කහවත්ත – තුෂාර හෙට්ටිආරච්චි –
පාලන මිල ඉවත් කිරීමත් සමග වෙළෙන්දන් හිතූ මිල ගණන්වලට සිමෙන්ති විකිණීම ආරම්භ කර ඇතැයි වාර්තා වේ. මේ වන විට කහවත්ත මාදම්පෙ පැල්මඩුල්ල සහ ගොඩකවෙල වැනි නගර මෙන්ම නගරවලින් බැහැර ගම්මානවල පිහිටි ගොඩනැගිලි ද්රව්ය වෙළඳසැල් වල කිලෝග්රෑම් පනහක සිමෙන්ති මිටියක් අළෙවි රුපියල් 1250/= – 1350/= ක් අතර මිළකට අලෙවි වෙමින් ඇත.
රජයෙන් සඳහන් කළ මිළ වැඩි කිරීමට අනුව සිමෙන්ති සිමෙන්ති මිටියක් රුපියල් 1098/= ක් විය යුතුව තිබුණි. ඒ අනුව වැඩිවිය යුතු මිල වූයේ රුපියල් 98/= කි. නමුත් ඒ පිළිබඳව කිසිදු තැකීමක් නොකර වෙළෙන්දන් මිල තීන්දු කිරීම තමන් යටතට ගෙන ඇති බවට පැමිණිලි ලැබෙමින් ඇතැයි පාරිභෝගික අංශ කියයි.
“බොහෝවිට වෙළඳසැල් තුළ සිමෙන්ති සඟවාගෙන ඔවුන් විශ්වාසවන්ත අයට පමණක් වැඩි මිලට අලෙවි කරනවා. බිල්පත් නිකුත් කරන්නෙත් නෑ. සිමෙන්ති ලබා ගෙන ඒ සඳහා බිල්පතක් ඉල්ලා සිටින විට ” ටයිල් මෝටා” යනුවෙන් සඳහන් කර බිල්පත් ලබා දෙනවා. සමහර වෙළෙන්දන් ලොරි රථවල තබා ගෙන අතර මග දී සිමෙන්ති අළෙවි කරනවා.“
පාරිභෝගිකයින් රැසක් ලංකාසරට පැවසීය.
සිමෙන්තිවලින් සිදුකරන ගසාකෑම සම්බන්ධයෙන් පාරිභෝගික සේවා අධිකාරියේ නිලධාරීන් දැනුවත් කළද මෙතෙක් කිසිදු පිළිසරණක් ලැබී නොමැතිබව ද ඔවුහු චෝදනා කරති.