සූරියවැව නුවන් ජයසේකර
සූරියවැව වැවේගම ප්රදේශයේ නිවසකින් රාත්රියේදී වතුර මෝටරයක් සොරකම් කරගෙන යමින් සිටියදී ගම්වැසියන් විසින් අල්ලා ගන්නා ලද සැකකරුවන් තිදෙනෙකුට ගම්වැසියන් විසින් සිදුකල පහරදීමක් හේතුවෙන් ඊයේ (01) එක් අයෙකු මියගොස් තවත් දෙදෙනෙකු තුවාල ලබා රෝහල ගත කර ඇතැයි සූරියවැව පොලිසිය පවසයි.
සූරියවැව පොලිස් වසමේ වැවේගම, සූරියවැව ලිපිනයේ පදිංචි විජේසේකර පතිරණගේ රංග ප්රසාද් යන අයගේ නිවසේ තිබූ වතුර මෝටරයක් ප්රදේශයේ තිදෙනෙකු විසින් සොරකම් කරගෙන යමින් සිටියදී ගම්වැසියන් විසින් ඔවුන්ව අල්ලාගෙන තිබේ. එහිදී වතුර මෝටරය රැගෙන යමින් සිටියදී ගම්වැසියන් පසුපස එළවාගෙන යාමේදී වතුර මෝටරය සමඟ බිම ඇද වැටුණු එක් සැකකරුවකුගේ කකුලක් මතට වතුර මෝටරය වැටීමෙන් කකුල කැඩීගොස් තිබේ. එහිදී ගම්වැසියන් විසින් අල්ලාගන්නා ලද සැකකරුවන් තිදෙනාට ගම්වැසියන් විසින් දැඩි ලෙස පහරදී පොලිසියට භාර දී තිබේ.
සොරකම සම්බන්ධයෙන් මෙලෙස පොලිස් අත්අඩංගුවට ගෙන ඇත්තේ සූරියවැව වැවේගම ප්රදේශයේ පදිංචිකරුවන් දෙදෙනෙකි.
පොලිස් අත්අඩංගුවට පත්වන අවස්ථාව වන විට සැකකරුවන්ට ගම්වැසියන් විසින් පහර දි තිබීම නිසා පොලිස් නිලධාරීන් විසින් සැකකරුවන් තිදෙනා පොලිස් ආරක්ෂාව යටතේ ප්රතිකාර සඳහා සූරියවැව ප්රාදේශීය රෝහලට ඇතුළත් කර තිබේ. එහිදී අසාධ්ය තත්වයේ පසු එක් සැකකරුවකු ඊයේ (01) අළුයම වැඩිදුර ප්රතිකාර සඳහා පොලිස් ආරක්ෂා යටතේ මාතර මහ රෝහල වෙත මාරු කර යවා තිබේ. එහිදී සැකකරු අළුයම 05ට පමණ මාතරට රැගෙන යමින් සිටියදි මිය ගොස් තිබේ.
ප්රදේශවාසීන් පවසන්නේ මේ වන විට ප්රෙද්ශයේ නිවාස රැසකම තිබූ ටීවී, විදුලි පංකා, වතුර මෝටර් ඇතුළු උපකරණ සොරුන් විසින් රැගෙන ගොස් ඇති බවත් කිසිදු දෙයක් නිවසක තබාගැනීමට නොහැකි තරමට පත්ව ඇති බවත්ය.
සිද්ධිය සම්බන්ධයෙන් තංගල්ල කොට්ඨාශභාර ජ්යෙෂ්ඨ පොලිස් අධිකාරී කේ.බී.කීර්තිරත්න, සූරියවැව පොලිස් ස්ථානාධිපති ප්රධාන පොලිස් පරීක්ෂක අනුර සුසන්ත යන අයගේ උපදෙස් පරිදි පොලිස් පරීක්ෂක ලලිත් ඇතුළු නිලධාරීන් කණ්ඩායමක් විසින් වැඩිදුර පරීක්ෂණ පවත්වනු ලැබේ.
