ප්රකට ව්යාපාරික නායක දිනේෂ් ෂාෆ්ටර් සිය දිවි නසා ගෙන ඇති බවට විමර්ශන අංශවලට සැක පහළ වී ඇති බව වාර්තා වේ.
සිය දිවි නසා ගැනීම සම්බන්ධ සැකය
මේ සැකය මුලින්ම ඇති වී තිබෙන්නේ දිනේෂ් ෂාෆ්ටර් ගේ ගෙලේ ගැටගසා තිබූ වයර් කැබැල්ලට සමානකම් දක්වන වයර් කැබැල්ලක් පසුගිය සෙනසුරාදා ඔහුගේ නිවස පරීක්ෂා කළ රස පරීක්ෂක දෙපාර්තමේන්තු නිලධාරීන්ට ඔහුගේ නිවසින් හමුවී තිබීම නිසා යැයි කියැවේ.
එමෙන්ම ඔහුගේ අත් සිරකර තිබූ ආකාරයේ ප්ලාස්ටීක් ලොක් ඔහුගේ කාමරයේ තිබී හමුවී ඇති බවත් වාර්තා වේ.
ඒ සම්බන්ධයෙන් නිශ්චිතව තහවුරු කරගැනීම සඳහා රජයේ රස පරීක්ෂක දෙපාරතමේන්තු නිලධාරීන් මේ වනවිටත් කටයුතු කරමින් සිටින බව දැනගන්නට ඇත.
ෂාෆ්ටර් බොරැල්ල කනත්තේ සිය මෝටර් රථය තුළ රියදුරු අසුනේ සිටයදී සොයාගන්නා විට දෑත් ගැට ගසා වයරයකින් ගෙල තද කර තිබූ බව පොලිස් වාර්තාවල සඳහන් වෙයි.
එමෙන්ම ෂාෆ්ටර් සිය නැන්දනියට ලියන ලද ලිපියක් කෙරෙහි විමර්ශකයින්ගේ අවධානය යොමුව ඇති අතර ” මේ වගේ හොඳ දුවක් හදලා මට ලබාදුන් අම්මාට බොහොම ස්තුතියි” යන අදහස සහිත හැඟීම්බර අදහස් එහි අන්තර්ගත බව සඳහන්ය.
එමෙන්ම ඇයට යවන ලද එම අදහස් සහිත කෙටි පණිවිඩයක් සම්බන්ධයෙන්ද විමර්ශකයන්ගේ අවධානය යොමු වී තිබේ.
ෂාෆ්ටර් පසුගිය 15 වැනිදා බොරැල්ල කනත්තට ගොස් ඇත්තේ බිරිය සමග එංගලන්තය බලා යාමට හෝරා කිහිපයක් තිබියදීය.
එහිදී ඔහු මෝටර් රථය ස්ථානගත කර ඇත්තේ සුසාන භූමියේ ”අනාථ පැත්ත” ලෙස හඳුන්වන ප්රදේශයේය. එම ප්රදේශය පැති තුනකින් ආවරණය වන ස්ථානයක් බවට හඳුනාගෙන තිබේ.
සමාගම් කිහිපයක හිමිකරුවකු වන දිනේෂ් ෂාෆ්ටර් සිදුකරන ලද ව්යාපාර කටයුතුවලට රුපියල් කෝටි ගණනක් මුදල් ආයෝජනය කළද එම මුදල් බලාපොරොත්තු වූ පරිදි නැවත ලබා ගැනීමට නොහැකි වීමෙන් ඔවුගේ ව්යාපාර දිනෙන් දින පාඩු ලබා ඇතැයි මේ වන විට අනාවරණ වූ තොරතුරු අතර ඇතැයි කියැවේ.
පවුලේ සමීපතමයින්ගේ ප්රකාශවලින් හෙළිවී ඇත්තේ නුවරඑළිය ප්රදේශයෙන් මිලදීගත් රුපියල් කෝටි 300 ක් පමණ වටිනා ඉඩමක් පළාත්බද මාර්ග සංවරධන අධිකාරියට පවරා ගෙන ඇති බවය.
යාපනය ප්රදේශයේ මන්ත්රීවරයෙකු සම්බන්ධ වී සිදුකළ ව්යාපාරයකට ආයෝජන කළ කෝටි 85 ක මුදලක් ද නැවත ඔහු වෙත නොලැබීමත්, ක්රිකට් විස්තර විචාරක බ්රයන් තෝමස් වෙත ලබා දුන් රුපියල් කෝටි 160 ක මුදල සම්බන්ධයෙන් පවතින ගැටලුකාරී තත්වය සහ තවත් කෝටි ගණනාවක ව්යාපාරික ගනුදෙනුවලින් රුපියල් කෝටි 2,000 ක් පමණ ඔහුට පාඩු සිදුවී ඇති බවය.
එසේම ඔහු පදිංචිව සිටි කුරුඳුවත්ත මල් පාරේ නිවස විකිණීම සඳහා පුවත්පතක දැන්වීම් පළකර තිබූ බවත් පවුලේ සමීපතමයන්ගේ ප්රකාශවලින් අනාවරණ වී තිබේ.
දිනේෂ් ෂාෆ්ටර් දිවි නසාගත්තේද යන්න සම්බන්ධයෙන් සැක මතු වන්නේ මේ නිසා බව වාරතා වේ.
ඝාතනයක් ද?
කෙසේ වෙතත් ඔහුගේ මරණ පරීක්ෂණ වාර්තාවට අනුව ඔහු මියගොස් ඇත්තේ පිටුපස සිට ගෙළ තද කිරීමකින් බව අධිකරණ වෛද්ය වාරතාවල සඳහන් බව පැවසිනි.
එමෙන්ම ඔහු බොරැල්ල කනත්තට පැමිණ ඇත්තේ කොළඹ 07 ගුණපාල මළලසේකර මාවතේ රොඩ්රිගෝස් ලෙජන්ඩ්රි ෆ්ලේවර් අලෙවිසලෙන් කෙටි කෑම පාරසල් දෙකක් ද සමගය. ඉන් එක් කෙටි කෑම කොටසක් ඔහු විසින් අනුභව කර ඇති බවත් පශ්චාත් මරණ පරීක්ෂණයේ දී හෙළි වී ඇත. අනෙක් කෑම පාර්සලයට සිදුවූ දෙයක් ගැන තවම දන්නේ නැත.
ඔහු බේරා ගැනීමට පැමිණි කනත්තේ සේවකයාගේ ප්රකාශය අනුව අත් සහ ගෙල තදින් ගැටගසා තිබී ඇත. එමෙන්ම වාහනය අසල සිට වේගයෙන් කෙනෙක් නික්ම යන අයුරු ඔහු දැක තිබූ බව මාධ්යයට කීවේය.
තවද බ්රයන් තෝමස් හමුවීමට අවශ්ය බව දන්වමින් ඔහු වෙත කෙටි පණිවිඩය යවා ඇත්තේ ෂාෆ්ටර් ට අනතුර සිදුවූ පසුව දැයි මුලින්ම විමර්ශන අංශවලට සැක පහළ වී තිබිණි.
දිනේෂ් ෂාෆ්ටර් ගේ මරණය සම්බන්ධයෙන් අපරාධ පරීක්ෂණ දෙපාර්තමේන්තුවේ මනුෂ්ය ඝාතන සහ සංවිධානාත්මක අපරාධ විමර්ශන කොට්ඨාසයෙන් විමර්ශන ක්රියාත්මකව පවතී.
