වැඩබලන පොලිස්පතිවරයාගේ සෘජු අධීක්ෂණය යටතේ, වැඩ තහනම් කරන ලද පොලිස්පති දේශබන්දු තෙන්නකෝන් අත්අඩංගුවට ගැනීම සඳහා ඒකාබද්ධ මෙහෙයුමක් ආරම්භ කර ඇත.
මෙම මෙහෙයුම සඳහා බුද්ධි අංශ ද සහාය ලබා දෙන බව පොලිසිය තහවුරු කර තිබේ.
දේශබන්දු තෙන්නකෝන් පමණක් නොව, අධිකරණය මග හැරීමට ඔහුට සහාය දෙන සහ අනුබල දෙන පුද්ගලයින් ද අත්අඩංගුවට ගැනීම ද මෙම මෙහෙයුමේ අරමුණ බව වාර්තා වේ.
අපරාධ පරීක්ෂණ දෙපාර්තමේන්තුවේ සොයාගැනීම් මත පදනම්ව, මාතර මහේස්ත්රාත් අරුණ බුද්ධදාස විසින් දේශබන්දු තෙන්නකෝන් සහ තවත් අට දෙනෙකු අත්අඩංගුවට ගැනීමට නියෝග කරන්නේ පෙබරවාරි 28 වන දිනය .
අනතුරුව අපරාධ පරීක්ෂණ දෙපාර්තමේන්තුව විසින් තවදුරටත් ඉදිරිපත් කළ කරුණු දැක්වීම් මත මාතර මහේස්ත්රාත් අධිකරණය දේශබන්දු තෙන්නකෝන් දුටු තැන අත්අඩංගුවට ගැනීම සඳහා විවෘත වරෙන්තුවක් නිකුත් කළේය.
අනතුරුව මාතර මහේස්ත්රාත් අධිකරණයේ නියෝගය අත්හිටුවීමට අතුරු නියෝගයක් ඉල්ලා මාර්තු 07 වැනිදා දේශබන්දු තෙන්නකෝන් අභියාචනාධිකරණයට රිට් පෙත්සමක් ගොනු කළේය.
මෙම පෙත්සම ඊයේ (17) අභියාචනාධිකරණයේ වැඩබලන සභාපති විනිසුරු මොහොමඩ් ලෆාර් තාහීර් සහ විනිසුරු සරත් දිසානායක ඉදිරියේ විභාගයට ගන්නා ලදී.
දේශබන්දු තෙන්නකෝන් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මෝසමක් ඉදිරිපත් කරමින් කියා සිටියේ, පසුගිය සිකුරාදා මාතර මහේස්ත්රාත් අධිකරණයෙන් සම්පූර්ණ නඩු ගොනුව ලැබුණු බවයි. වැඩිදුර කරුණු ඉදිරිපත් කිරීම සඳහා නීතිඥවරයා කල් ඉල්ලා සිටියේය. නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් දිලිප් පීරිස් මහතා ඊට දැඩි ලෙස විරුද්ධ වූයේ මාර්තු 12 වන දින දෙපාර්ශ්වයම පැය දෙකකට වැඩි කාලයක් තම තර්ක ඉදිරිපත් කර ඇති බවත්, අධිකරණය අද නියෝගය නියම කිරීමට සඳහා දින නියම කළ බවත්ය.
තර්ක සලකා බැලීමෙන් පසු, විනිසුරු තහීර් දේශබන්දු තෙන්නකෝන්ගේ මෝසම නිෂ්ප්රභ කර අභියාචනාධිකරණ තීන්දුව ප්රකාශයට පත් කරමින් අවධාරණය කළේ
දේශබන්දු තෙන්නකෝන් සාමාන්ය පුරවැසියෙකු නොව රටේ පොලිස්පතිවරයා බවයි.
ජ්යෙෂ්ඨ පොලිස් නිලධාරියෙකු දින 18 ක් අධිකරණය මඟ හැරීම බරපතල වරදක් බව ඔහු සඳහන් කළේය.
සභාපති විනිසුරුවරයා ප්රකාශ කළේ දේශබන්දු තෙන්නකෝන්ගේ ක්රියාවන් නීතියේ ආධිපත්යය බිඳ දැමූ බවත්, එය ඔහු විසින් ආරක්ෂා කිරීමට වගකිව යුතු බවත්ය.
අභියාචනාධිකරණ තීන්දුව අනුව වැඩතහනම් කළ පොලිස්පති දේශබන්දු තෙන්නකෝන් අත් අඩංගුවට ගැනීමට වැඩබලන පොලිස්පති ප්රියන්ත වීරසූරිය විසින් මෙහෙයුමක් ආරම්භ කර තිබේ.
