ.”
සෞඛ්ය ක්ෂේත්රයේ කඩේකට ගොස් බඩු ගන්නවා වගේ බෙහෙත් මිල දී ගන්න බෑ, සම්ප්රදායික ප්රසම්පාදන ක්රියාවලිය තුළ බෙහෙත් මිලදී ගැනීම් ක්රමවේදය සඳහා ඇනවුම්කර අඩුම තරමින් මාස 09ක කාලයක් ගත කළ යුතුයි. ඒ ක්රමය තුළ වැඩ කරන්න වුනා නම් මේ බෙහෙතක්වත් ලංකාවට එන්නේ නෑ. එහෙම උනානම් මුලු එම්.එස්.ඩී. එකම වහන්න වෙනවා. ඒකට විකල්පයක් විදිහට හදිසි මිලදී ගැනීම් කරන්න ගියාම කියනවා හදිසි මිලදී ගැනීම් කරන්න එපා කියලා. මේ චෝදනා එකිනෙකට පරස්පරයි. සාමාන්ය විදිහට ගියොත් ලබන අවුරුද්ද වෙනකොට රටේ බෙහෙත්වලින් සියයට අනූවක් නැතිවේවි. මේ බෙහෙත් ගෙන්වීමේ ක්රියාවලිය තුළ එක අක්රමිකතාවයක් වෙලා කියලා ඔප්පු කළොත් මම එක මොහොතක් සෞඛ්ය ඇමති ධූරයේ ඉන්නේ නෑ.”
අමාත්ය කෙහෙළිය රඹුක්වැල්ල කීවේය.
මෙහිදී වැඩිදුරටත් අදහස් දැක්වූ සෞඛ්ය අමාත්ය කෙහෙළිය රඹුක්වැල්ල මෙසේ ද පැවසීය.
“මෙය සෞඛ්ය ක්ෂේත්රය සම්බන්ධව රට තුළ විශේෂ අවධානයක් යොමු වී තිබෙන අවස්ථාවක්. නිදහස් සෞඛ්ය පිළිබඳව ශ්රී ලංකාවේ ඇති සුවිශේෂ කැපවීම ජාත්යන්තර සහ කලාපීය වශයෙන් ඇගයීමට ලක්ව තිබෙනවා.
ඒ නිසා වර්තමානයේ සෞඛ්ය ක්ෂේත්රයේ මතුව ඇති ගැටලු සම්බන්ධයෙන් ගතයුතු ක්රියාමාර්ග සහ එම ක්රියාමාර්ග මේ රටේ නිදහස් සෞඛ්ය ක්ෂේත්රයේ පැවැත්ම වෙනුවෙන් කුමන ආකාරයෙන් බලපානවාද යන්න පිළිබඳව රජය සුවිශේෂ අවධානයකින් කටයුතු කරනවා.
කොවිඩ් වසංගතයත් සමග මුළු ලෝකයේම සෞඛ්ය ක්ෂේත්රය දැඩි අභියෝගයකට මුහුණ දුන්නා. එදා සිට සෞඛ්ය ක්ෂේත්රය පැමිණියේ අසීරු ගමනක්. සාමාන්යයෙන් වෛද්ය සැපයුම් අංශය වසරකටවත් ප්රමාණවත් ඖෂධ ඇණවුම් කරනවා. එමෙන්ම වසරකට අවශ්ය ඖෂධ ගබඩා කර ගැනීම සාම්ප්රදායිකව සිදු කරනවා. ඒ වන විට රටේ මූල්ය ගැටලු පැවතුණේ නැහැ.
කොවිඩ් වසංගතය සමග ගුවන් හා නාවුක ගමන් ඇණ හිටීමත් සමග රටවලින් භාණ්ඩ හුවමාරුව නතර වුණා. ඒ වන විට කොවිඩ් වසංගතය පාලනයට ප්රමුඛත්වය ලබා දීමට සිදු වුණා. මෙහි ප්රතිඵලයක් ලෙස ඖෂධ ගබඩාකරණය පිළිබඳ කටයුතු මගහැරි ගියා.
කොවිඩ් අභියෝගයට සාර්ථකව මුහුණ දෙමින් අපි රට යළි යථා තත්ත්වයට පත්කරගෙන එන විට රටේ මහා දැවැන්ත අරගලයක් ඇති වුණා. මෙහි අවසන් ප්රථිඵලය ලෙස මහා අවුල් ජාලවකට රට පත්වුණා. ඒ නිසා ඖෂධ ඇනවුම් කිරීම පවා ප්රමාද වුණා.
ඖෂධ ගෙන්වීම සඳහා කුමන ක්රියාමාර්ග ගත්තත් එම ක්රියාවලිය අවසන් වීමට අවම වශයෙන් මාස 9ක පමණ කාලයක් ගත වෙනවා.මේ තත්ත්වය සම්බන්ධයෙන් අමාත්ය මණ්ඩලයට කරුණු පැහැදිළි කිරීමෙන් පසු වර්තමාන ජනාධිපතිතුමා එම තත්ත්වය මැනවින් අවබෝධ කරගෙන මුදල් අමාත්යාංශය සමඟ සාකච්ඡා කර ඖෂධ ගෙන්වීම සඳහා කඩිනම් වැඩපිළිවෙළක් සකස් කළා.
යම් යම් අඩුපාඩු තිබුණත් ඖෂධ පිළිබඳව මතුව ඇති මෙම තත්ත්වය පාලනය කළ හැකි මට්ටමේ පවතින බව පැවසිය යුතුයි. මෙම තත්ත්වයන් නිවැරදි කරගෙන ඉදිරියට යාමේ වැඩපිළිවෙළ දැන් සෞඛ්ය අමාත්යාංශය ආරම්භ කර තිබෙනවා. ඉදිරියේදී මේ පිළිබඳ සවිස්තරාත්මක වාර්තාවක් කැබිනට් මණ්ඩලයට ඉදිරිපත් කිරීමට කටයුතු කර තිබෙනවා.
තාවකාලිකව මතුව ඇති ඖෂධ හිඟය නිවැරදි කර ගැනීමට ක්රියාමාර්ග ගණනාවක් මේ වන විට රජය ගෙන තිබෙනවා. මේ වන විට ඖෂධ වර්ග 19ක් අපි අලුතින් නිෂ්පාදනය කරනවා. ලබන කාර්තුව වන විට මෙයට තව ඖෂධ වර්ග 17ක් එකතු කිරීමට අපි බලාපොරොත්තු වෙනවා. ඊළඟ වසර දෙක තුළ දේශීයව නිෂ්පාදනය කරන ඖෂධ ප්රමාණය 30% – 35%ක ප්රමාණයකින් ඉහළ දැමීමට අපි අපේක්ෂා කරනවා.
