පසුගිය අළුබඳුන (Ashes) තරගාවලියේදී සහ නවසීලන්ත සංචාරයේදී ක්රීඩකයින් පෙන්වූ විනය විරෝධී හැසිරීම් හේතුවෙන්, මෙම ශීත කාලයේ ඉතිරි වකවානුව සඳහා එංගලන්ත ක්රිකට් ක්රීඩකයින්ට මධ්යම රාත්රී 12 සිට බලපැවැත්වෙන පරිදි ඇඳිරි නීතියක් (Curfew) පැනවීමට එංගලන්ත ක්රිකට් ආයතනය තීරණය කර ඇත.
ශ්රී ලංකාව සමඟ පැවැත්වෙන සීමිත පන්දුවාර තරගාවලිය සහ ලබන මාසයේ පැවැත්වෙන විස්සයි විස්ස ලෝක කුසලානය සඳහා අපේක්ෂිත හැසිරීම් රටාවන් පිළිබඳව නිල නිවේදනයක් නිකුත් නොකළද, කොළඹට පැමිණි වහාම තමන් ජාත්යන්තර ක්රීඩකයින් ලෙස වගකීමෙන් කටයුතු කළ යුතු බව ඔවුන්ට මතක් කර දෙනු ඇතැයි ‘ඩේලි මේල් ස්පෝර්ට්’ (Daily Mail Sport) පුවත්පත වාර්තා කරයි.
හැරී බෲක්ගේ නායකත්වයෙන් යුත් එංගලන්ත සංචිතයට අනුගමනය කිරීමට සිදුවන එක් ප්රධාන මාර්ගෝපදේශයක් වන්නේ, පූර්ව අවසරයක් නොමැති නම් සෑම දිනකම මධ්යම රාත්රී 12ට පෙර සියලුම ක්රීඩකයින් කණ්ඩායම් හෝටලයට වාර්තා කළ යුතු වීමයි.
නවසීලන්තයේදී ලැබූ 3-0ක එක්දින තරගාවලි පරාජය සහ ඕස්ට්රේලියාවේ සති හතක සංචාරයේදී ලැබූ 4-1ක ටෙස්ට් තරගාවලි පරාජය අතරතුර ක්රීඩකයින් මත්පැන් පානය කර සිදුකළ විවිධ සිදුවීම් කණ්ඩායමේ ගෞරවයට හානි කළේය. ඔවුහු ජාතිය නියෝජනය කරන තානාපතිවරුන් බව නොසිතා ප්රකට කළ හැසිරීම එංගලන්තයේ පමණක් නොව, ලෝක ක්රිකට් ලෝලීන්ගේ ද අප්රසාදයට ලක් වුයේය.
අළුබඳුන තරගාවලිය අතරතුර “නූසා” (Noosa) හි ගත කළ දින හයක විවේකයකදී, බෙන් ඩකට් බීමතින් තමන් සිටින්නේ කොහේදැයි යන්න පවා නිශ්චය කරගත නොහැකිව සිටින වීඩියෝ දර්ශන සමාජ මාධ්යයට එක්විය. එමෙන්ම පර්ත් නුවර කැසිනෝ සංකීර්ණයක් සහිත හෝටලයක නවාතැන් ගෙන සිටියදී ක්රීඩකයින් අධික ලෙස මත්පැන් පානය කළ බවට ද වාර්තා විය.
මීට අමතරව, වෙලින්ටන්හි පැවති තෙවැනි එක්දින තරගයට පැය කිහිපයකට පෙර රාත්රී සමාජ ශාලාවක ආරක්ෂක නිලධාරියෙකු සමඟ ඇති කරගත් ගැටුමක් හේතුවෙන් නායක හැරී බෲක්ට පවුම් 30,000 ක දඩයක් නියම වූ අතර, ඔහුට නායකත්වය පවා අහිමි වීමට ආසන්න විය.
මීට පෙර බෙන් ස්ටෝක්ස් සහ බ්රෙන්ඩන් මැකලම් කණ්ඩායමේ පාලනය භාර ගැනීමට පෙර මෙවැනි ඇඳිරි නීතියක් ක්රියාත්මක විය. 2017-18 අළුබඳුන තරගාවලියට පෙර ජොනී බෙයාර්ස්ටෝ විසින් ඕස්ට්රේලියාවේ කැමරන් බැන්ක්රොෆ්ට් හට හිසින් පහර දුන් බවට පැවති චෝදනාවෙන් පසු එවකට කළමනාකාර අධ්යක්ෂ ඇන්ඩෲ ස්ට්රවුස් මෙම නීතිය හඳුන්වා දුන්නේය. පසුව නායකත්වයට පත් බෙන් ස්ටෝක්ස් සහ බ්රෙන්ඩන් මැකලම් එය ඉවත් කළේ ක්රීඩකයින්ට තමන්ගේ තීරණ ගැනීමට නිදහස තිබිය යුතු බව පවසමිනි.
