ඉතිහාසය පුරා මෙරට රාජ්ය පාලනයට මඟ පෙන්වූ මහා සංඝරත්නය, වත්මන් සමාජ-ආර්ථික අර්බුද හමුවේ යළිත් වරක් සිය අපරිමිත මානුෂීය මෙහෙවර ප්රායෝගිකව ඔප්පු කර පෙන්වා ඇත. අද (01) දිනයේ මහනුවර සංචාරයක නිරත වූ ජනාධිපති අනුර කුමාර දිසානායක මල්වතු සහ අස්ගිරි මහා නායක හිමිවරුන් බැහැදුටු අවස්ථාවේදී, දිට්වා සුළි කුණාටුවෙන් විපතට පත් වී නිවාස අහිමිවූ ජනතාව වෙනුවෙන් ඉඩම් ලබා දීම පිළිබඳ වැදගත් තීරණ කිහිපයක් ප්රකාශයට පත් විය.
-
මල්වතු මහා නායක හිමියන්ගේ පරිත්යාගය
මල්වතු පාර්ශවයේ මහා නායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහා නායක හිමිපාණන් වහන්සේ විසින්, මල්වතු මහා විහාරයට අයත් පර්චස් 130ක භූමි භාගයක් ජනතාව නැවත පදිංචි කිරීමේ කටයුතු සඳහා රජයට පවරා දීමට පියවර ගත්හ. එම ඉඩමේ ඔප්පුව මහා නායක හිමියෝ ජනාධිපතිවරයා අතටම පිළිගැන්වූහ.
මෙම අක්කරයකට ආසන්න ඉඩම පරිත්යාගයේ අරමුණ වූයේ දිට්වා සුළි කුණාටුව හේතුවෙන් නායයෑම් ඇතුළු විවිධ ආපදාවලට ලක්වූ සහ නිවාස අහිමි පවුල් සඳහා සුදුසු නිවාස ව්යාපෘතියක් ඉදිකිරීමය.
විහාර සතු ඉඩම් මහජන ප්රයෝජනය සඳහා මෙලෙස නිදහස් කිරීම සංඝයා වහන්සේ සහ ජනතාව අතර ඉතිහාසගතව පැවති අවියෝජනීය සම්බන්ධතාවය යළිත් වරක් සංවේදී ලෙස ඉස්මතු වූ අයුරු දුටුවෙමු.
-
දළදා මාළිගාවෙන් අක්කර 200ක දැවැන්ත ප්රදානයක්
මීට සමගාමීව ශ්රී දළදා මාළිගාවේ දියවඩන නිළමේ ප්රදීප් නිලංග දෑල විසින් තවත් සුවිශේෂී ප්රකාශයක් සිදු කරන ලදී. ජනාධිපතිවරයා ඒ සම්බන්ධව මල්වතු මහා නායක හිමියන් සමග ද සාකච්ඡ කළේය. ඒ අනුව දළදා මාළිගාව සතු ඉඩම්වලින් අක්කර 200ක ප්රමාණයක් ජනතාව යළි පදිංචි කරවීම සඳහා ලබා දී තිබේ. ඒ පිටිගොඩ ප්රදේශයෙනි. ඒ ඉඩම් ප්රමාණය උඩුනුවර ප්රදේශයේ ව්යසනයට පත් ජනතාව පදිංචි කිරීමට ප්රමාණවත්ය. ජනාධිපතිවරයා මල්වතු මහා නායක හිමියන්ට පැවසුවේ දිසාපතිවරයා දැනටමත් එම ඉඩම් පවරා ගැනීමේ කටයුතු ආරම්භ කර ඇති බවය.
දිට්වා සුළි කුණාටුවෙන් පූර්ණ වශයෙන් හානි වූ නිවාස ගණන 4,500 ඉක්මවන්නේය. අර්ධ වශයෙන් හානි වූ නිවාස සංඛ්යාව 76,000 ඉක්මවා ගොස්ය. තවත් නිවාස ප්රමාණයක් අවදානම් භූමිවල පිහිටා ඇත්තේය. එම නිවාසවලට හානි වී නැතත් නැවත පදිංචි විය නොහැකිය. පූර්ණ වශයෙන් හානි වී ඇති අවදානමක් කලාපයන්හි පැවතුන නිවාස ඉදිකිරීම වෙනුවෙන් ඉඩම් අවශ්යය. එම ඉඩම් ගොඩනැගිලි පර්යේෂණ සංවිධානයේ අධීක්ෂණයට ලක්ව අනතුරු රහිත බව තහවුරු විය යුතුය. එම ජනතාව ජීවත් වූ පරිසරයට නුදුරින්ම ඔවුන් යළි ස්ථාවර කළ යුතුය.
මේ අර්ථයෙන් දැවැන්ත ආපදාවකට ලක් වූ මහනුවර දිස්ත්රික්කයේ ජනතාව වෙනුවෙන් ගැඹුරු ප්රවේශයක් දළදා මාළිගාව විසින් දක්වා තිබේ. අනෙක් අතින් මහනුවර නගරය සහ අවට ඉඩම්වලින් අති බහුතරයක ප්රමාණයක් රජ කාලයේ සිට පැවත එන්නේ දළදා මාළිගාව සහ මල්වතු අස්ගිරි පන්සල් භාරකාරිත්වය යටතේය.
මෙම ඉඩම් නිසි පරිදි හඳුනාගෙන, විනිවිදභාවයකින් යුතුව සුදුසුකම් ලත් ප්රතිලාභීන් තෝරා ප්රදානය කිරීම සඳහා රජය විසින් විශේෂ කමිටුවක් හරහා කටයුතු කිරීමට නියමිතය. ජනාධිපතිවරයා මහා නායක හිමිවරුන් වෙත සහතික වූයේ මෙම උතුම් පරිත්යාගය කිසිදු දේශපාලන අරමුණකින් තොරව නියමිත ජනතාව වෙතම ළඟා කරවන බවය.
ආපදාවක් මහා සමාජ මානුෂීය ප්රවේශයන් විවර කරන්නේ ඒ ආකාරයටය.
