රෝගියකුට වැඩි මිලට ඖෂධ විකිණීම සම්බන්ධයෙන් වරෙන්තු වී සිටි නාරාහේන්පිට ආසිරි රෝහලේ අධක්ෂවරුන් 7 දෙනා අධිකරණයට ඉදිපත්විමෙන් පසු ලක්ෂ 5 බැගින් වු ශරිර ඇප මත මුදා හැරීමට මාලිගාකන්ද අධිකරණය අද (26) නියෝග කළේය.
එමෙන්ම නඩුව යළි නොවැම්බර් 02 දා කැඳවීමට ද නියෝග කළේය.
2023 පෙබරවාරී 07 වැනිදාත් 19 වැනිදාත් අතර කාලය තුළ නාරාහේන්පිට ආසිරි රෝහලේ නේවාසිකව ප්රතිකාර ලබමින් සිටි සමරකෝන් මුදියන්සේලාගේ මන්ත්රී කුමාරිහාමිට උපරීම සිල්ලර මිලක් නියම කර ඇති ඖධෂ එම උපරීම සිල්ලර මිලට වඩා වැඩිමිල ගණන් යොදා මුදල් අයකළ බවට ඖධෂ නියාමන අධිකාරි පනත යටතේ විත්තිකරුවන්ට එරෙහිව චෝදනා 11ක් යටතේ ජාතික ඖධෂ නියාමන අධිකාරිය විසින් උක්ත නඩුව පවරා තිබිණී.
ජාතික ඖධෂ නියාමන අධිකාරිය මෙම නඩුව පැවරූ පසු ජනවාරී මස 23 වැනිදා අධිකරණයේ පෙනී සිටින ලෙස නියම කරමින් විත්තිකරුවන්ට නොතිසි නිකුත් කර තිබියදී ප්රධාන මහෙස්ත්රාත්වරිය රාජකාරි නිවාඩු ගත් ජනවාරී මස 17 වැනිදා මෝසමක් මාර්ගයෙන් වැඩබලන මහෙස්ත්රාත් හිමාලි ඒකනායක හමුවට අදාළ සමාගමේ බලයලත් නියෝජිතවරයකු වශයෙන් කැලුම් ගිමේන්ත්ර ජයසුරිය නමැත්තා ඉදිරිපත් වී අදාළ චෝදනාවන්ට වරද පිළිගැනමෙන් පසු ඔහුට රුපියල් 25000/-ක දඩයක් නියම කොට තිබු අතර දඩ මුදල නොගෙවුවහොත් මාස 06ක සිරදඬුමකට ඔහු යටත් කෙරිණී.
නේවාසික රෝගියකුට වැඩි මිලට ඖෂධ විකිණීම සම්බන්ධයෙන් ආසිරි රෝහලට සහ එහි අධක්ෂවරුන්ට එරෙහිව පවරා ඇති තිබු නඩුවේදී මාලිගාකන්ද වැඩබලන මහෙස්ත්රාත්වරිය දුන් නියෝගය දෝෂ සහගත බවට අගතියට පත් සනත් කුමාර අතුකෝරල කළ පැමිණල්ලකට අනුව වැඩබලන මහෙස්ත්රාත්වරිය දුන් නියෝගය දෝෂ සහගතද? නැද්ද? යන්න පිළිබඳ සෙවීම සඳහා නඩුව යළි විවෘත කෙරිනි.
එහි තීන්දුව ප්රකාශයට පත් කරමින් මාලිගාකන්ද හිටපු මහේස්ත්රාත් ලෝචනි අබේවික්රම වීරසිංහ ය මාලිගාකන්ද වැඩබලන මහෙස්ත්රාත්වරිය දුන් නියෝගය දෝෂ සහගත බවට තීරණය කරමින් අදාළ පෞද්ගලික රෝහලට සහ එහි අධ්යක්ෂවරුන්ට ඊයේ (25) දිනයේ අධිකරණයේ පෙනී සිටින ලෙස නියම කරමින් සිතාසි නිකුත් කර තිබිණී.
එහෙත් අධ්යක්ෂ මණ්ඩලය එම නියෝගයට අනුව අධිකරණයට ඉදිරිපත් නොවීම හේතුවෙන් ආසිරි රෝහලේ අධක්ෂවරුන් වහාම අත්අඩංගුවට ගෙන අධිකරණයට ඉදිරිපත් කරන ලෙස මාලිගාකන්ද මහේස්ත්රාත් ජනිතා රෝෂනී පෙරේරා ඊයේ නියෝග කළාය.
මේ ලිපියත් බලන්න…
නේවාසික රෝගියෙකුට වැඩි මිලට ඖෂධ විකිණීම – නඩුවට පෙනී නොසිටි ආසිරි රෝහලේ අධ්යක්ෂ මණ්ඩලයට වරෙන්තු…