කණ්ඩායමේ පුහුණු කාර්ය මණ්ඩලයේ ද වෙනස්කම් කිහිපයක් සිදුවී ඇත. ඕස්ට්රේලියාවේදී උඩපන්දු 17ක් අතහැරීමෙන් පසු කාල් හොප්කින්සන් නැවතත් පන්දු රැකීමේ පුහුණුකරු ලෙස කැඳවා තිබේ. එමෙන්ම පන්දු යැවීමේ උපදේශක ලෙස ඩේවිඩ් සේකර් සහ ටිම් සවුති කටයුතු කරනු ඇත.
එංගලන්ත ක්රීඩකයින්ගේ බීමත්කම තරග පරාජයන්ට බලපෑවා ද?
විදෙස් ක්රීඩා විචාරකයින් පවසන්නේ එය එසේ විය හැකි බවය. ඒ තත්ත්වයන් ඔවුහු ප්රධාන කරුණු හතරක් ඔස්සේ විග්රහ කරති.
- පන්දු රැකීමේ දුර්වලතා
ලිපියේ සඳහන් වන පරිදි, ඕස්ට්රේලියාවට එරෙහිව එංගලන්තය උඩපන්දු 17ක් අතහැර දමා ඇත. මෙයින් 5ක්ම අතහැර ඇත්තේ බ්රිස්බේන් ටෙස්ට් තරගයේ එක් වාරයක් තුළදීය. අධික ලෙස මත්පැන් පානය කිරීම නිසා ශරීරයේ ප්රතිචාර දැක්වීමේ වේගය සහ අවධානය අඩු වීම මෙවැනි සරල උඩපන්දු අතහැරීමට ප්රධාන හේතුවක් විය හැකි බව ක්රිකට් විචාරකයින් පෙන්වා දී තිබිණි.
- පුහුණුවීම් සහ සූදානම දුර්වල වීම
අළුබඳුන තරගාවලිය අතරතුර “නූසා” හි ගත කළ දින හයක විවේකය සාක්ෂිකරුවන් විසින් හඳුන්වා දී ඇත්තේ “Stag do” (විවාහයට පෙර පවත්වන මත්පැන් සාදයක්) ලෙසය. ඉහත දැක්වූ ආකාරයටම බෙන් ඩකට් වැනි ක්රීඩකයින් උතුර දකුණ මාරුවන තරමට ඩෝප් වී සිටි අයුරු දැකගත හැකි විය. මෙවැනි තත්ත්වයන් නිසා ක්රීඩකයින්ගේ ශරීරය විජලනයට පත්වන අතර, දැඩි හිරු රශ්මිය යටතේ ක්රීඩා කරන විට ඉක්මනින් විඩාවට පත්වීම සහ මාංශ පේශි ආබාධ ඇතිවීමේ අවදානම වැඩි වේ.
- මානසික අවධානය ගිලිහී යාම
කණ්ඩායම් නායක හැරී බෲක්, නවසීලන්තයට එරෙහිව තීරණාත්මක අවසන් එක්දින තරගයට පැය කිහිපයකට පෙර රාත්රී සමාජ ශාලාවක ගැටුමක පැටලුන ආකාරයත් එය ඔහුගේ නායකත්වයට පවා ගැටලුවක් මතු කළ ආකාරයත් වාර්තා කළෙමු. මෙවැනි සිදුවීම් නිසා ක්රීඩකයාට තරගය කෙරෙහි තිබිය යුතු මානසික ඒකාග්රතාවය ගිලිහී යන අතර, එය සමස්ත කණ්ඩායමේම මානසිකත්වයට (Team Morale) සෘණාත්මකව බලපායි.
- විනය පිරිහීම සහ පරාජයන්
නවසීලන්තයේදී 3-0ක් ලෙස “වයිට්වොෂ්” වීම සහ ඕස්ට්රේලියාවේදී 4-1ක් ලෙස පරාජය වීම පිටුපස ක්රීඩකයින්ගේ මෙම වගකීම් විරහිත හැසිරීම් තිබූ බව පාලනාධිකාරිය විශ්වාස කරයි. විශේෂයෙන්ම රාත්රී කාලයේ නිසි විවේකයක් නොලැබීම නිසා ක්රීඩා පිටියේදී උපරිම දක්ෂතා දැක්වීමට අවශ්ය ශක්තිය ඔවුන්ට නොතිබෙන්නට ඇත.
පවතින තත්ත්වය තුළ එංගලන්ත බලධාරීන් පවා පිළිගන්නේ ක්රීඩකයින්ට “වැඩිහිටියන් මෙන්” නිදහස ලබා දීම අසාර්ථක වූ බවයි. මේ නිසාම, ශාරීරික සුවතාවය සහ විනය පවත්වා ගැනීම සඳහා නැවතත් මධ්යම රාත්රී 12 ඇඳිරි නීතිය පැනවීමට ඔවුන් තීරණය කර ඇත.
