නීතිවිරෝධී ලෙස එකලස් කරන ලද සුඛෝපභෝගී වාහනයක් සන්තකයේ තබා ගැනීම සම්බන්ධයෙන් ප්රකාශයක් ලබාදීම සඳහා අපරාධ පරීක්ෂණ දෙපාර්තමේන්තුවට පැමිණි හිටපු පාර්ලිමේන්තු මන්ත්රී ජොන්ස්ටන් ප්රනාන්දු අත්අඩංගුවට ගෙන ඇති බව පොලිස් මාධ්ය ප්රකාශකවරයා පවසයි.
කොළඹ හිල්ටන් හෝටලයේ රථ ගාලේ තිබී සොයා ගත් මෙම බී.එම්.ඩබ්ලියු රථය අනීතික ලෙස එකලස් කර ලියාපදිංචි නොකර තබාගෙන බදු වංචා කළ රථයක් බවත්, මෙම රථය ජොන්ස්ටන් ප්රනාන්දු අයත් එකක් බවත් පොලිසිය මූලික විමර්ශනවලදී සොයා ගත්තේය.
එමෙන්ම මේ වාහනය සඳහා සවිකර තිබූ ගරාජ් අංක සහිත අංක තහඩුව ද වෙනත් වාහනයකින් සොරකම් කරගෙන සවි කළ එකක් බව අනාවරණය විය.
මේ සම්බන්දව ප්රකාශයක් ලබා ගැනීමට ජොන්ස්ටන් ප්රනාන්දුට අවස්ථා ගණනාවක දී අපරාධ පරීක්ෂණ දෙපාර්තමේන්තුවට එන ලෙස දන්වා සිටිය ද අපරාධ පරික්ෂණ දෙපාර්තමේන්තුව මග හැර තමන් පදිංචි ස්ථාන පවා වෙනස් කරමින් සිටි බව අපරාධ පරීක්ෂණ දෙපාර්තමේන්තුව කීවේය.
විමර්ශන කටයුතු සම්බන්ධව අත් අඩංගුවට ගැනීම වැළැක්වීම සඳහා ඔහු ඊයේ අපේක්ෂිත ඇප අයදුම්පතක් අභියාචනාධිකරණයට ඉදිරිපත් කළ විට අධිකරණය නියෝග කළේ අපරාධ පරීක්ෂණ දෙපාර්තමේන්තුව හමුවේ පෙනි සිට ප්රකාශයක් ලබා දීමෙන් අනතුරුව අපේක්ෂිත ඇප අයදුම්පත ඉදිරිපත් කරන ලෙසත්, එවිට එම ඉල්ලීම ගැන සලකා බැලිය හැකි බවත්ය.
ඒ අනුව අධිකරණ නියොග මත ජොන්ස්ටන් ප්රනාන්දු ප්රකාශයක් ලබා දීම සඳහා අපරාධ පරීක්ෂණ දෙපාර්තමේන්තුවට පැමිණියේය. එහිදී ඔහුව අත් අඩංගුවට ගැනීමට අපරාධ පරීක්ෂණ දෙපාර්තමේන්තුව කටයුතු කළේය.
අල්ලස් නඩුවකට පෙනී නොසිටීම හේතුවෙන් අද උදේ කොළඹ මහාධීකරණය ඔහුව අත් අඩංගුවට ගෙන අධිකරණයට ඉදිරිපත් කරන ලෙසට වරෙන්තුවක් ද නිකුත් කළේය.
