මනම්පිටිය – නිමල් ජයරත්න –
තම විහාරස්ථානයට ගිනි අවි හා මත්ද්රව්ය ගෙනවිත් දමා තමන් නැවත වරක් සිරගත කිරීමට සිවිල් ආරක්ෂක බලකායේ ඇතැම් නිලධාරීන් රහසිගත වැඩපිළිවෙළක් දියත් කර ඇති බවට තමාට තොරතුරු ලැබී ඇතැයි මඩකලපුව මංගලාරාමාධිපති අම්පිටියේ සුමනරතන හිමියෝ පවසති.
මේ පිළිබඳ ජනාධිපතිවරයාගේත්, ආරක්ෂක අමාත්යවරයාගේ සහ ආරක්ෂක ලේකම්වරයාගේත් කඩිනම් අවධානය යොමු විය යුතු බවත්, තමන්ට මෙන්ම විහාරස්ථානයට විධිමත් ආරක්ෂාවක් සලසන ලෙසත් අම්පිටියේ සුමනරතන හිමියෝ ඉල්ලා සිටිති.
උන්වහන්සේ මේ බව ප්රකාශ කළේ අද ( 23 ) මාධ්ය සාකච්ඡාවක් කැඳවමිනි.
උන් වහන්සේ පෙන්වා දෙන්නේ දෙස් විදෙස් පරිත්යාගශීලීන් සහ දායකකාරකාදීන්, ලබාදුන් මුදල්වලින් ඉදිකරගත් දාන ශාලාව සහ විශ්රාම ශාලාව වන අලින් විසින් විනාශ කළේ සිවිල් ආරක්ෂක භටයින් 04 දෙනෙක් ආරක්ෂාවට යොදවා සිටියදී, බවය. හානියට පත් ගොඩනැගිලි ඉදි කර ගැනීමට සිවිල් ආරක්ෂක බලකායෙන් ශ්රමදායකත්වය ලබාදෙන බවට පොරොන්දු වුවද, එම බලකායේ කිසිදු උසස් නිලධාරියෙකු තම දුරකථන ඇමතුම්වලට කිසිදු ප්රතිචාරයක් නොදක්වන සුමනරතන හිමියෝ පැවසූහ.
,මීට පෙරද තමාගේ හිසට වෙඩි තබන්නට උත්සාහ කළ අවස්ථාවේදී පවා සිවිල් ආරක්ෂක බලකායෙන් සිටියද වෙඩි තැබූ පුද්ගලයන් පිළිබඳව මෙතෙක් කිසිදු තොරතුරක් නොමැති වීම පිළිබඳව රටේ ආරක්ෂක ලේකම්වරයාගේ අවධානය වහා යොමු විය යුතු බව උන්වහන්සේ කීහ.
වසර තිහක් පැවති කුරිරු යුද්ධයට තමන් වහන්සේ ද මුහුණ දුන් බවත් යුද්ධයෙන් බැටකා ප්රදේශයේ ජනතාව සමග නොබියව සිට මඩකලපුවේ විහාරස්ථාන 14 ක් ආරක්ෂා කරගත් බවත් සුමන රතන හිමියෝ සිහි කළහ,
පැවැති සෑම රජයක්ම නැගෙනහිර පළාතේ වෙහෙර විහාරස්ථානවලට මෙන්ම තම විහාරස්ථානයට කුඩම්මගේ සැලකිලි දැක්වූ බව කී සුමනරතන හිමියන් නැගෙනහිර පළාතේ පුරාවිද්යා ස්ථාන යම් යම් සංවිධාන විනාශ කලද ඊට කිසිදු අවධානයක් නොමැති බවට ද චෝදනා කළහ.
වෙනසක් සිදුකරන බවට වත්මන් රජයෙන් පොරොන්දු වුවද, මෙතෙක් නැගෙනහිර පළාතේ වෙහෙර විහාර සංවර්ධනය කිරීමේදීත්, නැගෙනහිර පළාතේ යටිතල පහසුකම් සංවර්ධන කටයුතුවලදී මෙන්ම ,සිංහල ජනතාවගේ මූලික අයිතිවාසිකම් ලබාගැනීමේදීත්, විවිධ රාජ්ය අංශ නිලධාරින්ගේ තාඩන පීඩනවලට ඔවුන් ලක්වන බව සුමනරතන හිමියෝ කීහ.
ඒ පිළිබඳව අනුර කුමාර දිසානායක ජනාධිපතිවරයාගේ අවධානය වහා යොමු වියයුතු බවත්, තම ඉල්ලීම්වලට ඉක්මන් විසඳුම් ලබා නොදුනහොත් ජනාධිපතියවරයා විදේශීය සංචාරය නිමකර ශ්රී ලංකාවට පැමිණි වහාම තමා කොළඹට පැමිණ මුණ ගැසී කරුණු කාරණා ඉදිරිපත් කිරීමට වැඩපිළිවෙලක් සකසා ගෙන ඇති බවත් සුමනරතන නාහියෝ මෙහිදී අවධාරණය කළහ.
